Za jakija videa ŭ sacsietkach mohuć pryciahnuć da adkaznaści? I razmova nie pra pratesnyja roliki
Časta tych, chto niapravilna parkujecca abo pa-chamsku siabie pavodzić, zdymajuć na videa i vykładajuć u sieciva. Dyrektar Nacyjanalnaha centra abarony piersanalnych danych Andrej Hajeŭ śćviardžaje, što taki samasud čynić nielha.
«Kali jość niejki momant parušeńnia čałaviekam, źviazany z pryparkavanym im niapravilna aŭtamabilem, ci z parušeńniem hramadskaha paradku, ci z abrazaj adnaho hramadzianina inšym, to nieabchodna źviartacca ŭ pravaachoŭnyja orhany», — skazaŭ Andrej Hajeŭ BiełTA, dadaŭšy, što raspaŭsiudžvańnie źviestak pra čałavieka bieź jaho zhody — parušeńnie zakona. «Samasud ładzić nielha, jość prykmiety parušeńniaŭ — na heta jość upaŭnavažanyja orhany».
U Nacyjanalny centr abarony piersanalnych danych niejak źviartaŭsia čałaviek, pra jakoha vykłali niehatyŭny rolik u tyktoku. «Było paćvierdžana, što padstaŭ dla raźmiaščeńnia takoha rodu infarmacyi nie było. I hramadzianin, jaki raźmiaściŭ takuju infarmacyju, byŭ pryciahnuty da administracyjnaj adkaznaści», — raskazaŭ Andrej Hajeŭ.
«Niadaŭna adbyłasia situacyja z nastaŭnikam u škole, jaki byŭ pryciahnuty administracyjaj ustanovy adukacyi da adkaznaści. Heta stała dastupna ŭdzielnikam školnaha čata, dzie adzin z baćkoŭ hetyja źviestki raźmiaściŭ. Pra nastaŭnika stała raspaŭsiudžvacca infarmacyja piersanalnaha płana ŭ miežach kankretnaha vypadku siarod značnaha koła asob. U vyniku čałaviek nie zmoh praciahnuć pracu ŭ hetaj ustanovie adukacyi. I vybranaja sprava žyćcia akazałasia dla jaho zakrytaj», — raskazaŭ Hajeŭ.
Da kryminalnaj adkaznaści adnojčy pryciahnuli biełarusa, jaki niehatyŭna pakazaŭ pracu rabotnika kramy. Taja infarmacyja, pa słovach Hajeva, psichałahična paŭpłyvała na rabotnika i jaho dzicia. Tamu na taho, chto raźmiaściŭ jaje, zaviali kryminalnuju spravu, bo byli pryčynieny maralnyja pakuty.
Časam bačańnie Nacyjanalnaha centra abarony piersanalnych danych razychodzicca z padychodam inšych orhanaŭ. Tak, u centry vykazvalisia, što vyvodzić na tabło numary mašyn tych, chto nie prajšoŭ techahlad abo nie pryšpiliŭsia, nie pa zakonie. DAI z hetym nie pahadziłasia.
Kamientary