Rasija paśla atak dronaŭ na ŭłasnyja NPZ naroščvaje impart bienzinu ź Biełarusi
Zvyčajna rasiejcy kali i kuplali ŭ Biełarusi paliva, to zusim niašmat. Ale ŭ sakaviku im pryjšłosia impartavać 3 tys. ton bienzinu, tady jak u lutym hety pakazčyk dasiahnuŭ 590 ton. U studzieni ž pastavak ź Biełarusi uvohule nie było, paviedamlaje Reuters na padstavie infarmacyi ad čatyroch krynic z naftavaj haliny i handlovaj śfiery.
Biełaruś, jak viadoma, maje dva naftapierapracoŭčyja zavody: u Navapołacku i Mazyry. Mahutnaść kožnaha ź ich składaje 12 młn ton u hod, ale zvyčajna jany pierapracoŭvajuć kala 9 młn ton u hod.
Nakolki Biełaruś moža pavialičyć vytvorčaść, pakul niezrazumieła, krynicy Reuters kažuć, što ŭ ich jość techničnyja vuzkija miescy. Ciapier pamiž uradami krain i naftavymi kampanijami praciahvajucca pieramovy. Pra heta paviedamili Reuters dźvie krynicy z naftavaj haliny, jakija pažadali zastacca ananimnymi, tamu što nie mieli prava vystupać publična.
Adna z hetych krynic adznačyła, što pieramovy išli składana, bo Biełaruś stavić u pryjarytet ekspart svajho paliva na inšyja rynki. A kolki paliva spatrebicca Rasii, budzie zaležać ad terminaŭ ramontu NPZ, paviedamiła inšaja krynica.
U svaju čarhu, rasijskija naftavyja kampanii mohuć pavialičyć pastaŭki nafty na biełaruskija NPZ u abmien na dadatkovyja pastaŭki naftapraduktaŭ u Rasiju.
Ministerstva enierhietyki Rasii i biełaruskaja dziaržaŭnaja naftavaja kampanija «Biełnaftachim» na prośby ab kamientarach nie adkazali. Toje ž samaje zrabili i rasijskija «Rasnafta», «Łukojł», «Tatnafta» i «Hazpramnafta» — usie asnoŭnyja pastaŭščyki nafty ŭ Biełaruś i apieratary aŭtazapravačnych stancyj u krainie.
Raniej Rasija ŭžo zabaraniła ekspart bienzinu z 1 sakavika, kab pasprabavać zabiaśpiečyć dastatkovuju kolkaść paliva dla ŭnutranaha rynku.
Ciapier čytajuć
Stała viadoma, što ciapier adbyvajecca z palitviaźniem Jurasiom Ziankovičam, jakoha vyzvalili pa prośbie ZŠA3
Kamientary