Kolki rys našaha charaktaru abumoŭleny hienami? Novaje daśledavańnie kaža, što nie tak i šmat

Navukoŭcy daŭno viedajuć, što pamiž hienami i asablivaściami charaktaru isnuje suviaź. Ale vyśvietlić, nakolki vialiki ŭkład spadčynnaści i jakija mienavita hienietyčnyja varyjanty majuć značeńnie, było niaprosta.

Jak piša IFLScience, aŭtary novaha daśledavańnia praanalizavali hienietyčnyja danyja 46 roznych hrup ludziej. Daśledčyki šukali suviazi pamiž asobnymi hienietyčnymi varyjantami i rysami asoby z tak zvanaj «Vialikaj piaciorki» — ekstraviersijaj, dobrazyčlivaściu, dobrasumlennaściu, nieŭratyzmam i adkrytaściu novamu dośviedu.

Asobna navukoŭcy vyvučyli hienomy 50 725 blizkich svajakoŭ. Heta dapamahło lepš adździalić upłyŭ spadčynnaści ad upłyvu ahulnaha asiarodździa i vychavańnia.

Ahułam navukoŭcy vyjavili 1260 asnoŭnych hienietyčnych varyjantaŭ, źviazanych z rysami asoby, 824 ź jakich raniej nikoli nie identyfikavalisia.

Papiarednija vysnovy śviedčać, što sukupna hetyja varyjanty kantralujuć ad 5% da 9% indyvidualnaha spałučeńnia rys asoby, choć aŭtary miarkujuć, što hety pakazčyk moža dasiahać i 13%, kali brać pad uvahu tolki samyja nadziejnyja paramietry vymiareńnia.

Niahledziačy na atrymanyja vyniki, aŭtary nastojvajuć na tym, što navat niepasredny hienietyčny ŭpłyŭ nie vyznačaje asobu. Na toje, jakim stanovicca čałaviek, upłyvaje mnostva inšych abstavinaŭ ad vychavańnia i sacyjalnaha asiarodździa da žyćciovaha dośviedu. Tym nie mienš, najaŭnaść peŭnych hienietyčnych varyjantaŭ sapraŭdy pavialičvaje imaviernaść taho, što ŭ čałavieka macniej prajavicca taja ci inšaja rysa. A ŭžo jana moža być źviazanaja z peŭnymi pavodzinami i žyćciovymi rašeńniami.

Naprykład, ludzi z vysokaj hienietyčnaj schilnaściu da nieŭratyzmu i nizkaj da dobrazyčlivaści statystyčna čaściej uciakali z domu, atrymlivali adchileńnie ad zaniatkaŭ u škole i pahražali inšym chałodnaj abo ahniastrelnaj zbrojaj.

U toj ža čas hienietyčnyja varyjanty, źviazanyja z bolš vysokaj dobrasumlennaściu, karelavali ź mienšaj imaviernaściu ŭžyvańnia narkotykaŭ.

Hienietyčnyja schilnaści mohuć być źviazanyja i z tym, jak čałavieka ŭsprymajuć navakolnyja. Ludziej ź mienšaj schilnaściu da nieŭratyzmu i bolšaj da ekstraviersii, dobrazyčlivaści i adkrytaści novamu dośviedu čaściej aceńvali jak ludziej z pryvabnym charaktaram.

Ale pavodzinami hetyja suviazi nie abmiažoŭvajucca. Daśledčyki vyjavili, što hienietyčnyja asablivaści mohuć być źviazanyja navat z tym, u jakoj miascovaści čałaviek žyvie ŭ siarednim uzroście.

Tak, hienietyčny profil, źviazany z adkrytaściu novamu dośviedu, pavialičvaŭ imaviernaść taho, što da 50 hadoŭ čałaviek budzie žyć u kasmapalityčnym dziełavym rajonie. A hieny, źviazanyja z dobrasumlennaściu, pavialičvali šancy čałavieka pierabracca žyć u pryharad paśla taho, jak jon dasiahnie hetaha ŭzrostu.

• 2
• 0
• 0
• 0
• 0
• 1
• 0
• 0