Новы рэліз берасьцейцаў увайшла песьня на словы Ўладзімера Някляева «Апокрыф», дуэт з Ілонай Карпюк «Па-за гульнёй» і пераасэнсаваньне этапнай для гурта рэчы – «Слова».
EP «Genesis» яскрава дэманструе тры складнікі творчасьці гурта Sciana – драйв, лірыка і мэтафізіка. Сынгл паўстаў шмат у чым дзякуючы Зьмітру Назараву, дырэктару гурта. «Усе тры песьні зусім розныя, але ў кожнай зь іх ёсць адлюстравана нашае жыцьцё ў цяперашні пэрыяд. Я вельмі паважаю сваю каманду за тое, што ў няпросты для нас час яны захоўваюць сваё сяброўства, падтрымліваюць адзін аднаго і рухаюцца наперад», – кажа Зьміцер.
Яшчэ адзін новы твор «Па-за гульнёй» вакаліст гурта Павал «Пашцет» Прохараў запісаў разам з Ілонай Карпюк, беларускай з Польшчы, вакалісткай гурта Ilo&friends. Песьня была створана пры ўдзеле саўндпрадусара зь Беластоку Лукаша Сьцепанюка. «Згадваю як сьвяткавала са «Сьцяной» іх пяцігодзьдзе, у зусім іншых абставінах, культурных, жыцьцёвых і ніколі не падумала б, што такі прыемны момант прыдзе, што разам з Пашцетам прасьпяваем, – кажа Ілона. – Хаця мы сьпявалі ўжо разам – шпацыруючы па вуліцах Берасьця, пад адну гітару і гэта надалей для мяне важны ўспамін, знак сяброўства, якое застаецца праз гады. А часам прыносіць вось такія сюрпрызы».
Трэцяя песьня ў рэлізе добравядомая сталым прыхільнікам гурта. Пад назвай «Эвангельле ад Сьцяны» яна выходзіла на самым першым альбоме каманды «Рыфмы лёсаў» (2002), зь ёй музыкі дэбютавалі на «Тузіне» 12 год таму – яна ўдзельнічала ў чарце пад назвай «Першы гук». У новай вэрсіі яна істотна перароблена ў музычным пляне ды перайменавана ізноў – у «Слова». Уласна ў гэтым творы і раскрываецца ідэйная сутнасьць сынглу.
Песьні з EP «Genesis» гурт прэзэнтуе на сваіх выступах у Беларусі ды Ўкраіне. 18-га музыкі граюць у Віцебску, 19-га – у Магілёве, 25-га ў Львове, 26-га ў Тэрнопалі. У траўні заплянаваныя канцэрты ў Менску, Горадні, Берасьце. За навінамі гурта Sciana можна сачыць празь іх афіцыйную суполку.
Каментары