Ukrainu budzie pradstaŭlać na «Jeŭrabačańni» hrupa Tvorchi sa śpievakom ź Nihieryi. Adbor prajšoŭ u kijeŭskim mietro
Na piesiennym konkursie «Jeŭrabačańnie», jaki projdzie ŭ nastupnym hodzie ŭ Livierpuli, ad Ukrainy vystupić hrupa Tvorchi. Adzin ź jaje salistaŭ pryjechaŭ va Ukrainu ź Nihieryi, piša Bi-bi-si.
Finał adboru ŭ subotu tranślavaŭsia ŭ pramym efiry ŭkrainskaha telebačańnia. Pieramožca byŭ vyznačany pavodle acenak žury i hledačoŭ, jakija hałasavali ŭ mabilnym dadatku.
Finał Ukrainskaha nacyjanalnaha adboru prachodziŭ na adnoj sa stancyj kijeŭskaha mietro: heta było nieabchodna dziela biaśpieki prysutnych u vypadku pavietranaj tryvohi. Ctancyja časta słužyć bambaschoviščam, ale ŭ subotu tam abstalavali telestudyju.
«My zrabili ŭsio mahčymaje, kab pravieści hety adbor jak śled — i znoŭ abjadnać ukraincaŭ vakoł vybaru tych, chto vyjdzie na samuju vialikuju muzyčnuju scenu Jeŭropy, — skazała «Bi-bi-si» pierad hałasavańniem kiraŭnica ŭkrainskaj delehacyi na «Jeŭrabačańni» Aksana Skibinskaja. — Našym pieršym rašeńniem było adpravicca ŭ mietro. Tak my mahli być upeŭnienyja, što šou projdzie bieź pierapynkaŭ. Niezaležna ad taho, ci budzie ŭ nas pavietranaja tryvoha, my zmožam pracavać».
Padčas tranślacyi hledačy pieryjadyčna čuli, jak na stancyi prachodzili ciahniki mietro, adnak u astatnim toje, što adbyvałasia, ničym nie adroźnivałasia ad šou u zvyčajnaj telestudyi.
«My zrobim usio, što ŭ našych siłach, kab hodna vystupić za Ukrainu», — prakamientavaŭ svaju pieramohu adzin z členaŭ i saŭnd-pradziusar hrupy Andrej Huculak.
Pieśnia Heart Of Steel («Stalovaje serca»), ź jakoj hurt adpravicca ŭ Livierpul, stała piatym zarehistravanym muzyčnym numaram na «Jeŭrabačańni-2023».
Hurt Tvorchi vyjšaŭ na scenu ŭ supravadžeńni tancoraŭ u procivahazach, a na ekranach u studyi źjaŭlalisia radki vieršaŭ pieśni — naprykład, «nie bojsia kazać toje, što ty dumaješ».
«Ja chaču skazać: Dziakuj, Ukraina!» — źviarnuŭsia da tych, chto hałasavaŭ za hrupu, vakalist Džefry Kieni.
Tvorchi hraje elektronnuju muzyku. Hurt byŭ zasnavany ŭ Ternopali ŭ 2018 hodzie saŭnd-pradziusaram Andrejem Huculakam i vakalistam Džefry Kieni. U jaho ŭžo jość čatyry albomy.
Džefry Kieni naradziŭsia ŭ Nihieryi i pryjechaŭ va Ukrainu jak student Miedycynskaha univiersiteta.
«Jeŭrabačańnie-2023» projdzie ŭ Livierpuli. Konkurs musiŭ prajści ŭ Ukrainie, bo letaś na im pieramahła ŭkrainskaja hrupa Kalush Orchestra ź pieśniaj «Stiefanija». U hutarcy z «Bi-bi-si» ŭdzielniki Kalush Orchestra skazali, što nie sumniavajucca ŭ pieramozie Ukrainy ŭ 2023 hodzie.
Niahledziačy na vajnu, Kijeŭ hatovy byŭ pravieści konkurs va Ukrainie, ale Jeŭrapiejski viaščalny sajuz u hetym admoviŭ ź mierkavańniaŭ biaśpieki.
Bolšuju častku kankurentaŭ Tvorchi składali liryčnyja bałady ź vieršami pra vajnu. Samaj vierahodnaj pieramožcaj nacyjanalnaha finału bukmiekiery nazyvali Jerry Heil (sapraŭdnaje imia jakoj Jana Šamajeva) ź pieśniaj When God Shut The Door («Kali Boh začyniŭ dźviery»). Hetaja pieśnia, pa słovach samoj śpiavački, była napisana ŭ pieršyja miesiacy pačatku poŭnamaštabnaj vajny, kali šokavy stan ad napadu byŭ vielmi mocnym. «Siońnia naša pieramoha — heta nie prosta viera, a ŭpeŭnienaść, pytańnie času», — raspaviadała Jerry Heil. U pieśni abjadnanaja anhłamoŭnaja i ŭkrainamoŭnaja liryka.
Ukraina ŭpieršyniu pačała prymać udzieł u «Jeŭrabačańni» ŭ 2003 hodzie, i z tych časoŭ try razy pieramahała (Rusłana, Džamała i Kalush) i ŭsiaho šeść razoŭ nie ŭvajšła ŭ pieršuju dziasiatku.
Sioleta Ukrainski viaščalny sajuz atrymaŭ 400 piesień ad 299 muzykaŭ, jakija spadziavalisia pryniać udzieł u subotnim adbory.
Kamientary