Генпракуратура: Супрацоўнікі КДБ дзейнічалі ў межах прадастаўленых правоў і ў адпаведнасці з заканадаўствам
Генпракуратура пракаментавала ўчорашнія падзеі на вуліцы Якубоўскага ў Мінску, у выніку якіх загінулі супрацоўнік КДБ і айцішнік Андрэй Зельцэр.
Генеральная пракуратура правяла праверку па факце прымянення агнястрэльнай зброі супрацоўнікамі КДБ, што пацягнула за сабой смерць жыхара Мінска, гаворыцца ў паведамленні.
Устаноўлена, што гэты грамадзянін абгрунтавана падазраваўся ў здзяйсненні асабліва небяспечных злачынстваў, звязаных з тэрарызмам. Супрацоўнікі КДБ з панятымі на падставе пастановы аб правядзенні ператрусу, санкцыянаванага намеснікам Генеральнага пракурора, прыбылі да жылля падазраванага.
Неаднаразовыя патрабаванні адчыніць дзверы і ўпусціць у жыллё, папярэджанні аб выкарыстанні прылад для ўскрывання гаспадар праігнараваў. Пасля чаго праваахоўнікі на законных падставах адчынілі дзверы і ўвайшлі ў кватэру.
Там падазраваны двойчы стрэліў у супрацоўнікаў КДБ з агнястрэльнай зброі, прычыніўшы аднаму з вартавых закона агнястрэльнае раненне, што пацягнула смерць.
Супрацоўнікі КДБ, дзейнічаючы на падставе Закона Рэспублікі Беларусь «Аб органах дзяржаўнай бяспекі Рэспублікі Беларусь», зыходзячы з сітуацыі, якая склалася, у адказ на ўзброены напад ужылі агнястрэльную зброю, прычыніўшы злачынцу пашкоджанні, ад якіх ён памёр.
«Пракурорскай праверкай устаноўлена, што супрацоўнікі КДБ дзейнічалі ў межах прадастаўленых правоў і ў адпаведнасці з заканадаўствам», — адзначаецца ў паведамленні.
Каментары