Erdahan zaklikaŭ pazbavić pastajannych členaŭ Rady Biaśpieki AAN prava vieta. I ŭvohule skasavać pastajannaje členstva

Erdahan prapanuje pazbavić krainy — pastajannyja členy Rady Biaśpieki — prava vieta. Na jaho dumku, asobnyja dziaržavy nie pavinny mieć mahčymaści błakavać rašeńni, jakija padtrymlivaje bolšaść krain śvietu.

Turecki prezident taksama vystupaje za poŭnuju admienu pastajannaha členstva ŭ Radzie Biaśpieki. Jon ličyć, što ŭsich členaŭ Rady varta abirać Hienieralnaj asamblejaj na peŭny termin i na ratacyjnaj asnovie. Kali dziaržava zachoča znoŭ atrymać miesca ŭ Radzie, jana pavinna budzie znoŭ atrymać padtrymku bolšaści na vybarach. Adnačasova Erdahan prapanuje ŭzmacnić paŭnamoctvy Hienieralnaj asamblei i zrabić Radu Biaśpieki bolš pradstaŭničaj i padspravazdačnaj joj.

Pastajannymi členami Rady Biaśpieki z pravam vieta ciapier źjaŭlajucca Vialikabrytanija, ZŠA, Kitaj, Rasija i Francyja. Raniej hetyja krainy byli adzinymi dziaržavami, jakija vałodali jadziernaj zbrojaj, ale ciapier jadziernych dziaržaŭ u śviecie dzieviać. Erdahan ličyć, što pry vyrašeńni hłabalnych i rehijanalnych prablem nieabchodna bolš aktyŭna vykarystoŭvać mahčymaści i vopyt roznych rehijonaŭ śvietu. U hetym kantekście jon paŭtaryŭ turecki zaklik «Śviet bolšy za piaciorku», majučy na ŭvazie piać pastajannych členaŭ Rady Biaśpieki.

Dva hady tamu Hienieralnaja asambleja AAN, niahledziačy na supraciŭleńnie Rasii, uchvaliła płan refarmavańnia arhanizacyi. Jon praduhledžvaŭ rearhanizacyju Rady Biaśpieki i mahčymaść abmiežavańnia prava vieta pastajannych členaŭ, a taksama ŭzmacnieńnie roli mižnarodnaha prava ŭ pytańniach zachavańnia miru, praduchileńnia vojnaŭ i adkaznaści za ich raźviazvańnie. Adnak z taho času istotnych źmienaŭ u sistemie kiravańnia AAN nie adbyłosia.

Erdahan źviazvaje nieabchodnaść reformaŭ z padziejami apošnich hadoŭ — pandemijaj, enierhietyčnymi kryzisami, parušeńniami łancužkoŭ pastavak i rehijanalnymi kanfliktami. Na jaho dumku, hetyja padziei pakazali, što sistema, u jakoj vyrašeńnie hłabalnych kryzisaŭ zaležyć ad niekalkich stalic, užo nie adpaviadaje sučasnamu śvietu.

Jon zajaviŭ, što niemahčyma stvaryć mižnarodny paradak budučyni, zachoŭvajučy ijerarchiju minułaha. Pa słovach prezidenta Turcyi, padziei apošniaj čverci stahodździa pakazali, što suadnosiny sił i mižnarodny paradak nie źjaŭlajucca niaźmiennymi. Sistema, jakaja pavinna była zabiaśpiečyć čałaviectvu mir, stabilnaść i ŭsieahulny dabrabyt, nie zdoleła praduchilić novyja vojny, skaracić niaroŭnaść i naležnym čynam adreahavać na źmieny ŭ suśvietnym bałansie sił.

Prava vieta pastajannyja členy Rady Biaśpieki vykarystoŭvali dla błakavańnia rašeńniaŭ, jakija nie adpaviadali ich intaresam. Naprykład, u krasaviku Rasija i Kitaj zabłakavali rezalucyju Bachrejna ab zabieśpiačeńni sudnachodstva praz Armuzski praliŭ. Z 15 členaŭ Rady suprać prahałasavali tolki Rasija i Kitaj, a Pakistan i Kałumbija ŭstrymalisia.

U sakaviku 2024 hoda Rasija taksama zabłakavała praciah pracy kamisii AAN, jakaja kantralavała jadziernuju i rakietnuju prahramy Paŭnočnaj Karei. Bolšaść členaŭ Rady padtrymała praciah jaje pracy, a Kitaj ustrymaŭsia, ale rasijskaha vieta było dastatkova, kab pracedura nie adbyłasia. U vyniku hrupa, jakaja dziejničała 15 hadoŭ, spyniła pracu.

Za źmianieńnie sistemy Rady Biaśpieki raniej vystupaŭ i prezident Finlandyi Alaksandr Stub. Dva hady tamu jon zaklikaŭ pazbavić asobnuju dziaržavu mahčymaści błakavać rašeńni Rady, pašyryć skład apošniaj, a taksama razhladać mahčymaść prypynieńnia členstva krainy, jakaja viadzie, pavodle jaho farmuloŭki, «niezakonnuju vajnu». U jakaści prykładu Stub pryvodziŭ rasijskaje ŭvarvańnie va Ukrainu.

• 8
• 0
• 1
• 0
• 0
• 0
• 0
• 0