Такаеў падчас сустрэчы з Пуціным заклікаў яго замарозіць вайну ва Украіне
Прэзідэнт Казахстана Касым-Жамарт Такаеў падчас адкрытай часткі сустрэчы з прэзідэнтам Расіі Уладзімірам Пуціным у расійскім Омску нечакана закрануў тэму вайны ва Украіне. Ён заявіў, што Казахстан разглядае яе як міждзяржаўны канфлікт, адзначыў, што прырода гэтага супрацьстаяння «не зусім зразумелая» для многіх краін, і прапанаваў разгледзець магчымасць яго «замарожвання».
Спачатку Такаеў, як і Пуцін, гаварыў пра развіццё супрацоўніцтва паміж дзвюма дзяржавамі. Аднак пасля паведаміў, што атрымлівае шмат сігналаў з Еўропы і ЗША адносна расійска-ўкраінскай вайны і ўжо абмяркоўваў гэта з Пуціным падчас тэлефонных размоў.
Кіраўнік Казахстана падкрэсліў, што з самага пачатку лічыць гэты канфлікт менавіта міждзяржаўным, а не грамадзянскай вайной.
Такая ацэнка адрозніваецца ад ранейшых заяў расійскага кіраўніцтва, якое неаднаразова характарызавала падзеі ва Украіне як унутраны канфлікт.
Такаеў таксама адзначыў, што Казахстан з павагай ставіцца да ўкраінскага народа, яго культуры і мовы. Паводле яго слоў, паходжанне гэтага канфлікту застаецца цяжкім для разумення, у адрозненне ад іншых вядомых тэрытарыяльных спрэчак, дзе гістарычныя прычыны былі больш відавочнымі.
Пры гэтым казахстанскі прэзідэнт некалькі разоў выказаў станоўчую ацэнку дзеянням Пуціна, у тым ліку адзначыў яго, маўляў, дыпламатычную гнуткасць падчас нядаўніх міжнародных перамоў.
Напрыканцы Такаеў прапанаваў разгледзець магчымасць «замарозіць» баявыя дзеянні і вярнуцца да перамоўнага фармату, які ён назваў «Стамбул 2.0». Ён адзначыў, што папярэднія перамовы ўжо давалі пэўныя вынікі, а далейшае ўрэгуляванне магло б адбывацца пры міжнародных гарантыях, у тым ліку з удзелам Расіі.
«Гэта проста маё сціплае меркаванне, раз ужо да мяне звяртаюцца. Магчыма, гэты канфлікт ужо варта замарозіць і вярнуцца да Стамбульскай формулы 2.0. Там былі дасягнутыя значныя вынікі. Натуральна, пад гарантыі вялікіх дзяржаў, уключаючы Расію. І далей рухацца ў бок доўгачаканага міру», — заявіў прэзідэнт Казахстана.
Ён таксама адзначыў:
«Шкада, вядома, маладыя людзі гінуць. Гэта генафонд «брацкіх народаў», Расіі і Украіны. І ўсё гэта трэба спыняць, бо тое, што адбываецца, на мой перакананы погляд, гэта на руку і ў радасць праціўнікам — і Расіі, і ўкраінскай дзяржавы».
Па выгляду Пуціна было відаць, што выказванні Такаева яму не надта спадабаліся. Ён, аднак, суха падзякаваў казахстанскаму лідару і паведаміў, што падчас закрытай часткі сустрэчы больш падрабязна праінфармуе яго пра сітуацыю вакол «украінскага напрамку». На гэтым адкрытая трансляцыя сустрэчы завяршылася.
Трамп: Пуцін разумее, што ЗША прадаюць зброю краінам НАТА, а не непасрэдна Украіне
Грыбаўскайце: Калі расіяне не зменяцца, лепш мець жалезную заслону
Пуцін ацаніў сітуацыю з палівам у Расіі
Пуцін адмаўляецца ад перамоваў да поўнага захопу Данбаса
Ільхам Аліеў расказаў пра патаемную расійска-нямецкую сустрэчу ў Баку
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам23
Каментары