Jeŭrapiejski sud pa pravach čałavieka budzie razhladać skarhu łukašenkaŭskaha prapahandysta

Redaktar časopisa Administracyi prezidenta choča atrymać prava jeździć u Jeŭropu.

Jeŭrapiejski sud pa pravach čałavieka (JESPČ) pryniaŭ da razhladu pazoŭ biełaruskaha žurnalista — hałoŭnaha redaktara časopisa «Biełaruskaja dumka» Vadzima Hihina, piša ahienctva BiełTA. Ab hetym havorycca ŭ piśmie, jakoje było nakiravana žurnalistu sakrataryjatam hetaha mižnarodnaha sudovaha orhana.

Pazoŭ byŭ padadzieny ŭ suviazi z uviadzieńniem Radaj ES u studzieni 2011 hoda sankcyj adnosna suprać vialikaj hrupy łukašenkaŭcaŭ, jakich Jeŭropa ličyć datyčnymi da parušeńnia pravoŭ čałavieka ŭ Biełarusi. Siarod ich była i hrupa žurnalistaŭ-prapahandystaŭ, što asabliva vyłučylisia ŭ svajoj tvorčaści. Biełaruś nie ŭvachodzić u Saviet Jeŭropy, ale biełaruskija hramadzianie majuć mahčymaść padavać iski adnosna krain, jakija padpadajuć pad jurysdykcyju JESPČ. Vierahodna, ciapier taki isk byŭ padadzieny ŭpieršyniu.

Hihin adznačaje, što padstavaj dla pazova stała toje, što «byŭ składzieny niejki čorny śpis, što źniesłaŭlaje honar, hodnaść i dziełavuju reputacyju tych, chto ŭ jaho ŭklučany».

Žurnalist padkreśliŭ, što sprava nie ŭ vizach: «My nie prosimsia ŭ ES, tym bolš što ź jurydyčnaha punktu hledžańnia jany mohuć hetyja vizy nie vydavać. Sprava ŭ samim pryncypie — składańni niejkaha śpisa za niejkija mifičnyja parušeńni».

Hihin miarkuje, što rašeńnie Rady ES ab abmiežavańni ŭjezdu supiarečyć Jeŭrapiejskaj chartyi svabody presy.

U svaju čarhu pieršy namieśnik ministra infarmacyi Lilija Ananič adznačaje, što takija sankcyi parušajuć art. 19 Mižnarodnaha pakta ab hramadzianskich i palityčnych pravach, «dzie skazana davoli dakładna, što kožny čałaviek maje prava bieśpieraškodna prytrymlivacca svaich palityčnych pierakanańniaŭ, prava na svabodnaje vykazvańnie dumki».

Pry hetym u samoj Biełarusi dziaržaŭnyja ŚMI vykazvajuć pazicyju tolki adnaho palityka, a niekalki dziasiatkaŭ krytyčnych vydańniaŭ byli zakryty roznymi sposabami. U krainie niama nivodnaha tele- ci radyjokanała, na jakich hučali b alternatyŭnyja punkty hledžańnia. Za hrošy padatkapłatnikaŭ utrymlivajecca šmattysiačny ideałahičny aparat, jaki pravodzić intaresy adnaho palityka. Tolki za apošni hod u kryminalnaj turmie pabyvali ci zastajucca tam žurnalisty Iryna Chalip, Natalla Radzina, Źmicier Bandarenka, Aleś Atroščankaŭ, Andrej Pačobut. Za adzin viečar 6 lipienia praz zatrymańni prajšli 23 reparciory.

Hihin u svaich artykułach apraŭdvaŭ hetyja zachady i navat zaklikaŭ da bolš žorstkich mieraŭ suprać apazicyi.

• 0
• 0
• 0
• 0
• 0
• 0
• 0
• 0