Kiraŭnik KNDR razam z dačkoj Kim Čžu E siońnia naziraŭ za vyprabavańniami novaha eśminca «Kan Hon».
«Tavaryš Kim Čen Yn padniaŭsia na eśminiec Kan Hon i aznajomiŭsia sa stanam centra kiravańnia i inšych roznych miescaŭ i pastoŭ bajavych raźlikaŭ, płanam chadavych vyprabavańniaŭ i paetapnymi płanami vyprabavańniaŭ uzbrajeńnia karabla. U prysutnaści Kim Čen Yna byli praviedzieny chadavyja vyprabavańni karabla dla acenki roznych apieratyŭnych mahčymaściaŭ», — havorycca ŭ paviedamleńni Paŭnočnakarejskaha telehrafnaha ahienctva.
Kim Čen Yn paprasiŭ kiraŭnikoŭ, vučonych i techničny kalektyŭ haliny daśledavańnia karabla i sistemy ŭzbrajeńniaŭ «z pačućciom honaru za misiju i vysokaj adkaznaści paśpiachova prasunuć praces vyprabavańniaŭ dla acenki zdolnaści da apieratyŭnaha vykanańnia i jak maha chutčej pieradać eśmincy «Čve Chion» i «Kan Hon» u rasparadžeńnie VMS, ciopła natchniŭšy ich», — napisała KCNA.
Delehacyja na eśmincy była pradstaŭničaj: sakratar CK Pracoŭnaj partyi Karei (PPK), pieršy namieśnik kiraŭnika adździeła CK PPK, kamandujučy VMS, daradca Ministerstva abarony Pak Čon Čchon, namieśnik ministra abarony i načalnik Hałoŭnaha ŭpraŭleńnia ŭzbrajeńniaŭ, načalnik Hałoŭnaha ŭpraŭleńnia rakietabudavańnia, prezident Akademii nacyjanalnaj abarony, načalnik Upraŭleńnia ekśpiertyzy ŭzbrajeńniaŭ Ministerstva abarony, kamandavańnie VMS i adkaznyja rabotniki haliny karablebudavańnia.
Apošnija dva hady Kim Čen Yn rehularna źjaŭlajecca na važnych mierapryjemstvach z Kim Čžu E, i i pra jaje kažuć jak pra vierahodnuju pierajemnicu.
Ličycca, što Kim Čžu E naradziłasia ŭ kancy 2012 — pačatku 2013 hoda, tamu joj moža być 13 hod. Ciaham 2012 hoda jaje maci Li Sol Čžu nie źjaŭlałasia na publicy i nie zhadvałasia ŭ paŭnočnakarejskich ŚMI, što paźniej źviazali ź jaje ciažarnaściu.
Pieršaje publičnaje źjaŭleńnie Kim Čžu E adbyłosia ŭ listapadzie 2022 hoda ŭ 10‑hadovym uzroście, kali jana supravadžała svajho baćku padčas zapusku mižkantynientalnaj balistyčnaj rakiety «Chvason-17».
Dziaržaŭnyja ŚMI spačatku nazyvali jaje «lubimaj dačkoj» Kim Čen Yna, ale paźniej pačali charaktaryzavać jak «pavažanuju dačku». Paśla dziaŭčyna stała rehularna supravadžać baćku na roznych važnych mierapryjemstvach.
Tak, u sakaviku hetaha hoda jana z baćkam naviedała vajennaje pradpryjemstva i papraktykavalisia ŭ stralbie, potym prateściravali tank i navat prymali parad.
A 16 lutaha jana prysutničała na adkryćci ŭ Pchieńjanie vulicy ŭ honar zahinułych u Kurskaj vobłaści paŭnočnakarejskich vajskoŭcaŭ.
U Nacyjanalnaj słužbie raźviedki Paŭdniovaj Karei raniej zaznačali, što pa-raniejšamu razhladajuć roznyja varyjanty płanaŭ Pchieńjana pakinuć pasadu ŭ spadčynu (krainaj kiruje ŭžo treciaje pakaleńnie Kimaŭ pačynajučy z 1950 hoda). Całkam mahčyma, što Kim Čen Yn zachoča praciahnuć hetuju tradycyju.
U Kima jość starejšy syn Čen Čžu, jon 2010 hoda naradžeńnia, ale pra jaho mała viadoma. Na fotach z aficyjnych mierapryjemstvach jaho nie bačna, mahčyma, jon, jak i baćka ŭ maładości, vučycca ŭ Zachodniaj Jeŭropie.
Kim Čen Yn kiruje KNDR z 2011 hoda, jamu 44 hady.
Ciapier čytajuć
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny2
Kamientary