U Indaniezii pieraviarnuŭsia pasažyrski parom z 243 pasažyrami na borcie: 130 čałaviek źnikli bieź viestak
U Javanskim mory zatanuŭ pasažyrski parom Virgo Transport 8, jaki vykonvaŭ rejs z vostrava Java na Kalimantan. U vyniku incydentu, spravakavanaha štarmavym nadvorjem, zahinuli jak minimum 6 čałaviek, jašče kala 130 pasažyraŭ dahetul nie znojdzienyja.
Zhodna z infarmacyjaj ahienctva Reuters, suviaź z sudnam Virgo Transport 8 pierarvałasia ŭ niadzielu ranicaj. Parom nakiroŭvaŭsia z horada Surabaja ŭ Bandžarmasin. Pieršyja sihnały ab pierakulvańni pastupili ad ekipaža viertalota, jaki pralataŭ mima. Pavodle apošnich danych, na borcie znachodzilisia 213 pasažyraŭ i 30 členaŭ ekipaža.
Brytanskaje BBC paviedamlaje, što ŭ pošukava-ratavalnaj apieracyi zadziejničany 280 čałaviek, vykarystoŭvajucca karabli i avijacyja. Pa stanie na niadzielu ratavalniki znajšli cieły 6 zahinułych i zdoleli padniać z vady 107 žyvych čałaviek. Los jašče 130 čałaviek zastajecca nieviadomym. Sudna zatanuła prykładna za 148 kiłamietraŭ ad porta pryznačeńnia.
Svajaki pasažyraŭ sabralisia ŭ porcie Bandžarmasina. Siarod vyratavanych akazaŭsia kiroŭca hruzavika Achmad Supandzi, jakoha padniało na bort inšaje sudna — MV Haida. Inšy pasažyr, Rynta Arachab, raskazaŭ žurnalistam, što paśla pieravarotu paroma zdoleŭ uchapicca za parenčy i pierabracca na bolš vysoki punkt korpusa, čakajučy dapamohi na vadzie.
Adnak dla mnohich siemjaŭ situacyja zastajecca niavyznačanaj. Miascovaja žycharka Ruśmiłavaci čakaje navin pra 8 svajakoŭ, jakija viartalisia z pajezdki. Niezadoŭha da straty suviazi adzin ź ich apublikavaŭ status u mesendžary sa słovami pra pałochajuča mocnyja chvali. U porcie Surabai taksama sabralisia svajaki ekipaža. Siarod źnikłych ličycca Ścivi Manuchua, jaki pracavaŭ na paromie kłavišnikam i zabaŭlaŭ pasažyraŭ.
Trahiedyi na marskim transparcie źjaŭlajucca sistemnaj prablemaj dla Indaniezii, jakaja składajecca z bolš čym 17 tysiač astravoŭ i krytyčna zaležyć ad tannych paromnych pieravozak. Tolki pavodle aficyjnaj uradavaj statystyki, z 2020 pa 2026 hod u krainie zafiksavana 111 karablekrušeńniaŭ.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary