Як магла б выглядаць сустрэча з паэтам Тодарам Кляшторным, расстраляным у 1937 годзе
У Ноч паэтаў выйшаў «Фільм аб спатканні з (не)расстраляным у 1937-м годзе паэтам Тодарам Кляшторным».
Тодар Кляшторны (1903-1937) — выбітны беларускі паэт, які быў адным з 108 прадстаўнікоў бязлітасна расстралянай інтэлігенцыі ва ўрочышчы Курапаты ў Мінску ў ноч з 29 на 30 кастрычніка 1937 года. Самаму старэйшаму з забітых, празаіку і публіцысту Янку Нёманскаму, споўнілася 47 гадоў, а сярод самых маладых — паэт і перакладчык Юлій Таўбін (26 гадоў), літаратурны крытык Пётр Хатулёў (25 гадоў), педагог і школьны настаўнік Іван Жылуцкі (25 гадоў).
«Публіцыстычна-мастасцкі фільм «Тодар» я бы хацеў аднесці да жанру паэтычнай фантастыкі. Аднойчы я ўявіў, што спаткаўся з Тодарам Кляшторным — паэтам, якога забіў сталінскі рэжым, а разам з ім яшчэ больш за сотню выбітных дзеячаў беларускай культуры і навукі. Падчас нашага спаткання ў нас адбылася размова пра лёс беларускасці, пра ролю літаратуры ў нашым жыцці і пра тое, што рэпрэсіі супраць беларускасці не спынены дагэтуль», — апісвае фільм яго аўтар — прадзюсар і блогер Алесь Чахоўскі.
Яго самога ўжо другі раз будуць судзіць завочна, а сёння стала вядома, што інстаграм-старонку Чахоўскага прызналі экстрэмісцкай.
У ролі Тодара Кляшторнага зняўся акцёр Ілля Ясінскі. Сцэнар напісала пісьменніца Ганна Златкоўская.
Хваля сталінскіх рэпрэсій доўжылася з 1929 па 1938 год і закранула больш за 500 выбітных дзеячаў беларускай культуры.
29 кастрычніка штогод беларусы ўсяго свету ўшаноўваюць памяць загінулых паэтаў у шматлікіх гарадах. Раней Ноч расстраляных паэтаў праводзілі і ў Курапатах, але апошнія гады праз рэпрэсіі такія мерапрыемствы сталі немагчымыя.
«Ноч расстраляных паэтаў». Расклад і адрасы мерапрыемстваў па ўсім свеце
Цяпер чытаюць
«Разагнаць дармаедаў! Аддаць людзям зямлю!» Трактарыст з Хойнікаў, які цяпер жыве ў Латвіі, параўнаў сельскую гаспадарку там і ў нас1
Каментары