«Працягвайце рух». У Іспаніі абнародавалі запіс перамоваў машыністаў з дыспетчарамі перад крушэннем, у якім загінулі 68 чалавек

Іспанскія СМІ апублікавалі запісы перамоваў паміж машыністамі і дыспетчарскім цэнтрам за хвіліны да катастрофы ў сераду раніцай, калі хуткасны цягнік, які ехаў з Мадрыда ў Севілью, урэзаўся ў састаў, што стаяў на рэйках. У выніку сутыкнення загінулі як мінімум 68 чалавек і дзясяткі атрымалі раненні, піша Бі-бі-сі.

У адным з цягнікоў, які эксплуатуецца дзяржаўнай кампаніяй Renfe, знаходзіліся 397 пасажыраў. Перад ім на той жа лініі знаходзіўся цягнік прыватнай кампаніі Iryo, у якім было 147 пасажыраў.

Паводле папярэдніх звестак, з-за збою ў сістэме аўтаматычнай сігналізацыі — камп’ютарнай няспраўнасці — усе цягнікі на пацярпелым участку былі спыненыя.

Аднак, па словах міністра транспарту Іспаніі, пазней цягніку Renfe памылкова было аддадзена распараджэнне працягнуць рух.

Аўдыязапісы размоў паміж дыспетчарскім цэнтрам на вакзале «Аточа» ў Мадрыдзе і двума машыністамі апублікавалі іспанскія СМІ, у тым ліку El Pais і RTVE. З іх можна зрабіць выснову, што аднаму хуткаснаму цягніку быў дадзены дазвол на рух, нягледзячы на тое, што другі цягнік, які знаходзіўся прыкладна за 25 км наперадзе, спыніўся.

На адным з запісаў дыспетчар загадвае машыністу цягніка Renfe AVE аднавіць рух на нармальнай хуткасці пасля ліквідацыі тэхнічных непаладак.

«Адключыце і зноў падключыце сістэму LZB. Аднавіце рух. Затым працягвайце рух пад кіраваннем сістэмы BSL [рэзервовая сістэма сігналізацыі] у звычайным рэжыме», — кажа дыспетчар машыністу.

Машыніст удакладняе: «На нармальнай хуткасці?» Дыспетчар адказвае: «Так».

Сістэма сігналізацыі і бяспекі LZB была першапачаткова распрацавана ў Германіі для руху на высокіх хуткасцях, яна таксама выкарыстоўваецца на высакахуткасных чыгунках Іспаніі.

Як паведамляе El Pais, на высакахуткаснай магістралі Мадрыд-Севілья, дзе адбылася катастрофа, зараз рэалізуецца маштабная праграма мадэрнізацыі, у рамках якой сістэму LZB замяняюць на больш дасканалую Еўрапейскую сістэму кіравання рухам цягнікоў (ERTMS).

Пры гэтым бяспека на чыгунцы не залежыць ад нейкай адной тэхналогіі, а лінія, дзе адбылася трагедыя, абсталявана і іншымі сістэмамі, адзначае газета.

Bloqueo de Señalización Lateral або BSL — гэта рэзервовая сістэма інтэрвальнага рэгулявання руху цягнікоў, якая выкарыстоўваецца ў выпадку збою аўтаматычнай сістэмы сігналізацыі або перадачы даных.

Яшчэ ў адным аўдыязапісе машыніст іншага цягніка — кампаніі Iryo — паведамляе дыспетчару, што сувязь з сістэмай кіравання цягніком была страчана і састаў не рухаецца.

«Цягнік стаіць перад святлафорам на станцыі Урда», — кажа машыніст дыспетчару. Пасля абмену рэплікамі дыспетчар дае ўказанне «працягнуць рух» у штатным рэжыме.

Паводле больш позняга запісу, машыніст Iryo зноў звязваецца з дыспетчарскім цэнтрам і паведамляе, што па-ранейшаму не можа прывесці цягнік у рух.

«Сістэма [бяспекі] не паддаецца кіраванню. Таму я па-ранейшаму стаю перад уваходным святлафорам», — тлумачыць ён.

Гэты запіс паказвае на тое, што дыспетчар быў апавешчаны пра тое, што цягнік Iryo застаецца на месцы ў той час, як да яго набліжаецца састаў кампаніі Renfe.

El Pais адзначае, што цягнік AVE атрымаў указанне аднавіць рух у 8:36 — яшчэ да таго, як было пацверджана, што цягнік Iryo пачаў аддаляцца. Акрамя таго, састаў рухаўся са звычайнай хуткасцю, а не ў адпаведнасці з пратаколам бяспекі «рух з візуальным кантролем» (proceed by sight), выкананне якога магло б прадухіліць аварыю.

Міністр транспарту Іспаніі Оскар Пуэнтэ заявіў у сераду, што рашэнне даць указанне цягнікам аднавіць рух без якіх-небудзь абмежаванняў хуткасці было «невытлумачальным».

У сувязі з катастрофай у Іспаніі ўлады абвясцілі трохдзённую жалобу, якая пачалася ў чацвер. Аварыя ў сераду стала самай сур'ёзнай чыгуначнай катастрофай у краіне з 2013 года, калі на ўскраіне Сант'яга-дэ-Кампастэла на паўночным захадзе Іспаніі загінулі 80 чалавек.

• 0
• 0
• 1
• 5
• 1
• 9
• 0
• 0