Nadzieja Jermakova. Top-7 cikavych faktaŭ pra hałoŭnuju bankirku

Pryznačeńnie staršyni praŭleńnia «Biełarusbanka» Nadziei Jermakovaj na pasadu kiraŭnicy Nacbanka — dobraja nahoda uzhadać cikavyja fakty ź jaje bijahrafii.

1. Samaja ŭschodniaja biełaruska z čynoŭnikaŭ

Pačniem ź miesca naradžeńnia. Nadzieja Jermakova pachodzić z kałhasnaj siamji ź vioski Razalmaŭ, što na Chocimščynie. Heta samy ŭschodni kraj Biełarusi. Darečy, bankircy zaraz 58 hadoŭ.

2. Pinska-minskaja adukacyja

U 1971 hodzie Nadzieja zakončyła Pinski ŭlikova-kredytny technikum, a praź siem hadoŭ atrymała i vyšejšuju adukacyju ŭ Biełaruskim dziaržaŭnym instytucie narodnaj haspadarki imia Kujbyšava (ciapier BDEU). Praŭda, zavočna.

3. Škłoŭskija iduć!

Nadzieja Jermakova — adna z najtypoviejšych pradstaŭnic łukašenkaŭskich čynoŭnikaŭ, jakija trapili z hrazi ŭ kniazi. Papracavaŭšy adzin hod (u 1983-m) kiraŭnicaj škłoŭskaj aščadkasy, jana pajšła na pavyšeńnie, staŭšy namieśnicaj staršyni miascovaha rajvykankama i kiraŭnikom finansavaha adździeła. Paśla prychodu da ŭłady Alaksandra Łukašenki, Nadzieja Jermakova raptoŭna trapiła ŭ kiraŭnictva «Biełarusbanka», dzie padniałasia z namieśnicy kiraŭnika da najvyšejšaj pasady.

4. Druhaja žančyna — staršynia Nacbanka

Jermakova stała druhoj žančynaj u Biełarusi, jakaja ŭznačaliła Nacyjanalny bank. Pieršaj była Tamara Vińnikava, jakaja pryjšła na źmienu Stanisłavu Bahdankieviču, što padaŭ u adstaŭku. Ale biełarusam Vińnikava zapomniłasia pieradusim nie svajoj finansavaj dziejnaściu, a tajamničymi ŭciokami z-pad chatniaha aryštu ŭ Vielikabrytaniju.

5. Hałoŭnaja fieministka Biełarusi

Novaja kiraŭnica Nacbanka voś užo dvanaccać hadoŭ źjaŭlajecca zaadno i staršynioj Sajuza biełaruskich žančyn. Voś tolki jaje pośpiechaŭ u abaronie pravoŭ słaboha połu pakul zaŭvažana nie było.

6. Nieščaślivyja šluby

Nadzieja Jermakova była ŭ šlubie ŭ dvojčy, ale abiedźvie sproby ciažka nazvać ščaślivymi. Ad pieršaha muža Nadzieja była vymušana ŭciačy z Chocimska ŭ Kiraŭsk, što kala Babrujska, razam z maleńkaj dačkoj Natašaj. Pryčyna banalnaja — ałkahalizm muža, jaki pryvioŭ da jaho chutkaj śmierci…

Jašče adna dačka, Jula, naradziłasia ad druhoha šlubu. Dla muža Andreja heta taksama była druhaja siamja. Jon pracavaŭ u sistemie ŭ MUS, ale, pa słovach Nadziei Jermakovaj, tak i nie zdoleŭ adaptavacca ŭ Minsku. U vyniku pačaŭ mocna pić, što pryviało da razvodu. Praz paru hadoŭ paśla viartańnia ŭ svaju pieršuju siamju jon pamior.

7. «Nu navošta vam hety dalar?»

Nadzieja Jermakova — adna z samych krasamoŭnych pradstaŭnic biełaruskaj ekanomiki apošniaha hodu. Jana nie baicca vykazvać svajo sumburnaje razumieńnie finansavaha rynku krainy, za što paśla davodzicca adduvacca inšym čynoŭnikam. Samy znakamity jaje vystup — intervju telekanału «Rasija» z asnoŭnym pasyłam «Navošta vam hety dalar?»

Siarod inšych jaje «spoviedziaŭ» — niečakanaja ščyraść u mai 2011-ha, kali jana pryznałasia ŭ adtoku depazitaŭ z «Biełarusbanka» ahulnym abjomam u tryljon rubloŭ, čym spravakavała jašče adnu chvalu paniki.

• 0
• 0
• 0
• 0
• 0
• 0
• 0
• 0