Адштурхнуліся ад дна? Курс чорнага рынку ўпершыню знізіўся — 5500 за даляр
Банкі спрабавалі ставіць безнаяўны курс 8000 за даляр і большы, але па такім курсе рэгіструюцца адзінкавыя аперацыі.
Курс чорнага рынку наяўнай валюты ў Мінску ўпаў пасля ўчарашняга рэкорду. Сёння за даляр валютчыкі даюць 5500 рублёў. У сераду яго куплялі за 6000. Гэта было рэзкім скачком у параўнанні з аўторкам, калі даляр можна было прадаць за 5000. Рубель адштурхнуўся ад дна? Ці рынак проста пазітыўна рэагуе на прыезд Пуціна, але можа зноў абваліцца ў паніку, калі візіт не прынясе канкрэтыкі?
У Вільні даляр можна прадаць за 5150 рублёў, купіць за 6980 рублёў — таксама на паўтысячы рублёў менш, чым учора.
Курс у абменніках застаўся на ўзроўні 4500 рублёў. Банкі не маюць смеласці выставіць курс, вышэйшы за «рэкамендацыю» Нацбанка. Па такім курсе набыць валюту ўсё яшчэ немагчыма. На інтэрнэт-форумах пішуць, што, магчыма, ад панядзелка Нацбанк уздыме мяжу дазволенага да 6000 рублёў.
Нагадаем, што афіцыйны курс даляра, які ўсталёваецца Нацбанкам, складае 3 130 рублёў. Ён заніжаны ў параўнанні з рэальным, які выкарыстоўваецца насельніцтвам, на 60–100%.
На афіцыйным рынку безнаяўнай валюты тыя самыя тэндэнцыі. Банкі спрабавалі ставіць курс 8000 за даляр і большы, але па такім курсе попыт на валюту з боку імпарцёраў нізкі, рэгіструюцца адзінкавыя аперацыі: імпарт робіцца нявыгадным.
У рэзкім падзенні рубля ўчора быў элемент панікі: Нацбанк не мае рэзерваў, каб стабілізаваць сітуацыю на рынку, а аўторкавыя заявы Лукашэнкі і Мясніковіча хутчэй настрашылі, чым супакоілі. Многія палічылі словы пра шэсць мільярдаў з Расіі байкамі пасля таго, як Кудрын не пацвердзіў такой перспектывы.
Сённяшні рост рубля ўсяляе нясмелую надзею, што курс нацыянальнай валюты нарэшце спыніцца на рэалістычным узроўні.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары