Як сабраць дзіця ў школу з найменшай шкодай для яго здароўя

Па словах спецыялістаў упраўлення гандлю і паслуг Мінгарвыканкама, камплект усяго неабходнага для вучня малодшых класаў абыдзецца ў суму ад 370 да 1122 рублёў. А вось для школьніка старэйшых класаў сума істотна большая. Бацькам давядзецца патраціць ад 462 да 1392 рублёў.

Спецыялісты не гавораць, чаму такая істотная разбежка паміж мінімальнай і максімальнай лічбай. Хаця максімальная можа расці да бясконцасці, калі дазваляюць фінансы бацькоў.

Але нават калі ў вас фінансы неабмежаваныя, гэта не азначае, што можна набываць свайму школьніку ўсё, што душа пажадае. Спецыялісты у інтэрв'ю Kufar.by раяць звяртаць увагу на якасць і практычнасць рэчаў.

Адзенне

Так, пры набыцці адзення трэба ўважліва вывучыць склад тканіны. Пажадана, каб там было больш натуральных валокнаў. Бо дзеці нашмат фізічна актыўнейшыя за дарослых. Адпаведна і потавыдзяленне ў іх большае. Натуральныя тканіны лепш дыхаюць і паглынаюць вільгаць. А вось у вырабах з сінтэтычных тканін дзіця будзе больш пацець.

Па меркаванні спецыялістаў, найлепш калі тканіна для школьнай формы складаецца са змешаных валокнаў. Пры гэтым бавоўны або воўны ў ёй мусіць быць не меней за 40%.

Таксама ў склад павінна ўваходзіць віскоза. Яна дадае тканіне мяккасці і лёгкасці, добра рэгулюе цеплаабмен. Дадатак сінтэтычных валокнаў, такіх як эластан або поліэстр дазволяць вырабу добра сядзець (дзякуючы эластычнасці) на фігуры і павялічаць тэрмін носкі.

Абутак

Абутак пажадана выбіраць з натуральных складнікаў. Калі няма магчымасці набыць з натуральнай скуры, то лепш звярнуць увагу на мадэлі з камбінаваных матэрыялаў, у якіх верх выкананы са скуразамяняльніка, а натуральны матэрыял знаходзіцца ўсярэдзіне. Пры гэтым лепш за ўсё, каб замест шнуркоў у абутку для малодшых школьнікаў былі ліпучкі. Гэта дазволіць падагнаць яго пад дзіцячую ступню і ўлічваць рост нагі.

Каб пазбегнуць плоскаступнёвасці ў абутку, пажадана, каб быў невялікі каблук, жорсткі заднік і супінатар. Падэшва мусіць быць дастаткова гнуткай і добра амартызаваць. Пажадана, каб яна не слізгала па падлозе.

Дактары не раяць таксама выбіраць такі абутак як берцы, бо ў іх дрэнна працуе ступня, адмовіцца ад вастраносых мадэляў і вузкіх туфляў, бо яны будуць здушваць стопы і пальцы.

Спецыялісты таксама раяць выбіраць закрытыя або напалову закрытыя мадэлі, бо басаножкі або туфлі з адкрытым мыском, а таксама сандалі не могуць правільна фіксаваць ступню школьніка.

Рукзак

Па меркаванні спецыялістаў для пераноскі падручнікаў лепш за ўсё падыходзіць рукзак. У адрозненні ад сумкі ён не будзе нагружаць шкілет з аднаго боку, а размяркуе пагрузку на пазваночнік пароўну.

Пры выбары рукзака неабходна звярнуць увагу на лямкі. Яны мусяць быць шырокімі і рэгулявацца па вышыні. Частка рукзака, якая прылягае да спіны, мусіць быць адносна жорсткай і мець выступальны профіль, што стварае вентыляцыю паміж спінаю і задняй сценкай.

Для малодшых школьнікаў важна, каб спінка ў рукзаку была артапедычнай (эрганамічнай, анатамічнай). Гэта дапамагае размеркаваць нагрузку на плечы і паясніцу, а таксама падтрымліваць правільную паставу.

Для малодшых школьнікаў лепш падыдзе ранец. У адрозненні ад рукзаку ён мае жорсткі каркас і эрганамічную спінку. Замест маланкі ў яго выкарыстоўваецца крышка з зашпількаю.

Спецыялісты таксама раяць, каб у рукзакоў была зручная ручка, тады пры паездцы ў транспарце школьніку будзе камфортна трымаць яго ў руцэ, каб не перашкаджаць іншым.

Добра, калі рукзак мае трывалы ніз, які складаецца з некалькіх слаёў тканіны, або нават пластыкавы. У такім разе гэта перасцеражэ ад прамакання падручнікаў, калі рукзак паставіць на мокрае.

Варта таксама звярнуць увагу на наяўнасць на рукзаку або ранцы святлоадбівальных элементаў.

Школьныя прылады

Што тычыцца школьных прыладаў, то пажадана, каб яны былі з трывалых матэрыялаў і не мелі ніякіх дробных здымных частак, якія можна лёгка ўдыхнуць або праглынуць. Таксама пластык не мусіць мець выражанага паху, што сведчыць аб яго таксічнасці. Па магчымасці пры пакупцы варта звярнуць увагу на наяўнасць сертыфікатаў адпаведнасці і гігіенічных стандартаў.

Чытайце яшчэ:

Ад 370 да 1392 рублёў. Колькі каштуе сабраць дзіця ў школу

Беларускае школьнае адзенне ахоўвае ад выпрамянення мабільных тэлефонаў

Школьную форму хочуць зрабіць з дзяржаўнай сімволікай

Дзяржстандарт забараніў продаж школьнага адзення вядомай гандлёвай маркі

• 0
• 0
• 0
• 0
• 0
• 0
• 1
• 0