MZS Litvy nazvała sustreču Turčyna ź litoŭskimi pieravozčykami prapahandysckim krokam
Paśla sustrečy z pradstaŭnikami pieravozčykaŭ u Minsku 17 sakavika biełaruskija ŭłady zajavili, što nie majuć namieru kanfiskoŭvać litoŭskija i polskija hruzaviki, jakija zatrymanyja na terytoryi krainy. Pavodle aficyjnaj infarmacyi, Minsk choča znajści «kanstruktyŭnaje rašeńnie» i vychad ź situacyi. Ale litoŭskaje MZS prykmietaŭ hetaha nie bačyć, paviedamlaje LRT.
Prablema ŭźnikła paśla taho, jak z kanca kastryčnika, paśla časovaha pierakryćcia Litvoj dziaržaŭnaj miažy, Biełaruś pačała zatrymlivać litoŭskija hruzaviki i nakiroŭvać ich na śpiecyjalnyja stajanki pad kantrolem mytnych orhanaŭ. Hetyja stajanki kirujucca kampanijaj, jakaja znachodzicca pad sankcyjami ES. Za znachodžańnie transpartu spahaniajecca płata kala 120 jeŭra ŭ sutki za kožny hruzavik abo paŭpryčep. Pieršapačatkova biełaruskija ŭłady navat pahražali kanfiskacyjaj techniki paśla niekalkich miesiacaŭ.
Ciapier Minsk zajaŭlaje, što nie płanuje kanfiskacyju, ale padkreślivaje: vydatki za stajanku pavinny być kampiensavanyja. Heta vyklikaje zaniepakojenaść u pieravozčykaŭ, bo suma moža akazacca vielmi vialikaj — časam navat bolšaj za košt samoha transpartnaha srodku.
Litoŭskaje Ministerstva zamiežnych spraŭ rezka raskrytykavała hetyja dziejańni. Tam ličać, što ŭčarašniaja sustreča ź pieravozčykami z udziełam premjer-ministra Alaksandra Turčyna, razam z zajavami pra «mirnaje vyrašeńnie» — heta tolki prapahandyscki krok i častka hibrydnaj kampanii cisku na Litvu. Pavodle litoŭskaha boku, Biełaruś naŭmysna zatrymlivaje transpart i vykarystoŭvaje situacyju ŭ palityčnych metach.
Litva patrabuje nieadkładna vypuścić usie zatrymanyja hruzaviki i spynić inšyja dziejańni, jakija jana ličyć varožymi, u tym liku zapusk kantrabandnych pavietranych šaroŭ, jakija mohuć pahražać biaśpiecy avijacyi.
Pry hetym adznačajecca, što ŭ sustrečy ź biełaruskim premjeram nie ŭdzielničali asnoŭnyja halinovyja arhanizacyi Litvy — ni najbujniejšaja Linava, ni inšyja bujnyja abjadnańni. Tudy pajechała tolki inicyjatyŭnaja hrupa pieravozčykaŭ. Pavodle pradstaŭnikoŭ haliny, pakul niama dakładnaj infarmacyi, jakoje kančatkovaje rašeńnie prymie Biełaruś, ale čakajecca, što jano moža źjavicca ŭ bližejšy čas.
Pavodle roznych danych, u Biełarusi było zatrymana ad niekalkich sotniaŭ da niekalkich tysiač litoŭskich hruzavikoŭ i paŭpryčepaŭ. Častka ŭžo viarnułasia, ale značnaja kolkaść zastajecca na terytoryi krainy, i pieravozčyki niasuć istotnyja finansavyja straty.
Ciapier čytajuć
Prapahandysty zapeŭnivajuć, što 196 palitviaźniaŭ užo na svabodzie8
Kamientary