U noč na 22 červienia na mieteastancyi ŭ Breście minimalnaja tempieratura pavietra nie apuskałasia nižej za +20 hradusaŭ, paviedamlaje telehram-kanał «Mietieovajb».
Trapičnaj nazyvajuć takuju noč, u jakuju tempieratura na praciahu ŭsiaho načnoha času zastajecca nie nižejšaj za +20 °C. Takoje nadvorje charakternaje najpierš dla trapičnych i subtrapičnych rehijonaŭ, ale ŭ apošnija hady ŭsio čaściej nazirajecca i ŭ krainach z umieranym klimatam.
Padčas takich načej arhanizm nie paśpiavaje dastatkova astudzicca paśla dzionnaj śpiakoty. Asabliva ciažka heta pieranosiać ludzi stałaha ŭzrostu, dzieci i tyja, chto maje sardečna-sasudzistyja zachvorvańni.
Dla Biełarusi trapičnyja nočy zastajucca davoli redkaj źjavaj. Letaś jany byli adznačanyja tolki ŭ lipieni, a sioleta pryjšli raniej.
Pavodle prahnozaŭ sinoptykaŭ, u najbližejšyja dni nadvorje zastaniecca ciopłym. Da kanca tydnia tempieratura budzie pastupova pavyšacca, a ŭ asobnych rajonach na paŭdniovym zachadzie krainy moža dasiahnuć +35 hradusaŭ. Na pačatku nastupnaha tydnia miescami čakajecca da +38 hradusaŭ, tamu trapičnyja nočy mohuć paŭtarycca.
Śpiecyjalisty rajać u pieryjady śpiakoty čaściej pravietryvać pamiaškańni, pić dastatkova vady i pa mahčymaści paźbiahać značnych fizičnych nahruzak u samyja haračyja hadziny dnia.
Kamientary