Znakamituju «sukienku pomsty» pryncesy Dyjany vystavili na aŭkcyjon

Na aŭkcyjon vystaŭlena sukienka, u jakoj pryncesa Dyjana źjaviłasia na viečarynie ŭ Łondanie praź niekalki hadzin paśla vychadu ŭ efir dakumientalnaha filma, u jakim tahačasny prync Čarlz pryznaŭsia ŭ niaviernaści padčas ich šlubu.

Jaje efiektnaje źjaŭleńnie ŭ 1994 hodzie ŭ halerei Serpentine ŭ Łondanie ŭ čornaj šaŭkovaj viačerniaj sukiency, pašytaj na zakaz dyzajnierkaj Kryścinaj Stambalan, stała kultavym momantam u pop-kultury. ŚMI achryścili hety ŭbor «sukienkaj pomsty».

Pavialičyć

Aŭkcyjonny dom Sotheby's čakaje, što sukienka budzie pradadziena za sumu da 300 tysiač dołaraŭ (220 tysiač funtaŭ sterlinhaŭ), kali 9 śniežnia jana budzie vystaŭlena na tarhi.

U pres-relizie Sotheby's adznačajecca, što heta pieršaje źjaŭleńnie sukienki na aŭkcyjonie z 1997 hoda, kali niabožčyca pryncesa pradała 79 svaich sukienak, kab sabrać srodki na dabračynnaść.

Morhan Chalimi, kiraŭnica adździeła mody Sotheby's, zajaviła, što pryncesa Dyjana «instynktyŭna razumieła», što moda moža być samastojnaj movaj.

«Pryncesa Dyjana pieratvaryła hetuju sukienku ŭ adno z samych mocnych pasłańniaŭ u svaim žyćci — i adbyłosia heta ŭ adzin z najbolš abmiarkoŭvajemych i emacyjna napružanych pieryjadaŭ jaje žyćcia», — skazała Chalimi.

«Jana apynułasia ŭ situacyi, kali jaje historyju šmat u čym raspaviadali za jaje. Ale svaim vybaram uboru jana ŭziała pad kantrol toje, jakoj jaje historyju ŭbačyć publika», — dadała pradstaŭnica aŭkcyjonnaha doma Sotheby's.

Pavodle infarmacyi aŭkcyjonnaha doma Sotheby's, Hanna Charvi, jakaja ŭ toj čas była jaje stylistkaj, raspaviała, što Dyjana «chacieła vyhladać na miljon dalaraŭ».

Pierad dabračynnaj viačeraj pryncesa ŭ apošniuju chvilinu źmianiła ŭbor i vybrała viačerniuju sukienku biez bretelek ad hreckaj dyzajnierki Kryściny Stambalan, dapoŭniŭšy jaje karaleŭskimi ŭpryhožańniami, čornym kłatčam i čornymi tuflami na abcasach.

Retra-aŭtamabil Jaguar XJ40, na jakim Dyjana pryjechała na mierapryjemstva, byŭ pradadzieny na aŭkcyjonie ŭ pačatku hetaha hoda za 66 250 funtaŭ sterlinhaŭ (90 tysiač dalaraŭ).

Čakajecca, što «sukienka pomsty» sydzie z małatka za značna bolšuju sumu.

Kali heta adbudziecca, to heta budzie nie pieršy vypadak, kali pradmiet z harderoba pryncesy pradajecca za značnuju sumu.

Švedar pryncesy Dyjany z vyjavaj čornaj aviečki siarod radoŭ biełych byŭ pradadzieny za 920 tysiač funtaŭ sterlinhaŭ (1,24 miljona dalaraŭ) na aŭkcyjonie Sotheby's u Ńju-Jorku ŭ 2023 hodzie.

• 3
• 0
• 0
• 0
• 0
• 0
• 0
• 2