Praletarski fłeš-mob
Nu, možna niejki čas hurtavać paspality lud koštam nahniatańnia atmasfery atočanaj cytadeli. Ale iści ŭ ziamlanki nasamreč achvotnikaŭ mała. Chutčej mohuć vyjści na płošču. Piša Alaksandar Kłaskoŭski.
Jakija vobrazy budučyni malujucca zaraz biełaruskamu kiraŭnictvu?
Nie vyklučaju, što śviadomaść vysokaha ajčynnaha načalstva ekstrapaluje na perspektyvu ŭražalnyja frahmenty buntu mienskich pracoŭnych u krasaviku 1991-ha.
Pamiataju, jak u adzin ź pieršych dzion taho krasavika my na redakcyjnym lehkaviku źnianacku trapili ŭ hušču praletaraŭ, što prosta pa prajeznaj častcy išli z Zavodzskaha rajonu na płošču Lenina.
Mašynu achapiła ščylnaja płyń ludziej ŭ zašmalcavanych robach dy pudovych čaravikach. Ciažkimi byli i ichnija pozirki. Pasažyry biełaj "Vołhi" — typova namenklaturnaj marki:) — peŭna, zdavalisia praletaram klasavymi vorahami.
— Zaraz pierakulać! — mižvoli vyhuknuŭ kaleha.
Ščyra kažučy, było sapraŭdy niaŭtulna. Až pakul naša maleńkaja kamanda nia vyłuznułasia ź lehkavika dy nie zaniałasia zvykłaj prafesijnaj pracaj z natatnikami i fotakameraj.
A voś sapraŭdnaja namenklatura tady siadzieła jak myš pad miatłoj. Darečy, varta adznačyć: adnym ź ličanych kiraŭnikoŭ, chto advažvaŭsia vychodzić na burlivuju płošču, byŭ namieśnik staršyni Viarchoŭnaha savietu Šuškievič.
Da Domu ŭradu tady, zdajecca, ściahnuli niejkija ŭzbrojenyja adździeły. Ale, pa-pieršaje, nie było jašče takich admysłova vymuštravanych kadraŭ, a pa-druhoje, naŭrad ci chto naviersie aśmieliŭsia b addać žorstki zahad.
Bałazie, niejkimi palijatyvami tuju chvalu pahasili.
...Rana ci pozna i ciapierašni naftavy kanflikt z horam napałam ułahodziać. Rasieja vusnami Hrefa ŭčora ŭviečary ŭžo dała zrazumieć, što moža i skasavać svajo myta, kali Miensk pieršym zrobić krok nazad.
Ale fakt toje, što na raniejšyja preferencyi možna zabycca. Tak, rasiejcy buduć adsiakać chvost za niekalki pryjomaŭ, bo ekanamičny abvał u Biełarusi nia nadta patrebien i samoj Maskvie. Adnak da 2011 hodu košt hazu siahnie na eŭrapiejski uzrovień. Nu a prybytkami ad prodažu salarki dy benzynu daviadziecca dzialicca — nia toje słova, adryvać ad serca lvinuju dolu! — užo nieŭzabavie.
Viadoma, ciapierašni režym nia pojdzie na taki samazabojčy krok, jak sajuzny ŭrad Paŭłava u krasaviku 91-ha. Tady spažyviecki košyk padaražeŭ adrazu amal što ŭdvaja. Ubačyŭšy, što za abied u zavodzskaj stałoŭcy treba vykłaści ŭžo nie rubiel, a dva (mnohim ža kabiety tady akurat pa rubli na dzień i vydavali!), praletarjat samaj savieckaj respubliki i pavaliŭ na płošču, nad jakoj ŭzvyšaŭsia čorny manument ichniaha mityčnaha pravadyra.
Zaraz uzrovień žyćcia, imavierna, pačnie prasiadać spakvala. Ale ž i zapyty ŭžo inšyja. Narod zbolšaha pavieryŭ na pobytavym uzroŭni ŭ doŭhaterminovy stanoŭčy trend. Letaś, analizujučy statystyku dachodaŭ-vydatkaŭ chatnich haspadarak, ekanamisty ćvierdzili: biełarusy zdradzili zvyčcy nazapašvać! Jany stali tranžyrami!
Viravaŭ spažyviecki bum, prahna nabyvali ŭsio — ad krutych mabiłaŭ da lehkavikoŭ.
Kiroŭnyja viarchi ŭźnieśli da niabiosaŭ biełaruski ekanamičny cud. Pierad kožnymi vybarami rabilisia ščodryja padarunki elektaratu. Enerhietyčnaja renta zbolšaha prajadałasia, vyhadnaja kanjunktura skarystoŭvałasia najpierš dziela vyrašeńnia rejtynhavych zadačaŭ.
Ciapier ŭłada apynajecca ŭ zakładnikach raniejšaha pryncypu "žyvi siońniašnim dniom". Kryza zavyšanych spadziavańniaŭ nasielnictva moža spracavać jak detanatar sacyjalnych zabureńniaŭ.
Naturalna, ekanomika maje peŭnuju inercyju, i narastańnie admoŭnych čyńnikaŭ zdolnaje dasiahnuć hroznaha maštabu mo' praz dva-try hady.
Naviersie vydatna razumiejuć, što tryvałaść elektaralnaj bazy dasiul zabiaśpiečvałasia zusim nie idealistyčnaj vieraj ŭ pastulaty dziaržaŭnaj idealohii, a prahmatyčnymi čyńnikami.
Nu, možna niejki čas hurtavać paspality lud koštam nahniatańnia atmasfery atočanaj cytadeli. Ale iści ŭ ziamlanki nasamreč achvotnikaŭ mała. Chutčej pojduć na płošču.
A kali na palityčnaje pole vyjdzie taki hulec, dyk mała nia zdasca. Heta vam nia kupka fłeš-moberaŭ i nia kvoły pikiet na Banhalory.
Zaraz šmat havorycca pra alternatyvu rynkavych reformaŭ. Ale ž reformy zdolnyja na niejki čas tolki prymnožyć ekanamičnyja niahody.
Imavierna, uładzie daviadziecca vybirać miž kiepskim i vielmi kiepskim.
Kamientary