Polšča ŭvodzić abmiežavańni na paloty avijacyi ŭzdoŭž miežaŭ Biełarusi i Ukrainy
Polskaje ahienctva pavietranaj navihacyi paviedamiła ab uviadzieńni śpiecyjalnaj zony abmiežavańnia palotaŭ va ŭschodniaj častcy krainy, jakaja miažuje ź Biełaruśsiu i Ukrainaj. Heta rašeńnie pryniata pa patrabavańni vajskovaha kamandavańnia dla zabieśpiačeńnia dziaržaŭnaj biaśpieki.
Novyja praviły pačnuć dziejničać z 10 sakavika 2026 hoda i praciahnucca try miesiacy. Jany aznačajuć pieravod prymiežnaj pavietranaj prastory na ŭschodzie Polščy ŭ režym pavyšanaj hatoŭnaści, kab spraścić pracu SPA/VPS u vypadku pahroz.
Dla zvyčajnych pasažyraŭ avijakampanij ničoha nie źmienicca, bo abmiežavańni tyčacca tolki vyšyni da troch kiłamietraŭ. Adnak dla pryvatnych piłotaŭ, uładalnikaŭ dronaŭ i małoj avijacyi praviły istotna ŭzmacniajucca.
U načny čas paloty ŭ hetaj zonie buduć całkam zabaronienyja dla ŭsich, akramia vajskoŭcaŭ i ekstrannych słužbaŭ. U dzionny čas padniacca ŭ pavietra možna budzie tolki pry ŭmovie pastajannaj suviazi z dyśpietčarami i najaŭnaści śpiecyjalnaha abstalavańnia, jakoje dazvalaje vajskovym radaram bačyć abjekt.
Luboje niesankcyjanavanaje vykarystańnie navat cyvilnaha drona ŭ hetaj zonie zaraz budzie ličycca surjoznym parušeńniem zakona.
Polskija ŭłady padkreślivajuć, što takija zachady nieabchodnyja dla kantrolu pavietranaj prastory ŭ składanych umovach, kali dziejnaść kala miežaŭ patrabuje asablivaj uvahi z boku sił supraćpavietranaj abarony.
Kamientary