Еўрапейскі суд па правах чалавека будзе разглядаць скаргу лукашэнкаўскага прапагандыста

Рэдактар часопіса Адміністрацыі прэзідэнта хоча атрымаць права ездзіць у Еўропу.

Еўрапейскі суд па правах чалавека (ЕСПЧ) прыняў да разгляду пазоў беларускага журналіста — галоўнага рэдактара часопіса «Беларуская думка» Вадзіма Гігіна, піша агенцтва БелТА. Аб гэтым гаворыцца ў пісьме, якое было накіравана журналісту сакратарыятам гэтага міжнароднага судовага органа.

Пазоў быў пададзены ў сувязі з увядзеннем Радай ЕС у студзені 2011 года санкцый адносна супраць вялікай групы лукашэнкаўцаў, якіх Еўропа лічыць датычнымі да парушэння правоў чалавека ў Беларусі. Сярод іх была і група журналістаў-прапагандыстаў, што асабліва вылучыліся ў сваёй творчасці. Беларусь не ўваходзіць у Савет Еўропы, але беларускія грамадзяне маюць магчымасць падаваць іскі адносна краін, якія падпадаюць пад юрысдыкцыю ЕСПЧ. Верагодна, цяпер такі іск быў пададзены ўпершыню.

Гігін адзначае, што падставай для пазова стала тое, што «быў складзены нейкі чорны спіс, што знеслаўляе гонар, годнасць і дзелавую рэпутацыю тых, хто ў яго ўключаны».

Журналіст падкрэсліў, што справа не ў візах: «Мы не просімся ў ЕС, тым больш што з юрыдычнага пункту гледжання яны могуць гэтыя візы не выдаваць. Справа ў самім прынцыпе — складанні нейкага спіса за нейкія міфічныя парушэнні».

Гігін мяркуе, што рашэнне Рады ЕС аб абмежаванні ўезду супярэчыць Еўрапейскай хартыі свабоды прэсы.

У сваю чаргу першы намеснік міністра інфармацыі Лілія Ананіч адзначае, што такія санкцыі парушаюць арт. 19 Міжнароднага пакта аб грамадзянскіх і палітычных правах, «дзе сказана даволі дакладна, што кожны чалавек мае права бесперашкодна прытрымлівацца сваіх палітычных перакананняў, права на свабоднае выказванне думкі».

Пры гэтым у самой Беларусі дзяржаўныя СМІ выказваюць пазіцыю толькі аднаго палітыка, а некалькі дзясяткаў крытычных выданняў былі закрыты рознымі спосабамі. У краіне няма ніводнага тэле- ці радыёканала, на якіх гучалі б альтэрнатыўныя пункты гледжання. За грошы падаткаплатнікаў утрымліваецца шматтысячны ідэалагічны апарат, які праводзіць інтарэсы аднаго палітыка. Толькі за апошні год у крымінальнай турме пабывалі ці застаюцца там журналісты Ірына Халіп, Наталля Радзіна, Зміцер Бандарэнка, Алесь Атрошчанкаў, Андрэй Пачобут. За адзін вечар 6 ліпеня праз затрыманні прайшлі 23 рэпарцёры.

Гігін у сваіх артыкулах апраўдваў гэтыя захады і нават заклікаў да больш жорсткіх мераў супраць апазіцыі.

• 0
• 0
• 0
• 0
• 0
• 0
• 0
• 0