Нацыянал-кансерватары «Закона і справядлівасці» трыумфальна перамаглі ў Польшчы
Нацыянальна-кансерватыўная партыя «Закон і справядлівасць» перамагае на парламенцкіх выбарах у Польшчы. Яна набірае каля 38%. Гэта дасць ёй абсалютную большасць у парламенце і магчымасць самастойна сфарміраваць урад.
За «Грамадзянскую платформу» (кіраўнік — дзеючы прэм'ер Ева Копач) аддалі галасы 23%. Антысістэмная партыя спевака Кукіза — 9%, ліберальная партыя «Сучасная Польшча» — 7%, Польская сялянская партыі — 5%.
Левыя зусім не праходзяць у Сойм.
Яўка склала 51%.
У маі кандыдат ад «Права і справядлівасці» Анджэй Дуда быў абраны прэзідэнтам Польшчы.
Яраслаў Качынскі заявіў, што ў выпадку перамогі не збіраецца быць прэм'ерам, на гэту пасаду ён вылучыў сваю намесніцу Беату Шыдла.
Польскія ліберал-кансерватары з кіраўнічай Грамадзянскай платформы і нацыянал-кансерватары з «Закона і справядлівасці» кансэнсусна праводзяць палітыку, скіраваную на падтрымку незалежнасці Беларусі і Украіны.
Польскія нацыяналісты, у сваю чаргу, да беларусаў і ўкраінцаў ставяцца непрыхільна, а са стратай Вільні, Гродна і Львова не змірыліся. Да іх ліку можна залічыць Кукіза. У той жа час Корвін-Міке, як і частка Аб'яднаных левых, звязаныя з Масквой. Праўда, цяпер іх голас мала што будзе значыць.
У Польшчы для пападання ў Сойм партыя павінна набраць мінімум 5% галасоў, а блок — 8%. Сістэма выбараў у Сойм — прапарцыйная. У Сенат жа выбіраюць па мажыратарнай сістэме простай большасцю галасоў.
У Сойме 460 дэпутатаў, у Сенаце — 100.
Магчыма, менавіта адна з меншых партый і стане партнёрам пераможцы па ўрадавай кааліцыі.
Апошнія восем гадоў Польшчай кіравала кааліцыя Грамадзянскай платформы і Польскай сялянскай партыі.
Польшча — дэмакратычная краіна, кіруючая і апазіцыйныя сілы маюць роўны доступ у тым ліку да дзяржаўных СМІ.
Асаблівасцю апошніх выбараў стала тое, што ўпершыню абедзве найбуйнейшыя партыі на выбары вялі жанчыны.
Перамога «Закона і справядлівасці» азначае больш кансерватыўную палітыку Польшчы ў сацыяльных пытаннях, яшчэ большы акцэнт на адстойванне нацыянальных інтарэсаў і барацьбу з карупцыяй.
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным6
Каментары