Віцэ-прэзідэнт ЗША Джэй Дзі Вэнс прыкметна схуднеў пасля таго, як перайшоў на дыету з квашанай капустай і ферментаванай гароднінай. Гэтым жа рацыёнам захапіліся і іншыя паплечнікі Дональда Трампа. Напрыклад, міністр аховы здароўя Роберт Кенэдзі-малодшы сцвярджае, што за першы месяц такога харчавання страціў каля 9 кілаграмаў. Хто стаіць за новай модай у амерыканскай адміністрацыі і ці захапіла яна Трампа, расказвае The Wall Street Journal.
Ідэйным натхняльнікам новай дыеты стаў доктар Шон О’Мара. Яго папулярнасць сярод палітыкаў не выпадковая: О’Мара пачаў працаваць з палітычнай элітай яшчэ ў часы прэзідэнцтва Джорджа Буша-малодшага, калі ўваходзіў у групу медыкаў, якія абслугоўвалі Белы дом.
Сёння доктар вядзе прыватную практыку і спецыялізуецца на комплексных МРТ-даследаваннях арганізма. Гэта дазваляе дакладна выявіць вісцаральны тлушч — той, што назапашваецца вакол унутраных органаў і правакуе рызыку развіцця дыябету другога тыпу, сардэчна-сасудзістых захворванняў і метабалічнага сіндрому.
Сутнасць дыеты даволі простая: ферментаваныя прадукты, перадусім квашаная капуста і кімчы, а таксама мяса жывёл, якія харчаваліся травой. Пры гэтым неабходна адмовіцца ад алкаголю і прадуктаў з высокім утрыманнем цукру. Для перакусаў О’Мара рэкамендуе так званыя «старыя еўрапейскія сыры» — блакітны сыр, гарганзолу або пармезан.
Паводле пераканання О’Мары, менавіта такі рацыён спрыяе памяншэнню небяспечных тлушчавых адкладаў і аздараўленню мікрабіёму кішачніка. Як піша WSJ, доктар асабліва любіць працаваць з пацыентамі сталага веку, бо лічыць, што ў іх вынікі такіх зменаў найбольш прыкметныя.
Першым сярод чыноўнікаў на новую дыету каля года таму перайшоў 72‑гадовы Роберт Ф. Кенэдзі-малодшы. Ён заяўляе, што за першыя 30 дзён страціў прыкладна 9 кілаграм. Паводле словаў Кенэдзі, змяненне харчавання дапамагло не толькі схуднець, але і пазбавіцца ад боляў у целе, а таксама спыніць прыступы фібрыляцыі перадсэрдзяў, на якія ён пакутаваў раней.
Пры гэтым, як заўважае WSJ, сам смак квашанай капусты Кенэдзі не заўсёды даспадобы. Тым не менш ён ставіцца да дыеты настолькі сур’ёзна, што пастаянна возіць з сабой запасы ферментаванай гародніны.
Яго жонка, актрыса Шэрыл Хайнс, расказвала, што муж прачынаецца ў 6:30 раніцы, каб прыгатаваць сабе стэйк і з’есці порцыю квашанай капусты. Аднойчы ён нават папрасіў пакласці пакет з капустай у яе дарагую дызайнерскую сумачку перад выхадам у свет, але атрымаў катэгарычную адмову.
41‑гадовы Джэй Дзі Вэнс прыняў новыя правілы харчавання падчас мінулага Вялікага посту і прытрымліваецца іх дагэтуль. Як адзначае WSJ, карыстальнікі сацыяльных сетак ужо заўважылі, што віцэ-прэзідэнт стаў выглядаць значна больш стройным.
Яго тыповы рацыён складаецца з яек, квашанай капусты, салёных агуркоў, ягад (маліны і ажыны), а таксама ялавічыны ці ягняціны. Нават калі Вэнс замаўляе гамбургер, ён звычайна есць яго без булкі, дадаючы замест яе ферментаваную гародніну.
Да групы прыхільнікаў дыеты далучыліся таксама 64‑гадовы міністр гандлю Говард Лутнік і 54‑гадовы міністр транспарту Шон Дафі. Лутнік доўгі час пазбягаў чырвонага мяса, бо баяўся рызыкі анкалагічных захворванняў, але пасля размовы з Кенэдзі змяніў свае погляды. Ён таксама адмовіўся ад дыетычнай колы, замяніўшы яе халоднай чорнай кавай. Акрамя таго, паводле WSJ, Лутнік пачаў самастойна ферментаваць гародніну дома замест таго, каб купляць гатовую квашаную капусту.
Яшчэ адным паслядоўнікам О’Мары стаў былы спікер Палаты прадстаўнікоў Кевін Макарці. Ён успамінаў, што звярнуў увагу на незвычайна добры выгляд скуры Шона Дафі, пасля чаго той параіў яму звярнуцца да спецыяліста. Макарці ўспамінае, што доктар назваў яго стан «найгоршым выпадкам» у сваёй практыцы, але запэўніў у вялікім патэнцыяле. У выніку Макарці ўжо страціў больш за 10 сантыметраў у таліі.
Паслугі доктара О’Мары каштуюць нятанна. Згодна з інфармацыяй на яго сайце, базавыя праграмы «аптымізацыі здароўя» пачынаюцца ад 8 тысяч долараў, а персанальная кансультацыя абыдзецца ў 18 тысяч.
За гэтыя грошы доктар можа нават суправаджаць кліента ў паходзе па крамах, навучаючы выбіраць карысныя прадукты. Напрыклад, ён раіць браць ферментаваную гародніну з глыбіні паліц халадзільніка, куды не трапляе святло, здольнае разбурыць жывыя мікраарганізмы.
Сам Дональд Трамп пакуль застаецца ў баку ад гэтага аздараўленчага руху. Як піша WSJ, прэзідэнт ЗША па-ранейшаму аддае перавагу піцы, бульбе фры, дыетычнай коле і добра прасмажаным стэйкам з кетчупам.
Тым не менш уплыў «капустнай дыеты» ўжо выйшаў за межы прыватных захапленняў. Як адзначае аўтар, у новых дзяржаўных дыетычных рэкамендацыях, прадстаўленых Робертам Кенэдзі-малодшым і міністрам сельскай гаспадаркі Брук Ролінс летась, упершыню з'явілася афіцыйная рэкамендацыя ўжываць ферментаваныя прадукты, у тым ліку квашаную капусту.
Каментары
Хто там бліжэй да Трампа? падкажыце яму, што ў "Літоўскай гаспадыні" ёсьць цудоўны рэцэпт !