Генеральны сакратар НАТА Марк Рутэ заявіў, што цяпер непасрэднай пагрозы тэрыторыі альянсу з боку Расіі няма. Ён таксама сказаў, што НАТА значна мацнейшае за Расію і ў выпадку вайсковага сутыкнення Масква не зможа перамагчы альянс. А ядзерныя пагрозы з боку Расіі ён сур'ёзна не ўспрымае, піша Politico.
Словы Марка Рутэ прагучалі пасля таго, як Расія накіравала НАТА дыпламатычную ноту з папярэджаннем аб магчымым выкарыстанні ядзернай зброі ў выпадку спробы ізаляваць Калінінградскую вобласць ад астатняй тэрыторыі краіны. Масква таксама заявіла, што ў выпадку ўзброенага канфлікту можа нанесці ўдары па «цэнтрах прыняцця рашэнняў» у краінах — членах альянсу.
Па словах Рутэ, НАТА адказала на расійскую ноту спакойна. Ён падкрэсліў, што альянс мае абарончы характар, і заклікаў Расію спыніць ядзерныя пагрозы.
Генеральны сакратар НАТА таксама адзначыў, што калі Расія вырашыць пачаць ваенныя дзеянні супраць Фінляндыі, краін Балтыі, Польшчы ці іншай дзяржавы альянсу, гэтаму будзе папярэднічаць нарошчванне расійскіх вайсковых сіл. Па яго словах, ЗША захаваюць удзел у абароне Еўропы як звычайнымі, так і ядзернымі сродкамі.
Рутэ заявіў, што НАТА працягне падтрымліваць Украіну і адначасова ўкладаць сродкі ва ўмацаванне ўласнай абароны. Ён заклікаў краіны альянсу не паддавацца на пагрозы з боку Масквы і захоўваць спакой.
Паводле слоў генеральнага сакратара альянсу, Расія сутыкаецца з цяжкасцямі на фронце і імкнецца раскалоць краіны НАТА, каб дамагчыся спынення падтрымкі Украіны. Ён таксама сказаў, што Уладзімір Пуцін пакуль не дэманструе гатоўнасці да перамоў аб заканчэнні вайны.
Каментары
напомните мне, на какое государство НАТО напала Югославия (и еще десятки стран), перед тем, как НАТО стало "обороняться"