«Гэта быў асноўны лагістычны калідор». Як цяпер «Беларуськалій» будзе пастаўляць прадукцыю на экспарт?
Пачатак года для «Беларуськалію» не задаўся. З лютага літоўская чыгунка плануе спыніць перавозку беларускіх угнаенняў. Экспарт усё? Расказваем, якім можа быць альтэрнатыўны маршрут паставак.
Транзіт беларускіх калійных угнаенняў праз літоўскую чыгунку быў выгадны абедзвюм краінам.
«Перавалка прыкладна каля 10 мільёнаў тон калійных угнаенняў — гэта вельмі сур’ёзныя аб’ёмы. І справа ў тым, што Беларусь збіралася іх павысіць: з сённяшніх 12,5 мільёнаў тон да 15 мільёнаў у 2025 годзе.
Меркавалася, што дадатковыя аб’ёмы пойдуць праз клайпедскі порт, як найбольш эфектыўны лагістычны калідор», — кажа эксперт па пытаннях паліўна-энергетычнага комплексу і калійнага рынку Таццяна Манёнак.
Клайпедскі порт быў асноўным для транспарціроўкі беларускага калію. Таму Беларусь будзе шукаць спосабы абысці забарону. Якім можа быць выйсце?
«Першае, што прыходзіць на розум, — магчымасць паставак праз расійскія кампаніі. Тым не менш няпроста будзе стварыць сумеснае прадпрыемства, напрыклад, з «Уралкаліем», бо эфект розных санкцый можа ўплываць на сітуацыю.
Але сёння даволі высокія кошты на калійныя ўгнаенні на сусветных рынках, і тыя страты, якія відавочна будзе несці Беларуская калійная кампанія, часткова будуць кампенсаваныя за кошт больш выгаднай кан’юнктуры».
Ёсць альтэрнатыўныя маршруты паставак. Асноўны — праз Расію.
«Беларуская калійная кампанія раней яшчэ апрабіравала Паўночны марскі шлях — па ім магчымы пастаўкі ў Кітай і Індыю. Больш магчымасцяў з’явяцца, напэўна, вясной, бо зімой складана працаваць па гэтым калідоры праз умовы надвор’я. Але ў іншыя краіны з гэтага калідора ладзіць пастаўкі больш складана», — тлумачыць эксперт.
Праблема яшчэ ў тым, што ў портах Ленінградскай вобласці не хапае магутнасцяў. Паглядзець на прыкладзе нафтапрадуктаў. Беларусь збіралася летась паставіць праз порты Піцера каля 3,5 мільёнаў тон нафтапрадуктаў, але паставіла толькі 1,8 мільёна. Бо шукала больш эфектыўныя маршруты.
«Беларускі бок будзе шукаць магчымасць пераарыентавацца часткова на рынкі іншых краін. Гэта будзе зрабіць складана, бо рынак спецыфічны. Дый страціць традыцыйных пакупнікоў для Беларускай калійнай кампаніі вельмі балюча», — лічыць Таццяна Манёнак.
Чытайце таксама:
Шрайбман: Гэта будзе самы моцны аднамомантны эканамічны ўдар з усяго, што Захад рабіў з Мінскам дагэтуль
Колькі страціць «Беларуськалій» ад сыходу Yara? Спрабуем падлічыць
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі1
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары