Расія пасля атак дронаў на ўласныя НПЗ нарошчвае імпарт бензіну з Беларусі
Звычайна расейцы калі і куплялі ў Беларусі паліва, то зусім няшмат. Але ў сакавіку ім прыйшлося імпартаваць 3 тыс. тон бензіну, тады як у лютым гэты паказчык дасягнуў 590 тон. У студзені ж паставак з Беларусі увогуле не было, паведамляе Reuters на падставе інфармацыі ад чатырох крыніц з нафтавай галіны і гандлёвай сферы.
Беларусь, як вядома, мае два нафтаперапрацоўчыя заводы: у Наваполацку і Мазыры. Магутнасць кожнага з іх складае 12 млн тон у год, але звычайна яны перапрацоўваюць каля 9 млн тон у год.
Наколькі Беларусь можа павялічыць вытворчасць, пакуль незразумела, крыніцы Reuters кажуць, што ў іх ёсць тэхнічныя вузкія месцы. Цяпер паміж урадамі краін і нафтавымі кампаніямі працягваюцца перамовы. Пра гэта паведамілі Reuters дзве крыніцы з нафтавай галіны, якія пажадалі застацца ананімнымі, таму што не мелі права выступаць публічна.
Адна з гэтых крыніц адзначыла, што перамовы ішлі складана, бо Беларусь ставіць у прыярытэт экспарт свайго паліва на іншыя рынкі. А колькі паліва спатрэбіцца Расіі, будзе залежаць ад тэрмінаў рамонту НПЗ, паведаміла іншая крыніца.
У сваю чаргу, расійскія нафтавыя кампаніі могуць павялічыць пастаўкі нафты на беларускія НПЗ у абмен на дадатковыя пастаўкі нафтапрадуктаў у Расію.
Міністэрства энергетыкі Расіі і беларуская дзяржаўная нафтавая кампанія «Белнафтахім» на просьбы аб каментарах не адказалі. Тое ж самае зрабілі і расійскія «Раснафта», «Лукойл», «Татнафта» і «Газпрамнафта» — усе асноўныя пастаўшчыкі нафты ў Беларусь і аператары аўтазаправачных станцый у краіне.
Раней Расія ўжо забараніла экспарт бензіну з 1 сакавіка, каб паспрабаваць забяспечыць дастатковую колькасць паліва для ўнутранага рынку.
Цяпер чытаюць
Радыёвядучы расказаў пра ўнутраную кухню АНТ — і пра тое, як ператварыўся ў палітвязня1
Каментары