22 kastryčnika ŭ Biełarusi źjaviłasia novaja firma — «Kreatyŭny kod», jakaja prezientuje siabie jak «bujniejšuju ŭ Respublicy Biełaruś kampaniju, jakaja zajmajecca dyzajnam i raźmiaščeńniem vonkavaj rekłamy i maje šyrokuju sietku rekłamnych nośbitaŭ roznych farmataŭ u Minsku i ŭ abłasnych centrach». «Biuro» vyśvietliła, što za hetaj firmaj staić niaviestka Alaksandra Łukašenki Hanna, bolej viadomaja pad tvorčym psieŭdanimam Hanna Siałuk.
Na siońniašni dzień biznes niaviestki Łukašenki pieratvaryŭsia ŭ paŭnavartasny miedyjachołdynh, jaki adnačasova zajmajecca stvareńniem muzyčnych kampazicyj «pad kluč», pradziusavańniem artystaŭ estrady, arhanizacyjaj dziaržaŭnych mierapryjemstvaŭ, dziciačych śviataŭ, vypusknych, vytvorčaściu videaklipaŭ, imidžavych rolikaŭ, stvareńniem telešou i vałodaje tryma radyjostancyjami.
Sukupna 25% naležać firmam, źviazanym z Hannaj Łukašenkaj (Siałuk). Ź ich 15% zapisana na «Muzyčnuju miedyjakampaniju», dzie niaviestka Łukašenki zajmaje pasadu hienieralnaha pradziusara. Jašče 10% adpisali «ANSŁ pradakšn», uładalnik jakoj — top-mieniedžar jaje muža Dźmitryja Łukašenki Andrej Urubleŭski.
«Biuro» ličyć, što Urubleŭski moža vykonvać u «ANSŁ pradakšn» funkcyju naminalnaha ŭładalnika, kab schavać udzieł u kampanii žonki svajho patrona. Abrevijatura ANSŁ vielmi nahadvaje inicyjały žonki siaredniaha syna Łukašenki — ANna (pa-rusku) Siarhiejeŭna Łukašenka.
Z kastryčnika pa śniežań 2025 hoda pasadu dyrektara ŭ «Kreatyŭnym kodzie» zajmaŭ Pavieł Lohki. Dziakujučy «Kibierpartyzanam» žurnalisty vyśvietlili, što ŭ minułym jon zajmaŭ vysokapastaŭlenyja pasady: kiravaŭ pres-słužbaj u administracyi Łukašenki, byŭ namieśnikam ministra infarmacyi, daradcam-pasłańnikam u pasolstvie Biełarusi ŭ Maskvie, namieśnikam dyrektara ŭ Biełaruskim instytucie stratehičnych daśledavańniaŭ.
75% «Kreatyŭnaha koda» naležać ZAT «KorusMiedyja». Hetaja firma była zarehistravanaja 31 kastryčnika 2025 hoda i taksama zajmajecca raźmiaščeńniem rekłamy. Forma ŭłasnaści ZAT nie praduhledžvaje raskryćcia kančatkovych bienieficyjaraŭ.
Kamientary