«З гэтымі гмахамі ад нашага горада нічога не застанецца». Гродзенцы не ў захапленні ад ідэі ўзвесці квартал з высоткамі
У абласным цэнтры выставілі на аўкцыён права праектавання і будаўніцтва шматкватэрнай жылой забудовы на зямельным участку ў 10 гектараў. Згодна з планам, на пустцы мусіць з'явіцца квартал з дамамі вышынёй да 20 паверхаў. Рэакцыі гродзенцаў у сацыяльных сетках сведчыць пра тое, што далёка не ўсе гараджане падтрымліваюць такую ідэю.
Гандлёвы цэнтр пад носам, а гістарычны ў крокавай даступнасці
Новы квартал мусіць з'явіцца на вуліцы Дубко, насупраць гандлёвага цэнтра OldCity.
На 21 чэрвеня прызначаны аўкцыён па продажы права праектавання і будаўніцтва шматкватэрнай жылой забудовы. Стартавая цана — 908 тысяч рублёў (каля 284 тысяч даляраў).
Акрамя пусткі, на ўчастку знаходзяцца капітальныя будынкі, у тым ліку жылыя. Падмуркі былых будынкаў, зялёныя насаджэнні розных парод, падземныя інжынерныя камунікацыі — усё гэта пойдзе пад знос.
Выдаткі на падрыхтоўку зямлі да будаўніцтва ацанілі ў 7,5 мільёна рублёў (каля 2,4 мільёна даляраў), што ў восем разоў больш за пачатковы кошт аб'екта.
Мяркуючы па рэакцыях у сацыяльных сетках, многія гараджане незадаволеныя тым, што на месцы пусткі, гаражоў, старых дамоў і зялёных насаджэнняў з'явіцца менавіта жылы квартал са шматпавярховікамі.
Самы ўпадабаны каментар пад пастом у інстаграм-акаўнце аднаго з гарадскіх паблікаў гучыць так:
«З гэтымі гмахамі ад нашага прыгожага горада нічога не застанецца, быў прыгожы і зялёны, а цяпер не зразумееш што», — піша карыстальніца, чый камент набраў 31 падабайку і стаў самым папулярным пад абмеркаваннем навіны.
«Які жах, мяркуючы па другім фота…. Тры велізарныя даміны сапсуюць увесь выгляд цэнтра горада з яго нізенькімі прыгожымі гістарычнымі домікамі. Навошта такія велізарныя [дамы] ў цэнтры? Горад асацыюецца з невысокімі гістарычнымі пабудовамі, а тут раптам гэтыя тры даміны будуць тырчаць», — выказваюць незадавальненні карыстальнікі.
«Нічога новага, каменныя джунглі», — піша іншы карыстальнік.
«Горад страціць свой твар», — адзначаюць іншыя.
Таксама людзей абурае, што ў раёне стане яшчэ менш зеляніны.
Адзін з каментатараў дзеліцца сваёй гісторыяй, як палюбіў горад, калі ў 1990-я пераехаў туды з сям'ёй.
«Я проста ўлюбіўся ў гэты горад, ён патанаў у зеляніне, транспарту было няшмат, я адчуваў кавалачак заходняй культуры. Цяпер горад губляе свае пазіцыі і становіцца звычайным горадам, як сотні іншых».
Каментатар таксама адзначае, што горад трэба не толькі ўшчыльняць забудовай жылых будынкаў, але і ствараць зоны для адпачынку.
Яшчэ адна каментатарка заўважае, што можна будаваць і ў горадзе на пустках. Але, на яе думку, важна рабіць гэта трэба так, каб не псаваць агульную архітэктуру.
«Наш горад славіцца тым, што захаваліся старыя вулачкі, і таму да нас едуць турысты, гэтым мы і прыгожыя, развівацца трэба ў гэтым кірунку».
Іншы каментатар лічыць, што гораду трэба развіваць прыгарады і інфраструктуру там, а не ўшчыльняць блізкія да цэнтру раёны.
«У горадзе [мусіць быць] больш паркаў, а калі і будаваць то невысокія дамы, а не гэты калгас».
Планы ўшчыльніць раён, які знаходзіцца за некалькі кіламетраў ад гістарычнага цэнтру, не ацанілі і чытачы папулярнага ў Гродне гарадскога сайта s13.ru. Самая масавая рэакцыя на навіну — абураны смайлік.
Пра тое, што 370-тысячнаму гораду непатрэбныя 20-павярховыя будынкі, нядаўна выказваўся гродзенскі краязнаўца Мечыслаў Супрон. Нагадаем, што зімой у Гродне актыўна абмяркоўвалі тэму будаўніцтва шматпавярховых будынкаў на фоне Каложы. З гэтай нагоды нават была створаная петыцыя з просьбай абмежаваць вышыню будынкаў у новым мікрараёне шасцю паверхамі.
Цяпер чытаюць
Памятаеце Пятрушу, які выдзіраў драты «дыджэям Перамен»? Яго перавялі ў трэцюю лігу чыноўнікаў пасля месяцаў беспрацоўя10
Памятаеце Пятрушу, які выдзіраў драты «дыджэям Перамен»? Яго перавялі ў трэцюю лігу чыноўнікаў пасля месяцаў беспрацоўя
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек44
Каментары