Украіну будзе прадстаўляць на «Еўрабачанні» група Tvorchi са спеваком з Нігерыі. Адбор прайшоў у кіеўскім метро
На песенным конкурсе «Еўрабачанне», які пройдзе ў наступным годзе ў Ліверпулі, ад Украіны выступіць група Tvorchi. Адзін з яе салістаў прыехаў ва Украіну з Нігерыі, піша Бі-бі-сі.
Фінал адбору ў суботу трансляваўся ў прамым эфіры ўкраінскага тэлебачання. Пераможца быў вызначаны паводле ацэнак журы і гледачоў, якія галасавалі ў мабільным дадатку.
Фінал Украінскага нацыянальнага адбору праходзіў на адной са станцый кіеўскага метро: гэта было неабходна дзеля бяспекі прысутных у выпадку паветранай трывогі. Cтанцыя часта служыць бамбасховішчам, але ў суботу там абсталявалі тэлестудыю.
«Мы зрабілі ўсё магчымае, каб правесці гэты адбор як след — і зноў аб'яднаць украінцаў вакол выбару тых, хто выйдзе на самую вялікую музычную сцэну Еўропы, — сказала «Бі-бі-сі» перад галасаваннем кіраўніца ўкраінскай дэлегацыі на «Еўрабачанні» Аксана Скібінская. — Нашым першым рашэннем было адправіцца ў метро. Так мы маглі быць упэўненыя, што шоу пройдзе без перапынкаў. Незалежна ад таго, ці будзе ў нас паветраная трывога, мы зможам працаваць».
Падчас трансляцыі гледачы перыядычна чулі, як на станцыі праходзілі цягнікі метро, аднак у астатнім тое, што адбывалася, нічым не адрознівалася ад шоу у звычайнай тэлестудыі.
«Мы зробім усё, што ў нашых сілах, каб годна выступіць за Украіну», — пракаментаваў сваю перамогу адзін з членаў і саўнд-прадзюсар групы Андрэй Гуцуляк.
Песня Heart Of Steel («Сталёвае сэрца»), з якой гурт адправіцца ў Ліверпуль, стала пятым зарэгістраваным музычным нумарам на «Еўрабачанні-2023».
Гурт Tvorchi выйшаў на сцэну ў суправаджэнні танцораў у процівагазах, а на экранах у студыі з'яўляліся радкі вершаў песні — напрыклад, «не бойся казаць тое, што ты думаеш».
«Я хачу сказаць: Дзякуй, Украіна!» — звярнуўся да тых, хто галасаваў за групу, вакаліст Джэфры Кені.
Tvorchi грае электронную музыку. Гурт быў заснаваны ў Тэрнопалі ў 2018 годзе саўнд-прадзюсарам Андрэем Гуцулякам і вакалістам Джэфры Кені. У яго ўжо ёсць чатыры альбомы.
Джэфры Кені нарадзіўся ў Нігерыі і прыехаў ва Украіну як студэнт Медыцынскага універсітэта.
«Еўрабачанне-2023» пройдзе ў Ліверпулі. Конкурс мусіў прайсці ў Украіне, бо летась на ім перамагла ўкраінская група Kalush Orchestra з песняй «Стефанія». У гутарцы з «Бі-бі-сі» ўдзельнікі Kalush Orchestra сказалі, што не сумняваюцца ў перамозе Украіны ў 2023 годзе.
Нягледзячы на вайну, Кіеў гатовы быў правесці конкурс ва Украіне, але Еўрапейскі вяшчальны саюз у гэтым адмовіў з меркаванняў бяспекі.
Большую частку канкурэнтаў Tvorchi складалі лірычныя балады з вершамі пра вайну. Самай верагоднай пераможцай нацыянальнага фіналу букмекеры называлі Jerry Heil (сапраўднае імя якой Яна Шамаева) з песняй When God Shut The Door («Калі Бог зачыніў дзверы»). Гэтая песня, па словах самой спявачкі, была напісана ў першыя месяцы пачатку поўнамаштабнай вайны, калі шокавы стан ад нападу быў вельмі моцным. «Сёння наша перамога — гэта не проста вера, а ўпэўненасць, пытанне часу», — распавядала Jerry Heil. У песні аб'яднаная англамоўная і ўкраінамоўная лірыка.
Украіна ўпершыню пачала прымаць удзел у «Еўрабачанні» ў 2003 годзе, і з тых часоў тры разы перамагала (Руслана, Джамала і Kalush) і ўсяго шэсць разоў не ўвайшла ў першую дзясятку.
Сёлета Украінскі вяшчальны саюз атрымаў 400 песень ад 299 музыкаў, якія спадзяваліся прыняць удзел у суботнім адборы.
Цяпер чытаюць
«Губазікаўцы схіляюць Калеснікаву да высылкі, але яна не хоча»1
Каментары