Запланаваная на сераду сустрэча прэзідэнта Украіны Віктара Януковіча з лідарамі апазіцыі адбудзецца пасля таго, як у Кіеве спыніцца ўзброенае супрацьстаянне.
Пра гэта ў каментары Радыё Свабода сказала дэпутат ад Партыі рэгіёнаў Ганна Герман.
«Перамовы адбудуцца, толькі калі спыняцца метады барацьбы, калі апазіцыя прыбярэ людзей са зброяй з вуліц і калі адновіцца спакой у краіне. Тады трэба садзіцца за стол перамоваў», — адзначыла яна.
«Трэба дамаўляцца. Тое, што робіць цяпер апазіцыя, заклікаючы далей да ўзброенага супрацьстаяння, — гэта вялікае злачынства супраць украінскага народа і ўкраінскай дзяржавы», — заявіла Герман.
«Лідары апазіцыі павінны апамятацца і спыніць весці людзей на кровапраліцце», — дадала яна.
Паводле яе слоў, прэзідэнт Украіны «заклікаў і заклікае да таго, каб вярнуцца да мірных перамоваў, каб вярнуць у краіну спакой і спыніць кровапраліцце».
Каментары