Miljony ludziej štodnia karystajucca apałoskvalnikami dla rota, ličačy, što heta karysna dla zuboŭ. Ale ŭsio bolš ekśpiertaŭ śćviardžajuć: dla bolšaści ludziej hetyja srodki nie tolki niepatrebnyja, ale ŭ niekatorych vypadkach mohuć navat pavialičvać ryzyku surjoznych prablem sa zdaroŭjem.
Apałoskvalniki dla rota daŭno rekłamujuć jak srodak dla śviežaha dychańnia, prafiłaktyki karyjesu i źniščeńnia bakteryj. Adnak, jak paviedamlaje vydańnie Daily Mail, žurnalisty jakoha parazmaŭlali z ekśpiertami, dla mnohich ludziej hety srodak źjaŭlajecca zališnim i moža navat nanieści škodu.
Prafiesar stamatałahičnaj škoły Univiersiteta Hłazha Devid Konvej (David Conway) kaža, što nie raić vykarystoŭvać apałoskvalniki dla štodzionnaj hihijeny. Na jaho dumku, u ich niama patreby, kali čałaviek pravilna čyścić zuby ščotkaj.
Klučavym arhumientam na karyść mnohich apałoskvalnikaŭ źjaŭlajecca najaŭnaść u ich ftarydu natryju — chimičnaha rečyva, jakoje ŭmacoŭvaje zubnuju emal. Prafiesar Konvej tłumačyć, što jon nie zabiaśpiečvaje takoj ža abarony, jak naležnaja čystka zuboŭ pastaj, jakaja pienicca i lepš utrymlivajecca na zubach.
Prablema, pavodle jaho słoŭ, zaklučajecca ŭ tym, što zanadta šmat ludziej pałoščuć rot vadoj adrazu paśla čystki zuboŭ, što prosta vymyvaje ftor. Pavodle słovaŭ ekśpierta, lepš prosta vyplunuć reštki pasty i nie pałaskać rot. U takim vypadku ftor praciahvaje dziejničać, i patreba ŭ apałoskvalniku źnikaje.
Škodnyja składniki
Asobnuju tryvohu ŭ śpiecyjalistaŭ vyklikaje skład niekatorych srodkaŭ. Šerah apałoskvalnikaŭ utrymlivaje da 27% ałkaholu. Śpirt sapraŭdy efiektyŭna źniščaje bakteryi, ale adnačasova ž jon kancerahien — pavyšaje ryzyku raku rotavaj połaści, horła i hartani.
Jašče ŭ 2014 hodzie Mižnarodnaje ahienctva pa daśledavańni raku vyjaviła suviaź pamiž vykarystańniem apałoskvalnikaŭ i rakam połaści rota, praŭda, tolki ŭ tych ludziej, jakija karystalisia imi bolš za try razy na dzień.
Inšyja antybakteryjnyja kampanienty taksama vyklikajuć pytańni. Naprykład, chłorhieksidyn — mocny antysieptyk. Jon dapamahaje pry lačeńni zapaleńnia dziasien, małočnicy i jazvaŭ u rocie. Adnak, jak zaŭvažaje Konvej, akramia karotkaterminovaha lačeńnia kankretnych zachvorvańniaŭ pa pryznačeńni stamatołaha, jaho nielha vykarystoŭvać rehularna.
Daśledavańni taksama źviazvajuć chłorhieksidyn i jašče adzin antysieptyk — cetyłpirydyniju chłaryd — z pavyšanaj ryzykaj sardečna-sasudzistych zachvorvańniaŭ.
Navukoŭcy miarkujuć, što prablema ŭ tym, što hetyja rečyvy źniščajuć nie tolki škodnyja, ale i karysnyja bakteryi ŭ rocie. Apošnija dapamahajuć pieratvarać nitraty ź ježy (sałaty i harodniny) u aksid azotu — rečyva, jakoje arhanizm vykarystoŭvaje dla rehulacyi sardečna-sasudzistaj sistemy.
Dacent Birminhiemskaha ŭniviersiteta i navukovy kansultant Brytanskaj stamatałahičnaj asacyjacyi Pravin Šarma (Praveen Sharma) kaža, što navuka tolki pačynaje razumieć rolu mikrabijomu połaści rota. Tamu, na jaho dumku, nie varta biez patreby niščyć usie bakteryi antysieptykami.
Asabliva aściarožna śpiecyjalisty rajać stavicca da vykarystańnia apałoskvalnikaŭ suprać niepryjemnaha pachu z rota. Pavodle Šarmy, drenny pach časta byvaje simptomam chvarob dziasien. U takim vypadku apałoskvalnik tolki maskiruje prablemu, jak aśviažalnik pavietra, ale nie lečyć jaje.
Tym nie mienš, jak zaŭvažajuć ekśpierty, dla niekatorych apałoskvalnik moža stać dadatkovaj dapamohaj. Naprykład, dla tych, chto maje pavyšanuju ryzyku karyjesu, ftarydny apałoskvalnik moža być karysnym. Takim ludziam varta čyścić zuby ftarydnaj pastaj ranicaj i ŭviečary, a ŭ siaredzinie dnia dadatkova vykarystoŭvać apałoskvańnie.
Prostyja sposaby paźbiehnuć niepryjemnaha pachu z rota
Śpiecyjalisty taksama nahadvajuć, što z niepryjemnym pacham z rota možna zmahacca i biez ahresiŭnych antysieptykaŭ. Vialikaje značeńnie maje dastatkovaja kolkaść śliny, jakaja naturalnym čynam vymyvaje bakteryi i reštki ježy.
Karejskaje daśledavańnie 2021 hoda pakazała, što abiazvodžvańnie paharšaje pach z rota: u ludziej ź niedachopam vady vypracoŭvałasia mienš śliny i pavialičvałasia kolkaść siernych złučeńniaŭ, jakija vyklikajuć smurod.
Dapamahčy mohuć i prostyja zvyčki — žavalnaja humka biez cukru, asabliva z ksilitam, a taksama chrumstkaja harodnina i sadavina nakštałt jabłykaŭ, morkvy i sieldereju. Jany miechanična ačyščajuć rot padčas žavańnia.
Karysnaj moža być i zialonaja harbata, jakaja, jak miarkujecca, źnižaje kolkaść bakteryj, što vypracoŭvajuć siernyja złučeńni.
A voś kava, enierhietyčnyja napoi i propusk pryjomaŭ ježy, naadvarot, mohuć paharšać situacyju, bo spryjajuć suchaści ŭ rocie.
Kamientary