U čym pazytyŭ Łukašenki dla Biełarusi?

Jak budzie raspaŭsiudžvacca «Naša Niva» ŭ 2007 hodzie? Dakul apazycyja budzie hryźcisia? U čym byli pamyłki «Našaj Nivy»? Na hetyja dy inšyja pytańni, zadadzienyja padčas internet-kanferencyi radyjo «Svaboda», adkazvaje hałoŭny redaktar «Našaj Nivy» Andrej Dyńko.

Jak budzie raspaŭsiudžvacca Naša Niva ŭ nastupnym, 2007-ym hodzie?

Jana budzie ź vialikaj dolaj peŭnaści vychodzić u Internecie. Ale niekatoryja inšyja sposaby mahčymyja. Kali ŭłady razhromiać «Našu Nivu», heta budzie z časam traktavacca jak złačynstva suprać biełaruskaj kultury.

Andriej, Khachu Wam padziakawac za Wash tekst y Niwie jakogo sens shto zaraz usie bielarusy salidarny z Paliakami u Harodni, jakije doluchilisia do demokratychnogo ruchu i za to nie moguc pri getym rezhimie normalna razwiwat swojej diejnasci jak nacionalne mienshynstwo. Wash tekst byl drukowany w polskaj presie i adbilsja wialikim eham. Geta jeshche bolsh u Polshchy zrabilo nashu krainu salidarnuju z Wami. Wielmi Wam u wogule udziachny za Washu pracu. Trymajtie sia , Zhywie Bielarus ! Mariusz Maszkiewicz

Spadaru ambasadar, a my nie zabudziemsia, što Vy byli z nami na Akreścina.

Do kakih por budet idti raskrutka skandalista i demagoga kasulina?On sanimaetsa tolko raskolom oppositsii,dumaet ne o narode ,a osebe.On egoist.Vmesto raboti v komande on kak i lebedko prodvigaet sebia v lideri.On takge davil v universitete vse belaruskoe.Kasulin - eto drugoi lukashenko.Do kakih por vi dumaete oppositsia budet gristsa megdu soboi?Ne pora li tem urodam kotorie vigoniaut ludei oppositsionerov s raboti,lishaiut sredstv suschestvovania davat otpor poniatnimi dlia ih metodami.Eti moralnie urodi ponimaiut tolko silu i strah.Esli mogete otvete tolko bes obshthshih fraz.

Apazycyja budzie hryźcisia da taho momantu, pakul Vy budziecie napadać na Kazulina. Pakul čałaviek u turmie, haładaje – tolki salidarnaść. Usie palityčnyja razychodžańni chaj zastanucca na paśla.

Davać adpor paniatnymi metadami – tolki tak. Metadam upartaje viernaści našym zakonam i etycy, metadam ŭžyvańnia biełaruskaj movy i kultury ŭ kožnaj mahčymaj sytuacyi, metadam maralnaj i materyjalnaj padtrymki dziejačoŭ supracivu, metadam metadyčnaha i bieskaryślivaha finansavańnia ŭsialakich krynicaŭ alternatyŭnaje infarmacyi. Mienavita hetych metadaŭ jany bajacca jak vaŭki ahniu. Nasilla – jany nie bajacca. «Užyvańnie nasilla nie racyjanalnaje», jak napisaŭ Rudkoŭski.

Andrej, ci nie zdajecca vam, što pry resursach, ubuchanych u NN, i jaje štohadovym biudžecie, paru tysiač papiarovych asobnikaŭ i viała abnoŭleny Vebsajt - heta zanadta mały vynik? Viadoma, inšyja nie robiać i taho, ale ci nie čas być bolš vynikovym?

NN i pry Ŭłasavu, i pry Dubaŭcu, i pry mnie rabiłasia minimalnymi resursami. Dumaju, nivodzin rasiejskamoŭny ŚMI pry takich resursach nie praisnavaŭ by j hodu. Jaje trymaje nacyjanalnaja ideja. Efekt NN, na paru z ARCHE i ŭ kompleksie ź isnymi Internet-ŚMI, ja aceńvaju vielmi vysoka. Ź inšaha boku, ź nieciarpieńniem čakaju ad moładzi, ad pakaleńnia 20-25-hadovych, stvareńnia zusim novych medyja-prajektaŭ. Siarod usieahulnaha prystasavalnictva ciapier sam Boh kazaŭ rabić bieskampramisnaje.

Naša niva siońnia źjaŭlajecca adnoj z' niešmatlikich krynic niezaležnaj in'farmacyi ŭ peryjadyčnym druku našaj krainy, tamu Andrej, dziakuj za pracu, ščyra vinšuju Vas i nas sa 100-ym jubilejam hazety. Ale troški pra inšaje. U apošni čas NN stanovicca pradkazalnaj. Tak by mović «saŭbiełka» z supraćlehłym vektaram. Prabačcie. Ale ŭsio ž...

...Biezumoŭna, jakaść zaležyć ad finansaŭ, ale chaciełasia b pažadać, kab i ŭ hetych umovach, na rubiažoch druhoha stahod́dzia svajho isnavańnia NN nie hublała svaju marku, svoj brend, kab jana zaŭsiody była śviežaj, u tym planie, što padavała by śviežyja pohlady, fakty nia tolki ŭ kantekście ich niehatyŭnaha ŭspryńniaćcia, ale ich abjektyŭnaha asensavańnia, uhruntavanaha na ideałach infarmacyjnaha pluralizmu i praŭdy. Baranicie čyściniu hazety i vydalajcie pustazielle ź nivy, kab NN raskvitała, a palityčnaja krytyka (i ŭvohule krytyka) nie padmianiałasia nehatyŭnym śvietaŭsprymańniem kankretnych aŭtaraŭ.

Nakont nehatyvizmu z vami zhodny. Heta nacyjanalnaja chvaroba biełarusaŭ.

Nakont pradkazalnaści – nie. Heta zdarovaja pradkazalnaść, vynik realizmu i pryncypovaści.

začiem vy vystupili v zaŝitu polakov? oni vied́ Biełarusov za ludiej nie sčitajut

Vy ŭ svaim usprymańni Polščy zastalisia ŭ daHiedrojcavych časach. Ciapierašniaja Polšča heta ŭžo nia taja, jakaja była ŭ 30-ja hady.

Što vy na heta skažacie? (Babkoŭ: ) «Prahladaju NN pryblizna 5-7 chvilinaŭ i zvyčajna bolš nie viartajusia. I tak užo hod. Paradaksalna, ale zamiest taho, kab skardzicca što «sapsavali hazetu», ja dumaju što heta i jość kryter jaje paśpiachovaści. «NN» narešcie stała sapraŭdnaj hazetaj -- čymści što prahladaješ 5 chvilin i vykidaješ u śmietniu biez škadavańnia». (Kalada: ) «Mnie «Naša Niva» bolš padabałasia ŭ tym farmacie, u jakim jana vychodziła na pačatku 1990-ch hadoŭ – u formie litaraturnaha almanachu. A kali jana pieratvaryłasia ŭ hazetu z navinami… Mnie nie pryncypova ŭ jakoj movie ja pačuju naviny. Mnie hałoŭnaje ich pačuć, i abjektyŭna. Nia toje, što nie padzialaju punkt hledžańnia «Našaj Nivy», ale joj nie staje abjektyŭnaści».

Jak krytyk, ja b raiŭ biełaruskim litarataram bolš cikavicca sapraŭdnymi hazetami j navinami.

Andrej! Ź jubilejem NN! Dziakuj Vam za vašu pracu. Nazavicie 20 idealnych dla Vas hierojaŭ z historyi Biełarusi roznych časoŭ. Možacie 30. Čamu jany takija dla Vas? Z pavahaj

Moj vybar budzie dosyć vypadkovy praz toje, što ja paviarchoŭna viedaju biełaruskuju historyju. Ź dziaržaŭnych dziejačoŭ Vitaŭt Vialiki – za arhanizacyju Hrunvaldu, za dobraje administravańnie, za prytułak, dadzieny tataram i žydam, Leŭ Sapieha – jon daŭ biełarusam zakon, karaleva Bona – budaŭnica (para nam vulicy imionami hetych ludziej nazyvać). Ź intelektuałaŭ Francišak Skaryna – za praduktyŭnaść i śvietliniu, za toje, što «adpłaciŭ narodu, čym moc jaho mahła». Ivan Łuckievič, Anton Łuckievič, Vacłaŭ Ivanoŭski – jakija zdoleli z nula, pry minimumie resursaŭ, chutka i efektyŭna vybudavać infrastrukturu nacyjanalnaha ruchu. Ałaiza Paškievič -- samaachviarnica, Aleś Harun, Łarysa Hienijuš, Maksim Tank, Prytycki, Filistovič – roznyja hieroi roznych partyj adnaje nacyjanalna-vyzvolnaje baraćby. Mialeci Smatrycki, Francišak Bahuševič, Bryl, Karpiuk, Bykaŭ, Dziarhaj, Valancin Taras – etyčnyja nastaŭniki ŭ sytuacyjach vybaru. Mašeraŭ, Minaj Šmyroŭ i padobnyja da ich hieroi Druhoj suśvietnaj. Bykaŭ jašče raz – jak prykład pavodzinaŭ u časie vajny. Šałajka, Astrejka, Sieviaryniec, Daškievič, Fińkievič, Branickaja, Sasim dla mianie nia mienšyja hieroi – jany pajšli ŭ turmu, achviarujučy svajoj maładościu, kab tolki padarvać lehitymnaść režymu, jaki sprabuje navieki abiaskrović biełaruskuju kulturu. Mnie ichny podźvih padajecca tym bolšy, što jany zrabili hety vybar u demabilizujučaj sytuacyi spažyvieckaha hramadztva. Miron i Kaśpiarovič dla mianie taksama hieroi, viernyja ściahu svajoj nacyi.

Pryvitanne, Andrej! NN - hazeta, jakaja dapamhaje smat kamu na adlehlasci ad siabrou adcuvac jich prysutnasc. Velmi vysoka acenivaju menavita jadnajucuju rolu NN, prynamsi dlia tych z nas, chto zyve pa-za mezami Belarusi. Sto zdarylasia z hazetaj aposnim casam - jana pradkazalnaja, kudy padzelisia sapraudnyja asoby? Spazijusia, sto maja zauvaha ne pakryudzic, ale NN - hazeta nia tolky dlia padletkau. Cakaju analityku. Dziakuj, z najlepsymi pazadanniami, Andrej.

Pierastali pisać u hazetu Dubaviec, Sahanovič, Hlobus, Adamovič Słavamir, Kviatkoŭski, Babkova Volha, Antanian, Karatkievič Volha, Bušlakoŭ, Paźniakoŭ. U kožnaha ź ich pryčyna svaja. Chtości razyšoŭsia z nami idealahična, chtości prosta pierastaŭ pisać, chtości ŭnikaje palityki. Pačali pisać u hazetu za apošnija hady Uškin, Kłaskoŭski, Žukoŭski, Silicki, Rudkoŭski, Šnip z Sabačymi historyjami, Aleś Bieły, Bohdan, Pavač, Fiaduta, Rasinski, Pankaviec, Piečanko, usich nie pieraličyš, mo kaho j zabyŭsia, viarnulisia Taras i vo Dziarnovič – aŭtary roznyja, kožny z analityčnym hołasam. Pryjšli dva hienijalnyja fatohrafy – Daraškievič i Lankievič. Narešcie, u hazecie sabraŭsia ŭnikalny arkiestar techničnych supracoŭnikaŭ – Bakšanskaja, Lava, Maciaš, Maładziašyn, Kandracienka. Navat u nervovaj abstanoŭcy hetaha hodu, kali ŭłada realizuje svajo «kančatkovaje rašeńnie» pa niezaležnaj presie, kali ŭvieś čas prychodziłasia iści na balučyja achviary dziela zachavańnia hałoŭnaha, my nie raściahnuli instrumenty, a zastalisia arkiestram, i tamu praciahvajem svaju misiju. U hramadztvie, što paddałosia rusifikacyi, my zachavali biełaruskuju dušu hazety. I pry hetym hazeta nia stała dla tych, kamu za tryccać – tolki heta było b niepryjemna (choć navat heta nie było b fatalna ŭ histaryčnaj perspektyvie).

Dyk čamu sychodzicie? Ciažka ŭjavić hazetu biaz vas!!!

Sychodžu z pasady hałoŭnaha redaktara, ale zastajusia ŭ «NN» na inšych funkcyjach.

Sychodžu, bo ludzi na pasadach musiać mianiacca, kab kroŭ mianiałasia. Ja šeść stachanaŭskich hadoŭ adbyŭ!

Zastajusia, bo «Naša Niva» zdajecca mnie spravaju majho žyćcia.

Vy vsie vriemia diełajetie akcient na biełorusskom jazykie, choť nikto nikoho tiepiejeŕ za jazyk nie prieśledujet, eto tupikovyj puť. Jeśli by oppozicija vmiesto jazyka bolšie hovoriła ob ekonomikie, ona by užie u vłasti była. Jevhienij

Ja vam raskažu, Jaŭhienie, novuju infarmacyju, jakuju my majem. Pravadnicam ciahnikoŭ, jakija iduć za miažu, dadzienaje zadańnie prykmiačać asobaŭ, jakija razmaŭlajuć pa-biełarusku, i syhnalizavać pra ich pamiežnikam. Ja schilny daviarać hetaj infarmacyi.

Va ŭradzie, parlamencie i prezydenckaj administracyi niama nivodnaha biełaruskamoŭnaha. I heta roŭnaść? Čałavieku, jaki addaje biełaruskaj kultury pieravahu pierad savieckaj, niemahčyma trapić u aficerski korpus. Našy specsłužby praciahvajuć vyhladać jak kalanijalnyja instytuty, stvoranyja dla lepšaha kantrolu za akupavanaj terytoryjaj z pryciahnieńniem kadraŭ ź liku asymilavanaha nasielnictva. Maje dzieci nia majuć mahčymaści hladzieć multyki na rodnaj movie, hartać aŭtamabilnyja časopisy na rodnaj movie i nia majuć šancaŭ trapić na dziaržaŭnuju słužbu, kali buduć zachoŭvać viernaść rodnaj movie, jak i ja nia moh. I heta roŭnaść? U takoj sytuacyi śviadomyja biełarusy supraciŭlajucca jak mohuć i buduć supraciŭlacca jak mohuć.

Kali apazycyja budzie havaryć pra ekanomiku tałkova i ź luboŭju da ludziej, jaje na luboj movie zrazumiejuć. Biełarusy lubiać svaju movu.

Andrej, chym vy najbolsh hanarcesia sa zroblenaha u NN? Volha

Vybudovaj sajtu, pavieličeńniem abjomu hazety, samaraspaŭsiudam.

Sp. Dynko, vasha NN kali nebudz pryznaje svaje pamylky -- kshtaltu adkryccia sviatkavannia 100 hoddzia imem Fiaduty, uvohule -- mahli b vy sami nazvac nekalki prykladau takih pamylak dlia pachatku? Stanislau Volchak

My adkryvali śviatkavańnie padziejami, jakija nam ładzili, i nie admaŭlali nikomu. Vyjšła tak, što pieršymi nam zładzili viečaryny Niamiecka-biełaruskaje tavarystva ŭ Berlinie, Fiaduta z nahody vychadu jahonaj knihi ŭ Miensku i padpisčyki z Naddźvińnia ŭ Połacku. Zładzili b Vy – pryjechali b da Vas.

Fiaduta miž inšym – aŭtar hazety z takimi ž pravami, jak i ŭsie astatnija aŭtary. Kali b Vy byli aŭtaram, i Vy b mieli takija ž pravy na «NN».

Z pamyłak:

pa-pieršaje, paśla prychodu ŭ redaktary ja zadoŭha staraŭsia trymacca staroj, dubaŭcoŭskaj kancepcyi hazety, kapijavaŭ jaje, tady jak stanovišča krainy j najaŭnyja kadravyja dy materyjalnyja resursy vymahali novaje kancepcyi. Heta było maładoje vino ŭ staryja miachi. U vyniku niekalki hadoŭ hazeta taptałasia na miescy, była niacelnaju i niepaśladoŭnaju.

Pa-druhoje, byli maralnyja pamyłki. Naprykład, nieetyčna było drukavać u 2001 hodzie Paźniakovy słovy na adras źnikłaha Hančara, što jon skora vyskačyć, jak čort z tabakierki. Byŭ biespadstaŭny durny naskok na hienerała Piskarova. Byli biestaktoŭnyja špilki dobrych niŭskich aŭtaraŭ na ŭdavu kampazytara Palivody i lidera hiej-supolnaści Tarleckaha. Mnie nie chapiła pilnaści, kab vytłumačyć tym dobrym aŭtaram, što hetaha drukavać nia varta.

Takich niačujnaściaŭ było bolej.

Bujnych palityčnych pamyłak u našych acenkach i prahnozach ja nia baču. «NN» i «ARCHE» pieršymi zaŭvažyli i ŭličyli ekanamičny rost 2001-2006-ha, liberalizacyju 2002-ha, skančeńnie intehracyjnaha prajektu z Rasiejaj, abjadnańnie apazycyi, nie pamylilisia ŭ acenkach taho, jakija z kandydataŭ u prezydenty najmacniejšyja, naźbirajuć najbolš podpisaŭ i h.d., i, zdajecca, biespamyłkova pradbačyli, jak hetyja ŭsie fakty j tendencyi adabjucca ŭ doŭhaterminovym planie na biełaruskaj kultury ŭ šyrokim sensie hetaha słova. Mo palityčnyja praliki prosta vyjaŭlajucca z daŭžejšaj perspektyvy.

Pra ŭnutryredakcyjnyja pamyłki havaryć nia budu.

Dobry dzień. Andreju, skažycie, kali łaska, jak vy ŭsprymajecie zaŭvahi niekatorych intlektuałaŭ ab tym, što «Naša Niva» ŭ časie vašaha redaktarstva stała «papsova-hlamurnaj» dy zaidealahizavanaj i bahata straciła taho, čym była za Dubaŭcom. Dziakuj!

Pra papsova-hlamurnaść – heta pustasłoŭje, tasavanńnie słovaŭ biaz dumki pra ichny sens i ŭpłyŭ. Kali majecca na ŭvazie, što «Naša Niva» spuściłasia ź niabiosaŭ na ziamlu, to my zrabili pravilna.

Spadar Dyńko, vy, pavodle samaadčuvańnia, biełaruski ci ŭkrainski litaratar? Ała

Viadoma ž, biełaruski.

Dobry dzien, spadar Andrej. Dzie mozna praczytac Vasz akrescinski dzionnik chacia b na adnoj z szacsi movau? Ludzi palityki baczac adziny dyjaloh z gramadzianami - heta vybary, a ludzi tvorczasci szukajuc hetaha dyjalohu praz svoj talent. M. Riabczuk jadnaje Dvie Ukrainy (Uschodnuju i Zachodniu), a jak abjadnac nam dzvie Belarusi(bielaruskamounuju, prazachodniuju z rasiejskamounaj pra za Belarus)? Dziakuj. Nasta, Bierascie

Pašukajcie pošukam na nn.by abo charter97.org. Ja b nie dramatyzavaŭ nastupstvaŭ raskołu pamiž biełarusami j savieckimi ludźmi. Baraćba supiarečnaściaŭ pryvodzić da ruchu napierad. Hałoŭnaje, kab biełarusy zaciata trymalisia svajho.

Sp.Andrej, vinšuju «Našu Nivu» sa stohadovym jubilejem, žadaju joj zastavacca zaŭsiody takoj, jakoj jana jość siońnia. Nie mahli b Vy ŭ niekalkich słovach raskazać pra žurnalistaŭ «NN»Siamiona Piečanka i Źmitra Pankaŭca. Što heta za chłopcy, jak jany źjavilisia ŭ hazecie, a taksama ci žanatyja jany? Jašče raz vinšuju ź jubilejem. Volha, čytačka.

Niežanatyja, tałkovyja i pracavityja, rekamenduju. Adzin pryjechaŭ u hazetu pracavać z Karelickaha, druhi – z Barysaŭskaha rajonaŭ. Tak dasłoŭna j było – pryjechali z svaich viosak, kažuć, chočam pracavać. Ja adhavorvaŭ, jany nastojali.

Chto dla vas uzor ci ideał -- kali takija jość -- siarod vašych sučaśnikaŭ u prafesijnym i maralnym planie?

U prafesijnym -- Hiermiančuk, Kalinkina Śviatłana, Łuniova Luba, Maksimiuk Jan, Vacłaŭ Havał, z ruk jakoha ja atrymaŭ premiju, Rabčuk Mikoła, naprykład. U etyčnym – Bułhakaŭ, kardynał Śviontak, ajciec Nadsan, brat Piotra Rudkoŭski, inžyner Daniła Žukoŭski, Bykaŭ Vasil, pry jakim ja pracavaŭ namieśnikam u PEN-Centry, Taras Vital, Volski z Arłovym, jakich ja šanuju biaźmiežna. Ja tut hublajusia ŭ pieraliku, bo ŭ ciapierašniaj Biełarusi nastolki pulsuje žyćcio, majem stolki śvietłych ludziej, a ja praz svaju pasadu ŭ Nivie z mnohimi ź ich paznaŭsia. Voś, naprykład, viedaju troch samaachviarnych śviataroŭ z Połaččyny -- ajcoŭ Viačasłava Barka, Viktara Misieviča, Hienadzia Dobruka – a tam, zdajecca, a bolej ich jo.

U chym pazytyu Lukashenki dlia Belarusi? Mikalaj

U tym, što heta kiraŭnik racyjanalnaha składu, jaki nia lubić pralivać kroŭ i nie dapuściŭ biezuładździa. Pry toj kalanizavanaści elitaŭ, drymuča nizkim uzroŭni adukacyi i kanfarmiźmie intelihiencyi, što my mieli na pačatak 1990-ch, mahło być i horš – da ŭłady moh prarvacca i poŭny idyjot.

Pytańnie takoje. Ja viedaju, što vašyja dzieci, jaki i dzieci šmat jakich biełaruskamoŭnych baćkoŭ, chodziać u rasiejskamoŭnyja sadki. Z čym heta źviazana? Jakaja mova maŭleńnia ŭ vyniku ŭ vašych dziaciej? Jak vy dumajecie ci pavinny viadomyja biełaruskamoŭnyja być prykładam dla astatnich u hetym pytańni? I kali tak ci patrebnyja biełaruskamoŭnyja hrupy sadaŭskija ŭ Biełarusi, kali šmat jakija biełaruskamoŭnyja baćki ad ich admaŭlajucca? I apošniaje: što pavinna adbycca, kab vy vyrašyli addać dziaciej u biełaruskija sadki? Jak vy bačycie ich dalejšuju adukacyjnuju budučyniu? Ci praciahnuć jany vyvučacca pa-rasiejsku i ŭ škołcy? Volha

Maje dzieci chodziać u sadok, jaki ŭ maim domie. Źviazana heta z banalnymi pryčynami, što na čas, kali syn išoŭ u sadok, nie było biełaruskamoŭnaha sadku, u jaki možna było b dajaždžać bieź pierasiadki, a my nia mieli mašyny. Vazić dziaciej ź pierasiadkaj było b pahrozaj ichnamu zdaroŭju. Da taho ž, na toj hod nie było dobrych vychavacielek u biełaruskamoŭnych hrupach. Dźvie hetyja pryčyny pieravažyli achvotu biełaruskaha sadka. Ciapier mianiać nia chočam, bo heta było b traŭmatyčna dla małych.

Kali b jany išli siońnia ŭ sadok, kali my majem mahčymaść dastaŭlać ich i kali jość lepšy vybar sadkoŭ, my b pasłali ich u biełaruskamoŭny, biezumoŭna.

Maje dzieci šparać pa-biełarusku i pa-rasiejsku ŭmiejuć. Ci zachavaje dzicia luboŭ da movy, zaležyć ad taho, jak da movy staviacca ŭdoma i jakija ŭ dziaciej adnosiny z baćkami. U biełaruskamoŭnych škołach i sadkach mohuć i razvučyć movie, a nia tolki navučyć.

Zmahacca treba za kožny biełmoŭny sadok i klasu, za kožny element nacyjanalnaj infrastruktury, adnaznačna. Ja hałasuju za biełarusizacyju adukacyi. Ź inšaha boku, niamožna vykarystoŭvać mały' jak instrument samaśćvierdžańnia darosłych. I jašče bolej treba zmahacca za narmalnuju ŭładu, pry jakoj mova ŭvojdzie ŭ normu.

Spadziajusia, pojduć u biełaruskamoŭnuju himnaziju. Prynamsi, my pad heta padładžvajem svajo žyćcio. Adnak toje budzie nia dziela viedańnia movy. Kali tam my sutykniemsia z zusim nizkaj jakaściu adukacyi, pryjdziecca dumać.

Bačycie, u maim vypadku dzieci žyvuć va ŭnikalna biełaruskim śviecie – u nas biełaruskamoŭnyja siabry, biełaruskamoŭnaja muzyka doma, jany jeździać u biełaruskamoŭnuju carkvu, molacca pa-biełarusku. Tata čytaje knižki na piaci movach, aŭtamatyčna pierakładajučy ich na biełaruskuju. To dla nas hetaje pytańnie biełaruskaści nie staić, jana jak by sama saboju razumiejecca. Byli b my ŭ inšaj sytuacyi, ja b mo pa-inšamu madelavaŭ by žyćcio dzieciam. Bo dla mianie istotna, kab jany vyraśli aktyŭnymi ludźmi. Mnie budzie kaniec śvietu, kali ŭ mianie ŭnuki nia buduć biełaruskamoŭnymi kaliści.

U cełym moj recept na moŭnaje zmahańnie: musim być ćviordymi, ale biez fanatyzmu.

Andrej, shto vy planujece rabic pasla Nashaj nivy? Georg

«Našu Nivu» i knihi.

Dobry dzień, Andrej. Jak Vy staviciesia da vychadu maładoha deputata Ukrainy Mikałaja Kaciarynčuka z ''Našaj Ukrainy''. Jak Vy licycie, ci mahčymaje ja ho paviernieńnie ŭ partyju. Dziakuj.

Jakija, adnak, prablemy kłapociać aŭdytoryju «Svabody»... Nia viedaju, chto taki Kacierynčuk, ale zyču jamu razarvać z karumpavanaj ukrainskaj palityčnaj elitaj, zasnavać novuju palityčnuju siłu, jakaja b źmianiła praviły palityčnaj kultury ŭkraincaŭ i zrabiła Ŭkrainu prykładam dla biełarusaŭ. Mnie nie padabajucca palityki, jakija jeździać na «mersedesach» i «ferary», a ŭkrainskija spres takija.

Na pytańnie «Načnoj Svabody» pra acenku Vašaj dziejnaści na pasadzie hałoŭnaha redaktara «Našaj Nivy» Siarhiej Dubaviec skazaŭ, što heta - podźvih. Jakija biełaruskija prajekty Vy ličycie mocnymi i znakavymi?

Tak? Dziakuj.

Nie lublu słovaŭ «prajekt» i «znakavy». Kali ja vučyŭsia, hetyja słovy ŭ takich značeńniach nie ŭžyvalisia, tamu dla mianie jany pa-raniejšamu hučać jak modnaści. U nas užo i Milinkievič «prajekt», i kniha Halpiaroviča «znakavaja». U mianie trochi inšyja pohlady na realnaść i semijotyku.

Dapuścim, Vy majecie na ŭvazie kulturnyja, nie palityčnyja prajekty. Mocnyja tyja prajekty, realizacyja jakich nie zaležyć ad samadurstva dziaržaŭnaj administracyi, jakija tak prosta nie začyniš, jak časopis «Krynica».

Na adnoj z minułych on-łajn kanfierencyj (Kali jašče NN adnosna narmalna vychodziła) Vas zapytali, ab tym, što tady NN stała bolš kamfarmistskaj hazetaj u dačynienni da ułady. Vy adkazali. što čas pakaža ci ziajaulajecca pravlnym takoje rašeńnie. Nu i što pakazau čas? Ctts

Ja nie skazaŭ, što NN stała kanfarmisckaj. Ja skazaŭ, što čas pakaža, jakoj jana stała.

Spadar Andrej! Što ciapier robić NN, kab zrabić hazetu bolš cikavaj, jak u tyja časy, kali kožny numar pračytvaŭsia «ad korki da korki». Moža, varta b było apytać čytačoŭ? Taksama tych, chto čytaje jaje ŭžo nia pieršy hod? Tady vyrašyć z ulikam roznych mierkavańniaŭ, što źmianić da lepšaha?

Ciapier majem statystyku pračytańnia artykułaŭ u Internecie, absalutna dakładnuju, kamputar robić. U hazecie ciapier vydrukoŭvajem chiba tolki adnu piatuju z materyjałaŭ sajtu, tolki samyja papularnyja i/abo istotnyja.

Ci rychtujecca jakaja-niebudź vialikaja infarmacyjna-ahitacyjnaja kampanija da 25 sakavika 2007? Naohuł, u nas jość šaniec sabrać viasnoj na płoščy bolš 100 tys. čałaviek?

Pieršaje pytańnie nie da «Našaj Nivy».

Patreba takaja, miarkujučy pa Vašym pytańni, jość. A kali jość patreba, jość i šaniec.

Mnie takija idei padabajucca. Tolki kab heta ździejśnić, treba miesiacami, hadami i dziesiacihodździami pracavać, vychoŭvać ź ludziej biełarusaŭ i hramadzianaŭ z pačućciem nacyjanalnaj i čałaviečaj hodnaści. Za dva tydni takoje nia robicca.

Sp.Andrej! Nia tak daŭno razhareŭsia skandał ź Fiadutam -- jon byŭ złoŭleny na płahijacie. Ci nie para pastavić i vam kropku ŭ svaich uzajemaadnosinach z hetym čałaviekam, jaki dla biełarusaŭ starejšaha pakaleńnia ŭvasablaje amaralnaść? Niaŭžo ŭ našaj litaratury nastolki nie chapaje ludziej, što davodzicca karystacca jaho pasłuhami? Hetyja razdačy nobielaŭ užo stali aniekdotam! Niaŭžo vy heta nie adčuvajecie?

U «Našaj Nivie» jon plahijatu nie drukavaŭ.

Publikacyi na sajcie «NRS» biez spasyłak na «Biełorusskije novosti» jon patłumačyŭ tym, što – voś znajšoŭ u Interecie: «po niezavisiaŝim ot mienia obstojatielstvam riedakcija sajta «NRS» načała śnimať iz tiekstov ukazanija na istočnik riepublikujemoj informacii. Proizošło eto hdie-to pośle 3 nojabria: tam, prolistav archiv, ja ssyłki na istočniki jeŝie obnaružił. Jesť ssyłka, naprimier, i v informacii ot 20 nojabria. No v riadie słučajev ssyłka diejstvitielno śniata. Ja eto prozievał. No v tom, čto v nieskolkich citirujemych Jelenoj Novožiłovoj tiekstach ona była, ja ubiediłsia, posmotriev ischodnyje matieriały, otosłannyje mnoju v riedakciju NRS s noutbuka. Eto słaboje utiešienije – ponimať, čto tvoja vina mieńšie, čiem vina koho-to druhoho. Nužno prinimať na siebia otvietstviennosť, čto ja i diełaju. Mnie ostajetsia iźviniťsia pieried h-žoj Novožiłovoj i «Biełorusskimi novostiami». Čto ja takžie diełaju s iskrieńnim sožalenijem».

U «Našu Nivu» maje prava pisać kožny. Zaležyć ad źmiestu i formy tekstu, drukujem my jaho ci nie drukujem. Ale nijak nie ad asoby aŭtara. Hetym my i roźnimsia ad łukašenkaŭskich vydańniaŭ.

Na viečarynie NN vy dvojčy ŭ prysutnaści vialikaj kolkaści ludziej ab»iavili pra svoj sychod. A na druhi dzień u redakcyi pryznalisia Z.Pankaŭcu, što heta tolki pijar-chod. Moža heta i ŭdały pijar-chod, ale ž davieru da vas paśla takich durnych žartaŭ nie čakajcie. P.C.I nie soramna vam brać premiju za «asabistuju tvorčaść?»Moža redaktar vy i niebłahi, ale ŭžo piśmieńnik z vas nijaki.Vital

Vy, Vitalu, jaŭna čałaviek nieabyjakavy da biełaruskich pasadaŭ i mianie asabista. Pakolki ŭ maim kabineciku padčas havorki z Pankaŭcom nikoha nie było, musić, hetak Vy interpretujecie zapisy ŭ Internet-dziońniku Pankaŭca. Dyk voś, tam zapisana, što Dyńko skazaŭ, što budzie siadzieć na tym samym miescy. Bo ja zastajusia ŭ «Našaj Nivie» i budu pracavać dalej u inšaj funkcyi.

Uvohule ž, Vitalu, ja niaredka havaru metafarami.

Spadar Andrej! Jakija Vy myjecie ŭ žyćci zachapleńni? Michaś.

«Naša Niva» i «ARCHE». Astatniaje – blakły cień hetych dvuch vialikich zachapleńniaŭ.

Jakoje vašaje staŭleńnie da tych śviadomych biełarusaŭ, katoryja śviadoma pracujuć u dziaržaŭnych strukturach, bo heta ž jość faktyčnaje supracoŭnictva z režymym?

Pa-pieršaje, jak skazaŭ śviaty Aŭhustyn: lubi Boha, i rabi što chočaš. Kali jany pracujuć sumlenna, jany robiać pravilna. Kali ž dziela hrošaj jany robiać paskudztvy i machinacyi, jany parušajuć maralny zakon.

Pa-druhoje, realna strukturaŭ, jakija parušajuć pravy hramadzianaŭ i kanstytucyjnyja normy, u nas ličanyja adzinki – heta najpierš idealahičnaja vertykal, a pa-druhoje, asobnyja adździeły specsłužbaŭ. Biez astatnich hramadztva nia moža abyścisia. Ni biez sudoŭ, ni biaz mytni, ni biez orhanaŭ achovy pravaparadku. Śviadomyja biełarusy majuć prava ŭ ich pracavać. Biada ŭ inšym – što biełaruskamoŭnych ludziej ci ludziej z palityčnymi pohladami ŭ nas dyskryminujuć i nie biaruć na dziaržaŭnuju słužbu. Tym samym asłablajučy nacyjanalnuju dziaržaŭnaść.

Jak vy staviciesia da prablemy bilinhvizmu ŭ našaj krainie?

Jak da niepaźbiežnaści.

Jakija ŭ vas samyja pryjemnyja ŭspaminy z vašaha dziacinstva?

Stravy ź piečy, sadavina z kustoŭ, hryby kala hanku. Poŭnaje ščaście. Maleńki-maleńki śviet. I ŭsie vakoł havorać na adnoj movie, jakaja mnie rodnaja.

Ci varta ŭ paślałukašenkaŭskaj Biełarusi prymać zakon ab lustracyi i ŭ jakoj formie i miežach heta rabić?

Nia varta, tamu što parušeńni zakonu ŭ nas nie nabyli masavaha charaktaru. Panieści adkaznaść musiać tolki kankretnyja asoby, jakija ŭčyniali złačynstvy i nanosili inšuju škodu hramadzianam i pradpryjemstvam. Adnak z hetych asobaŭ nichto nie pavinien syści ad jurydyčnaj adkaznaści.

Kaho vy možacie nazvać, jak prykład, ź biełaruskich dziejačoŭ, što nazyvajecca nie ź pieršaj abojmy (h.zn. čyje imiony nie na słychu), ale jakija ŭ historyi Biełarusi pakinuli važki śled i simpatyčnyja ŭłasna vam.

Naprykład, ajciec Adam Stankievič, ajciec Uładzisłaŭ Čarniaŭski, paet Siarhiej Dziarhaj. Braty Łuckievičy adnaznačna. Hladzicie taksama vyšej moj adkaz pra histaryčnych asobaŭ, kab mnie nie paŭtaracca.

U vypadku źniščeńnia «NN» i vašaha aktyŭnaha pieraśledu ci dapuskajecie vy dumku pra emihracyju?

Nie. Chiba što pracoŭnuju. Ale ŭ našych umovach lepš nie zarakacca.

Jakija vydańni ŭsich časoŭ vy mahli b paraŭnać z «Našaj Nivaj»?

Ciapier my ŭnikalnyja, bo naša nacyjanalnaja sytuacyja ŭnikalnaja.

Ci adčuvajecca ŭ «NN» kadravy hoład?

Uvieś čas, bo ŭ Biełarusi mała prafesijanałaŭ, hatovych pracavać za nievialikija hrošy z manaskaj addanaściu i bieź nijakich harantyj.

Jakoje vašaje staŭleńnie da viery?

Ja vieru.

Jak vy ličacie, ci varta ŭ Zakapanym adnavić mahiłu zasnavalnika «Našaj Nivy» Ivana Łuckieviča?

Ja mierkavaŭ, što jana adnoŭlenaja ŭ 80-ja. Daviedajusia.

Andriej dobryj dień! Vy mołodiec!!! Tak dieržať! Skažitie počiemu na Vaš vzhiał ludi kotoryje nazyvajut siebia oppozicijej ničieho nie diełajut. Vot mienia intieriesujet vopros nielihitimnosti hraždanina A. Łukašienko. Jeho połnomočija istiekli 20 sientiabria 2006 hoda. Po Konstitucii juridičieski lehitimnym i.o. Priezidienta stał S.Sidorskij. Počiemu tolko politzaklučiennyj Kozulin, opalnyj akadiemik Vojtovič, eks-kandidat v Priezidienty 2001 hoda Hončarik, byvšije sud́ji KS staviat etot vopros riebrom, pišut piśma Sidorskomu i triebujut ot nieho stať i.o. Priezidienta? Počiemu Vy kak hłavnyj riedaktor mołčitie? Počiemu mołčat Milinkievič, Lebied́ko, Viečierko, Kalakin i dr.? Počiemu mołčit radio «Svoboda»? Etot voopros siehodnia hłavnyj. Počiemu jeŝie nie odin žurnalist za 2 miesiaca nie zadał Sidorskomu napriamuju etot vopros? Vy žie žurnalist? Zvonitie v prijemnuju priḿjera každyj dień, každyj čas i sprašivajtie počiemu on narušajet Konstituciju. Čiem bolšie my budiem daviť, tiem uvieličivajem šansy. Libo triebujtie otstavki Sidorskoho kak trusa. Vy čto nie viditie, čto jeho Łukašienko siejčas boiťsia bolšie vsieho. On užie dva miesiaac v postojannych ssyłkach i otpuskach. Jeho nie pokazyvajut nihdie i nikto o niem nie pišiet.

Zvanić u pryjomnuju premjera žurnalistu «NN» biessensoŭna.

Lehitymnaść – heta pryznańnie čyjojści ŭłady zakonnaj spraviadlivaj nasielnictvam i orhanami ŭłady. Heta nia toje, što tam niechta ŭ adoźvie napisaŭ.

A Łukašenku ja ŭčora bačyŭ pa BT i siońnia ŭ «SaŭBielii».

Pryvitańnie, Andrej! Čym uzbahaciŭ ciabie vopyt redaktarstva «Našaju Nivaju»? Jakija nabytki atrymaŭ, dzie zmožaš ich vykarystać? Dziakuju, Vercia Kandral

Ja staŭ čałaviekam, upeŭnienym u sabie i nabyŭ siabroŭ na ŭsio žyćcio. Vykarystaju ŭ «Našaj Nivie» i inšych biełaruskamoŭnych vydańniach našaha «kancernu».

Vy nazyvajecie ŭ liku aŭtaraŭ niejkaha Rudkoŭskaha, viadomaha tolki tym, što abhažvaje Paźniaka. Vyhladaje, heta zrabiłasia i častkaj redakcyjnaj palityki. Nie kažučy pra toje, što Paźniak i niejki Rudkoŭski -- heta słon i mośka.

Vaša pytańnie chamskaje i hłupaje.

Dyk jak nam izalavacca ad Rasiei, spadar redaktar? Aleh

Nia treba nam izalavacca ad Rasiei. Naadvarot, i dziaržavie, i hramadztvu patrebnaja zacikaŭlenaja ŭschodniaja palityka. Naša budučaja vaha ŭ Eŭropie budzie zaležać ad našaje vahi ŭ Rasiei i našaha viedańnia Rasiei. Adnak vybudoŭvać adnosiny z Rasiejaj treba na hruncie aksijomy nacyjanalnych intaresaŭ, kab Rasieja była jak «inšaje», a nie jak «my takija ž, tolki sa znakam jakaści».

Dobry dzień, Andrej! A chto naahuł zajmajecca pytańniem pryznačeńnia hałoŭnaha redaktara NN? Jość niejki saviet? Dziakuj, Siarhiej, Vialejka

Nie, usio rašajecca bolš niefarmalna. Na ŭzroŭni kalektyŭnaha rašeńnia asobaŭ, jakija majuć adpaviednyja paŭnamoctvy.

Andrej, jakija ŭ vas płany što da raboty sajta NN? Ci jość namier rabić anhłamoŭnuju versiju? Dziakuj, Siarhiej

Na toje niama ni hrošaj, ni patreby, zdajecca. Paru materyjałaŭ u dzień pa-anhielsku byŭ by sens zrabić, ale heta takaja darahaja cacka, što nierealna.

Andrej, ci byli vam prapanovy ab pracy za miažoj? Kali tak, to ŭ jakija krainy? Anton

Tak, u Švajcaryi, Ukrainie j Čechii.

Vaš lubimy biełaruski hurt (apaśla NRM)? Śvieta

Huda. Vajciuškievičavu Cacačnuju kramu vyvučyŭ na pamiać praz toje, što maje dzieci peŭny peryjad słuchali jaje sutkami. Uvohule to ja bolš lublu ŭsiakich Rachmaninavych, Hryhaŭ, a jašče ŭsiakich Nikaŭ Kiejvaŭ, alternatyŭny rok, da jakoha mianie pryvučyŭ Bułhakaŭ.

Ci treba nam ustupać u Eŭraźviaz? Moža lepš pajści pa šlachu takich krain, jak Narviehija, Iślandyja, jakija ŭvachodziać u NATA, ale nie źjaŭlajucca čalcami Eŭźviazu? Kastuś

Moža być. Tre budzie vyrašać pa sytuacyi. Tolki my nie takija samadastatkovyja, jak bahataja Narvehija. Biełarusi nia možna biadnieć. Źbiadniejem – staniem hołymi i durnymi, pierafrazoŭvajučy adnaho persanaža.

Vam nie kažietsia, čto vsia tiekuŝaja boŕba s riežimom v Biełarusi śviełaś k praktikie miełkoj «fihi v karmanie»? Vsie eti fłeš-moby, briacanije słovami počti v kuchonnom intieŕjerie i pročieje - kak miertovmu priparka, 96 hod dažie blizko nie napominajet. A vsie v itohie riešitsia (a po niekotorym dannym - užie riešiłoś) v kabinietach Kriemla.

Usio ŭ vyniku vyrašycca na kuchniach i vulicach biełaruskaj stalicy. Tak było ŭ Kijevie, Varšavie i Tbilisi. Tak budzie i ŭ nas. U nas ža nie mahnitnaja anamalija, a takaja sama ŭschodnieeŭrapiejskaja nacyja, jak i inšyja.

Andrej, dzień dobry! Kali łaska, raspaviadzicie pra vašych dzietak: Uścińniu i Jakuba. Kolki im hod? Dzie navučajucca? Jak vy ich vychoŭvajecie? Ci vyjazžali vy ŭsiej siamjoju za miežy Biełarusi, kab pabačyć śviet i siabie pakazać? Dziakuj za Vašu pracu. Laksiej.

Uścińni chutka budzie čatyry, a Jakubu šeść. Chodziać u sadok (hladzi vyšej). Vychoŭvajem u svabodzie. Za miažu nie vyjaždžali ni razu pakul, zatoje jany pieršy raz hetym letam praviali miesiac biez baćkoŭ u babulaŭ, jakija ŭ nas žyvuć u inšym horadzie.

Spadar Andreju, vinšuju Vas ź jubilejam «Našaj Nivy» i vykazvaju padziaku za addanuju pracu. Majo pytańnie takoje: ščyra kažučy, ja chaču kab adrazu paśla źmieny ŭłady była spyniena nie tolki farmalna dziejnaść RNIE i inšych takoha kštałtu hrupovak u Biełarusi. Jak Vy ličycie, ci nie staniecca tak, što praz namahańni apošnich demakraty buduć vyhladać jak vykaranicieli inšadumcaŭ? I jakija samyja žorstkija miery pavinny užyvacca ŭ dačynieńni da siabroŭ hetych hrupovak, na Vaš pohlad? Źmicier

Inšadumstva i prapahanda nianaviści – heta roznyja rečy. Zakon, hramadztva i pravaabaroncy ich vyrazna adroźnivajuć. U Biełarusi niama vialikich padstavaŭ dla pašyreńnia ekstremizmu, chiba što adbudziecca niejki ekanamičny abvał. Tamu nia dumaju, kab my mieli z hetym niejkija prablemy. Kali ciapierašniaja, słabaja ŭłada daje rady hetym prablemam, mocnaja, demakratyčnaja tym bolš znojdzie rašeńnie dla taho.

Andrej. Ja hlanuŭ svoj archiŭ «Našaj Nivy» z kanca 1993 hoda pa sioniešni čas. Da 1996-ha hoda - adna hazieta, paśla 1996 da 2000 hoda - druhaja, zaraz - jašče inšaja. Źmieny ŭražalnyja. Heta - zusim roznyja haziety. Tamu pytańnie - čamu Vy ličycie, što Vaša «Naša Niva» jość uznoŭlennaja «Naša Niva» 1900-ch hadoŭ? I jakaja, na Vašu dumku, hazieta (1991-1996, ci 1996-2000, ci 2000-?) naibolš adpaviadaje toj, pačatkovaj? Leanid Harustovič

Heta adna hazeta, bo jana nazyvajecca «Naša Niva», vychodzić pa-biełarusku i maje ŭ asnovie tyja samyja pryncypy j žadańni. Pačatkovaj najbolš adpaviadaje ciapierašniaja, adnak takaja nie mahła paŭstać u 1991 hodzie. Hleby nie było, kadraŭ, tradycyi. Kab padrychtavać hetuju hazetu, musili spačatku adbycca tyja, što byli ŭ 1991-1996, 1996-2000. Dyk što ŭsio idzie dobraj darohaj pakul. Daj Boh, chopić ćviordaści ŭsim nam i vam, kab dajści da mety i nia ŭpaści.

Spadaru Andreju! ci nastanie taki čas, što aŭtaram «našaje nivy» pačnuć płacić za svaje artykuły? Andrej Mialeška

Adrazu ŭspaminajecca naš vialiki paet-kamunist Tank: «Nia płač, naš dzień nastanie, Choć adstupili ŭčora. Zaciśni mocna ranu! Chaj nie śmiajecca vorah!..»

Andrej, rastłumač, kali łaska, biahučuju situacyju vakoł Našaj Nivy. Kali zychodzim u padpolje? Žadaju nie hublać mužnaści i aptymizmu. Kali ŭ hetym piekle ŭ Biełarusi vyžyvuć dźvie niezaležnyja haziety, ja pierakanany - adna ź ich budzie Naša Niva! Trymajsia! Vital S.

Biahučuju sytuacyju rastłumačyć ciažka. Kali koratka: nas dušać, a my nie zdajemsia. Čym heta skončycca, nia viedaju. Što da padpolla, dyk pryznajusia ščyra, što ja pa natury nie padpolščyk. Moža małodšaje pakaleńnie?.. Zrešty, vyhladaje, što musić padpolla ŭ čystym vyhladzie nia budzie. Tak usio i budzie ŭ vyhladzie paŭsvabody, maŭmahčymaściaŭ i paŭrepresij. Da takoj realnaści musim i dastasoŭvacca, kab dziejničać efektyŭna, a nie karcinna. Peŭnaść takaja: stvarajučy biełaruski infarmacyjny i kulturny pradukt, musim raspaŭsiudžvać jaho samymi efektyŭnymi sposabami z mahčymych.

Jak na vašuju dumku «Našaja niva» i «Arche» stanuć kali niebudź vydańniami biez unutranaj cenzury?(ja maju naŭvazie dopisy na apošniaj staroncy «našaje nivy» u «paštovaj skryncy») Andrej Mialeška

Heta nie cenzura, heta adbor samaha vartaha i važnaha, bieź jakoha nia možna. Inačaj budzie navał, a nie jasnaje vydańnie.

Šanoŭny spadar Andrej! Skažycie kali łaska ci nie stanie vaš adychod z pasady hałoŭnaha redaktara fatalnym udaram pa šanoŭnaj «Našaj Nivie», ci ŭ hetym absalutna niama ničoha fatalnaha i heta całkam narmalovy praces u raźvićci hazety? Jašče raz vinšuju «Našu Nivu» sa 100-hodździem! ŽYVIE BIEŁARUŚ! A. Dareŭski

Dumaju, nie. Naadvarot, heta abnović kroŭ. Maładziejšaje pakaleńnie padajecca mnie śmialejšym i bolš prafesijnym za mianie.

Uraziŭ košt kvitka na imprezu na śviatkavańnie 100-hodździa «našaj nivy». Dobry kamientar źmieščany na staronkach učarašniaj «Biełhaziety» na hety kont. Čamu niama maštabnaj akcyi na pavietry, biez hrošaj i z dobrym nastrojem adzinstva dla ŭsich nacyjanalna śviadomych biełarusaŭ, jakija čytajuć «NN»? Ci pracuje»NN» z maładymi aŭtarami, žurnalistami i dzie heta možna ŭbačyć? Ja.

«BiełHazieta» – uvohule nia toje vydańnie, jakoje tut varta słuchać. I tym bolš rabić niejkija vysnovy, pahladzieŭšy praź jaje pryzmu, nia varta. Praŭda voś jakaja: našaniŭskich jubilejnych viečarynaŭ i ŭračystych schodaŭ było ŭžo až piać, i ŭsie jany byli biaspłatnymi, i nabiłasia na apošnija ź ich mnoha ludziej, i było ŭsio cudoŭna. A vy błytajecie viečaryny i ŭračystyja schody z admysłovaj «viačeraj dziela zboru hrošaj na hazetu». Kab trapić na jaje, sapraŭdy tre było pierakazać achviaravańnie.

Kali być realistami, akcyja na pavietry siońnia mažlivaja tolki na Banhałory. Nam heta nia treba. Kali na pavietry, ja b zładziŭ festyval «Našaj Nivy» pad adkrytym niebam u dastojnym miescy, jak robiać «Jumanite» ci «Unita», ale takoje pry hetaj uładzie niemahčymaje.

Pabačyć našu pracu možna na papiery i na sajcie nn.by.

Pytańnie zadadziena praz SMS (red.) Andrej,na pačatku 90ch vyjšła kniha Alaksandra Łukašuka ''viartańnie nacyjanalista'' pra Janku FIlistoviča. Ci zmohuć čytačy paznajemicca z im?

Dla hetaha treba pajści ŭ kniharniu ci biblijateku. U hazecie drukavać taho nia budziem, što jość užo knihaj. Darečy, za čas paśla vydańnia knihi ŭ zachodnich archivach znajšlisia novyja materyjały pra Filistoviča – hieroja, ale i achviaru svajho času. Ja znajomiŭsia ź imi. Mahčyma, z časam niechta z historykaŭ padrychtuje ich da druku.

Dzien' dobry! U minie zjavilasia pytannie bols takoha technicnaha planu, sto li. U Praze, napryklad, ad navinau' Mlada Fronta vydajecca jasce Expres casovis, vydajecca pa pracounym dniam. Sam casopis nicoha nie kastuje, dziela cytacou i jaho mahcyma uziac, napryklad, u mietro, ci u roznych navucalnych ustanovach. Tak, ci mahcyma takoje zrabic' na Bielarusi, kali mahcyma, to jak? Dziakuju, Maxim

Takoje budzie mahčyma ŭ Biełarusi pry demakratyi. Pakul tolki nacyjanalna sterylnyja vydańni majuć mahčymaść raspaŭsiudžvacca biaspłatna.

Ci varta bylo tak huczna razhortvac' spreczku z babkovym? czytajuczy jaje na live-journal-e dzivu dajeszsia - niauzho udzelnikam bolsz niama czym zaniacca. mo varta bylo b iraniczna stavicca da krytycznyx zauvahau? Jazapat

O, tam ab pryncypovych rečach havaryłasia. Daść Boh, ja na hruncie jaje jašče i ese napišu. Havorka išła pra ahałcieły relatyvizm peŭnaj hrupy biełaruskich intelektuałaŭ, kali jany ŭsio padajuć adnosnym. Tryjumf relatyvizmu – adna z charakternych rysaŭ łukašyzmu i sučasnaje Biełarusi. U hetaj madeli čałaviek zajmajecca tolki tym, što padličvaje plusy i minusy. Mnie hetaja tema cikavaja.

Pryznajusia Vam, što ja nadta lublu palemiki j dyskusii. U ich naradžajucca praŭdy.

A jakija kazki lubić słuchać tvoj syn Jakub? Adam Hłobus

Jakaja dobraja publika sabrałasia na našu kanferencyju!

Pra mašyny lubić, pra mašyny. A Vašych pakul jamu nie čytajem. Chiba što sam čytaje, a mamie nia kaža?

?

Raźvitvajučysia z vami ŭ jakaści hałoŭnaha redaktara, ja chacieŭ by, kab my razam zhadali dobrymi słovami Siarhieja Dubaŭca, biez čyjoj prarockaj voli «Naša Niva» nie adradziłasia b. Paśla, kab my zhadali ŭsich dobraachvotnych raspaŭsiudnikaŭ hazety, bieź jakich hazety nie było sioleta. I narešcie – usich achviaradaŭcaŭ hazety, bieź jakich ničoha nie było b. Daj vam Boh usim dažyć da hadoŭ «Našaj Nivy».

• 0
• 0
• 0
• 0
• 0
• 0
• 0
• 0