Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa

Siońnia na «Čyžoŭka-arenie» prachodzić pieršy dzień pratestanckaha «Fiestyvalu nadziei». Na im sabrałasia bolš za 7500 čałaviek. Dla praviadzieńnia hetaha forumu ŭpieršyniu zhurtavalisia dźvie pratestanckija denaminacyi: chryścijanie viery jevanhielskaj i baptysty.

Na mierapryjemstva z ZŠA prylacieŭ viadomy baptyscki prapaviednik Franklin Hrem.

U pačatku svajoj pramovy Franklin Hrem padziakavaŭ usim, chto dapamoh arhanizavać fiestyval u Minsku. I vykanaŭ toje, što abiacaŭ učora Łukašenku — pamalicca za ŭłady.

«Biblija havoryć, kab my malilisia za načalstva. U pieršym pasłańni Cimafieja (hłava 2) u vieršach pieršym i druhim skazana, kab my malilisia. My pavinny malicca za kiraŭnictva. Učora ja skazaŭ vašamu prezidentu, prezidentu Łukašenku, što siońnia ŭviečary my ŭsie ŭstaniem. Ja paprašu ŭsich vas ustać. Ja paprašu vas pramović malitvu za vašaha prezidenta, za tych, chto kiruje.

Tyja, chto z Rasii, maliciesia za prezidenta Pucina, tych, chto staić va ŭładzie ŭ vašaj krainie. I ja budu malicca za svajho prezidenta — prezidenta Trampa. Davajcie zaraz usłych pamolimsia».

Voś jak prakamientavali źjaŭleńnie Franklina Hrema na scenie ŭ telehram-kanale «Fiestyval nadziei Minsk»: «Momant iściny. Na scenie Franklin Hrem. Prosta tut i ciapier hučać słovy pra samaje važnaje — pra mir i tuju nadzieju, jakuju niemahčyma adabrać. Heta kulminacyja, dziela jakoj my ŭsie tut sabralisia. Kožnaje słova — u samaje serca. My bačym tysiačy vačej, poŭnych śviatła. Boh havoryć da Biełarusi siońnia».

Na fiestyvali vystupali chor «Hołas nadziei», simfaničny arkiestr.

Siarod tych, chto trapiŭ na trybuny niečakana apynułasia błohierka Hanna Bond. Jana zastałasia zadavolenaja:

«Išła pa ŭražańni. Atrymała. Upieršyniu na takim mierapryjemstvie, maštabna. Vydatnaja arhanizacyja. Sieła ŭ partery, praŭda, dziela hetaha pryjšłosia pryjechać za 1,5 hadziny da pačatku».

Pavialičyć

Pačynałasia mierapryjemstva ŭ 17.00, ludziam rekamiendavali pryjści na hadzinu raniej. Na videa, jakija zdymali la «Čyžoŭka-areny» bačna, što sabrałasia davoli šmat narodu.

Achvotnych pabačyć fiestyval akazałasia bolš za kolkaść miescaŭ. Tyja, chto nie zmoh trapić, skardziacca ŭ sacsietkach na kiepskuju arhanizacyju. Raniej u rekłamie mierapryjemstva ŭsiudy padkreślivałasia, što pryjści i pasłuchać pratestanckaha pastara Franklina Hrema moža luby achvotny: nijakich kvitkoŭ dla hetaha nie treba.

Ale pabačyć vystup Hrema ŭžyvuju mahli vyklučna tyja, chto mieŭ zaprašeńni. Astatnim prapanoŭvali hladzieć tranślacyju na ekranach małoj areny. Dla razumieńnia: vialikaja arena raźličana pryblizna na 8,8 tysiačy hledačoŭ, a małaja — mienš, čym na 500 čałaviek.

U kamientarach u Threads niekatoryja kažuć, što peŭnaja kolkaść ludziej, jakaja pryjechała značna raniej za 16.00, zmahła trapić u vialikuju zalu na bakavyja miescy biez zaprašeńniaŭ.

U adnym ź videa bačna, što pierad aburanymi ludźmi, jakija nie zmahli trapić na fiestyval, u hučnahavaryciel vybačajecca siłavik. Jon kaža, što miescaŭ užo fizična niama: ludziej puścili stajać navat u kalidorach.

Zaŭtra rekamiendujuć pryjazdžać za 3‑4 hadziny da pačatku fiestyvalu.

Razam z Hremam na fiestyval pryjechała i žonka pradstaŭnika Trampa Džona Koŭła — Hreta van Sasteren daŭno supracoŭničaje z fondam Samaritan's Purse, jaki ŭznačalvaje Hrem.

• 1
• 0
• 4
• 20
• 0
• 0
• 2
• 0