Byłomu prezidentu Paŭdniovaj Karei dali 30 hadoŭ źniavoleńnia za pravakacyju suprać KNDR

Pavodle vysnoŭ suda, u kastryčniku 2024 hoda Jun Sok Jol addaŭ zahad na zapusk paŭdniovakarejskich bieśpiłotnikaŭ u pavietranuju prastoru KNDR. Pa viersii abvinavačańnia, metaj hetaj apieracyi było spravakavać rezkuju reakcyju Pchieńjana, stvaryć napružanaść na Karejskim paŭvostravie i vykarystać jaje jak padstavu dla ŭviadzieńnia vajennaha stanovišča ŭ Paŭdniovaj Karei 3 śniežnia 2024 hoda.

Sud pryjšoŭ da vysnovy, što abvinavačanyja vykarystali prykryćcio vajennaj apieracyi nie dziela abarony krainy, a dla taho, kab štučna stvaryć kryzisnuju situacyju, jakaja mahła b apraŭdać uviadzieńnie nadzvyčajnaha režymu ŭnutry dziaržavy.

Były kiraŭnik dziaržavy byŭ pryznany vinavatym pa abvinavačańniach u supracoŭnictvie z voraham i złoŭžyvańni słužbovymi paŭnamoctvami. Prysud suda całkam supaŭ z patrabavańniem śpiecyjalnaha prakurora Čo Yn Soka.

Akramia Jun Sok Jola, pa hetaj spravie byli pakaranyja i inšyja byłyja vysokapastaŭlenyja čynoŭniki. Były ministr abarony Kim Jon Chion atrymaŭ 30 hadoŭ pazbaŭleńnia voli — heta navat bolš, čym prasiŭ prakuror, jaki patrabavaŭ 25 hadoŭ. Były kiraŭnik Kamandavańnia kontrraźviedki Ministerstva abarony Jo In Chion byŭ asudžany da 15 hadoŭ turmy, a były kiraŭnik Kamandavańnia apieracyj ź bieśpiłotnikami Kim Jon De atrymaŭ umoŭny termin: try hady pazbaŭleńnia voli ź piacihadovym vyprabavalnym pieryjadam.

Heta ŭžo nie pieršy sudovy prysud u dačynieńni da byłoha prezidenta. Raniej, u lutym 2026 hoda, sud pryznaŭ jaho vinavatym u arhanizacyi miaciažu ŭ suviazi sa sprobaj uvieści vajennaje stanovišča ŭ śniežni 2024 hoda i pryhavaryŭ da pažyćciovaha źniavoleńnia. Jun Sok Jol nie pahadziŭsia z hetym rašeńniem i padaŭ apielacyju.

Padziei, jakija pryviali da kryminalnaha pieraśledu byłoha kiraŭnika krainy, pačalisia paśla taho, jak 3 śniežnia 2024 hoda jon abviaściŭ vajennaje stanovišča. Adnak parłamient Paŭdniovaj Karei rascaniŭ hety krok jak niezakonny i abviaściŭ jamu impičmient. U krasaviku 2025 hoda Kanstytucyjny sud kančatkova pazbaviŭ Jun Sok Jola prezidenckich paŭnamoctvaŭ.

Paśla straty pasady suprać jaho pačałosia niekalki kryminalnych rasśledavańniaŭ. Akramia spraŭ ab miaciažy i vykarystańni bieśpiłotnikaŭ, jaho taksama abvinavačvajuć u złoŭžyvańni ŭładaj i sprobach pieraškodzić pracy parłamienta padčas uviadzieńnia vajennaha stanovišča. Častka hetych pracesaŭ jašče praciahvajecca.

• 0
• 0
• 0
• 0
• 0
• 0
• 0
• 0