U Babrujsku BMW, sychodziačy ad sutyknieńnia, źniesła arku žyłoha doma FOTY
Mocnaja avaryja zdaryłasia ŭ Babrujsku 17 maja. Kiroŭca BMW, sychodziačy ad sutyknieńnia, źnios arku žyłoha doma. Druhi ŭdzielnik DTZ, jaki byŭ za styrnom Volkswagen Polo, pavodle papiarednich danych, vyjechaŭ na skryžavańnie na čyrvonaje śviatło, paviedamlaje komkur.info.
Avaryja adbyłasia na skryžavańni Minskaj i Sacyjalistyčnaj vulic.
Sprabujučy paźbiehnuć udaru, kiroŭca BMW vyjechaŭ z prajeznaj častki na tratuar, źnios lichtar, darožny znak, dreva i častku arki trochpaviarchovaha žyłoha doma. Pa ščaślivaj vypadkovaści nichto ź piešachodaŭ nie paciarpieŭ.
Jak raskazaŭ sam kiroŭca, jon ruchaŭsia pa Minskaj u bok «biełaj carkvy», na zialonaje śviatło. Chutkasny režym nie parušaŭ. Na skryžavańni z Sacyjalistyčnaj napierarez jaho mašynie vyjechaŭ VW Polo. Jaho kiroŭcu hareła «čyrvonaje». Hetu viersiju paćvierdzili i vidavočcy, jakija znachodzilisia na miescy avaryi.
Kiroŭcam VW byŭ pažyły mužčyna. Ni jon, ni kiroŭca BMW nie paciarpieli.
U abiedźviuch inamarkach spracavali paduški biaśpieki.
Kali «Poła» jašče možna adramantavać, to BMW, chutčej za ŭsio, adnaŭleńniu nie padlahaje. Premijalny niamiecki siedan apynuŭsia litaralna pachavany pad frahmientami bramy doma pabudovy 1950‑ch hadoŭ. Sama arka całkam razburana.
Kamientary