Adšturchnulisia ad dna? Kurs čornaha rynku ŭpieršyniu źniziŭsia — 5500 za dalar
Banki sprabavali stavić bieznajaŭny kurs 8000 za dalar i bolšy, ale pa takim kursie rehistrujucca adzinkavyja apieracyi.
Kurs čornaha rynku najaŭnaj valuty ŭ Minsku ŭpaŭ paśla ŭčarašniaha rekordu. Siońnia za dalar valutčyki dajuć 5500 rubloŭ. U sieradu jaho kuplali za 6000. Heta było rezkim skačkom u paraŭnańni z aŭtorkam, kali dalar možna było pradać za 5000. Rubiel adšturchnuŭsia ad dna? Ci rynak prosta pazityŭna reahuje na pryjezd Pucina, ale moža znoŭ abvalicca ŭ paniku, kali vizit nie pryniasie kankretyki?
U Vilni dalar možna pradać za 5150 rubloŭ, kupić za 6980 rubloŭ — taksama na paŭtysiačy rubloŭ mienš, čym učora.
Kurs u abmieńnikach zastaŭsia na ŭzroŭni 4500 rubloŭ. Banki nie majuć śmiełaści vystavić kurs, vyšejšy za «rekamiendacyju» Nacbanka. Pa takim kursie nabyć valutu ŭsio jašče niemahčyma. Na internet-forumach pišuć, što, mahčyma, ad paniadziełka Nacbank uzdymie miažu dazvolenaha da 6000 rubloŭ.
Nahadajem, što aficyjny kurs dalara, jaki ŭstalovajecca Nacbankam, składaje 3 130 rubloŭ. Jon zanižany ŭ paraŭnańni z realnym, jaki vykarystoŭvajecca nasielnictvam, na 60–100%.
Na aficyjnym rynku bieznajaŭnaj valuty tyja samyja tendencyi. Banki sprabavali stavić kurs 8000 za dalar i bolšy, ale pa takim kursie popyt na valutu z boku imparcioraŭ nizki, rehistrujucca adzinkavyja apieracyi: impart robicca niavyhadnym.
U rezkim padzieńni rubla ŭčora byŭ elemient paniki: Nacbank nie maje reziervaŭ, kab stabilizavać situacyju na rynku, a aŭtorkavyja zajavy Łukašenki i Miaśnikoviča chutčej nastrašyli, čym supakoili. Mnohija paličyli słovy pra šeść miljardaŭ z Rasii bajkami paśla taho, jak Kudryn nie paćvierdziŭ takoj pierśpiektyvy.
Siońniašni rost rubla ŭsialaje niaśmiełuju nadzieju, što kurs nacyjanalnaj valuty narešcie spynicca na realistyčnym uzroŭni.
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary