Jašče niekalki hadoŭ tamu drony byli zbrojaj śpiecyjalnych padraździaleńniaŭ. Ciapier Paŭdniovaja Kareja choča pieratvaryć ich va ŭniviersalny instrumient dla ŭsioj armii. Na takoje rašeńnie paŭpłyvali nie tolki dośvied vajny va Ukrainie, ale i skaračeńnie kolkaści vajskoŭcaŭ praz demahrafičny spad.
Paŭdniovaja Kareja abviaściła maštabnuju prahramu pieraŭzbrajeńnia armii. Jak paviedamlaje The Wall Street Journal, na praciahu troch hadoŭ vojska atrymaje kala 60 tysiač bieśpiłotnikaŭ, a ŭ pierśpiektyvie kiravać imi navučać usich vajskoŭcaŭ.
Ministr abarony An Hiu Bek (Ahn Gyu-back) nazvaŭ drony «faktaram, jaki źmianiaje praviły viadzieńnia vajny». Pavodle jaho słoŭ, dośvied bajavych dziejańniaŭ va Ukrainie i na Blizkim Uschodzie pakazaŭ, što bieśpiłotniki pavinny stać takim ža zvyčajnym elemientam uzbrajeńnia, jak strałkovaja zbroja.
Pa słovach ministra, novyja drony atrymajuć usie vidy ŭzbrojenych sił — suchaputnyja vojski, fłot, vajskova-pavietranyja siły i marskaja piachota.
Adnoj z hałoŭnych pryčyn takoj reformy ŭ Sieule nazyvajuć dziejańni Paŭnočnaj Karei. Pa źviestkach paŭdniovakarejskich uładaŭ, Pchieńjan nie tolki atrymaŭ ad Rasii technałohii vytvorčaści bieśpiłotnikaŭ, ale i nabyvaje praktyčny dośvied ich vykarystańnia dziakujučy ŭdziełu svaich vajskoŭcaŭ u vajnie suprać Ukrainy. Ukrainskaja raźviedka paviedamlała, što paŭnočnakarejskija padraździaleńni ŭžo asvoili raźviedvalnyja drony, a Kim Čen Yn rasparadziŭsia razharnuć masavuju vytvorčaść dronaŭ-kamikadze.
U adkaz paŭdniovakarejskaja armija płanuje ŭziać na ŭzbrajeńnie dalnabojnyja drony-kamikadze, padobnyja da tych, što ŭžo vykarystoŭvajucca Ukrainaj i Iranam. Da 2030 hoda jana taksama raźličvaje zakupić kala 20 tysiač niedarahich adnarazovych bajavych bieśpiłotnikaŭ.
Pry hetym Sieuł raźličvaje maksimalna abapiracca na ajčynnych vytvorcaŭ. Ułady chočuć, kab asnoŭnyja kamplektujučyja dla bieśpiłotnikaŭ vyrablalisia ŭ samoj Paŭdniovaj Karei, što dazvolić paźbiehnuć zaležnaści ad pastavak z Kitaja.
Jašče adnoj pryčynaj značnaj uvahi da bieśpiłotnikaŭ staŭ demahrafičny spad. Za apošnija šeść hadoŭ kolkaść dziejnych vajskoŭcaŭ u krainie skaraciłasia prykładna na 20% — da kala 450 tysiač čałaviek. Ułady raźličvajuć, što šyrokaje vykarystańnie bieśpiłotnych sistem dapamoža kampiensavać niedachop asabovaha składu.
Byłomu prezidentu Paŭdniovaj Karei dali 30 hadoŭ źniavoleńnia za pravakacyju suprać KNDR
Uvarvańnie Rasii va Ukrainu stała załatoj žyłaj nie tolki dla Biełarusi, ale i dla Paŭnočnaj Karei. Voś na čym jany nažyvajucca
Na paŭdniovakarejskim telebačańni pažartavali pra mahčymy šlub Mikałaja Łukašenki i dački Kim Čen Yna
Kim Čen Yn pasyłaje vojski na miažu z Paŭdniovaj Karejaj
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary