Канадскі прафесар заклікаў беларусаў да выключнай стрыманасці ў пытанні дыстанцыявання ад Расіі
Сітуацыю ў Беларусі, магчымыя змены пасля прыходу Дональда Трампа, уплыў санкцый і перспектывы дэмакратычных пераменаў у Беларусі ў інтэрв’ю «Радыё Свабода» патлумачыў прафесар Дэвід Марплз, канадскі спецыяліст у пытаннях Беларусі, Украіны і Расіі.
Ці трэба баяцца прыходу Трампа?
Марплз лічыць, што палітыка Трампа адносна Беларусі і рэгіёна ў цэлым пакуль непрадказальная. Многія рашэнні будуць залежаць ад яго стаўлення да Расіі і Пуціна.
Суразмоўца пагаджаецца з прагнозам, што новая адміністрацыя Трампа можа падштурхоўваць Украіну да не самага прыемнага пагаднення з Расіяй.
«Думаю, цяпер больш верагодна, што новая адміністрацыя будзе вельмі моцна падштурхоўваць Украіну да нейкага пагаднення з Расіяй. Мы дакладна не ведаем, якія будуць гэтыя ўмовы…»
Змены ў палітыцы ЗША могуць адбіцца на Беларусі, але Марплз не лічыць, што гэта прывядзе да перазагрузкі адносін з рэжымам Лукашэнкі. Прафесар лічыць, што акурат па гэтым пытанні існуе моцны двухпартыйны кансэнсус у ЗША.
Тое самае тычыцца і дыялогу паміж ЗША і дэмакратычнымі сіламі Беларусі — ён працягнецца. Хаця б па той прычыне, што «ёсць шэраг кангрэсменаў, шэраг сенатараў, якія ў мінулым вельмі падтрымлівалі Беларусь».
Ва ўмовах жалезнай заслоны
Прафесар пагаджаецца з тэзай, што цяпер фармуецца новая «жалезная заслона».
«Справы ідуць у гэтым кірунку. Гэта крыху вузейшая жалезная заслона, чым [тая, што ўпала ў 1991 ці 1989 гадах], але тым не менш ствараецца сітуацыя, калі мяжа НАТА сапраўды ператвараецца ў мяжу Захаду».
На нашых вачах паўстаюць тыповыя сімвалы халоднай вайны: узвядзенне сцен на межах Польшчы і Літвы з Беларуссю.
Аднак Марплз лічыць, што гэта часовая сітуацыя і зменіцца пасля адыходу цяперашніх лідараў Расіі і Беларусі.
Курс на НАТА і перспектывы дэмакратычных перамен
Марплз заклікае да стрыманасці ў справе курсу на еўраінтэграцыю і ўступлення ў НАТА.
«З палітыкай, што мы ідзём у НАТА, што мы ўступаем у Еўрасаюз, што мы рухаемся на Захад… Не, расійскія войскі былі б у Беларусі праз пару дзён. Беларусь ужо ўзяла на сябе абавязацельствы [перад Расіяй]».
Што да пераменаў, то прафесар лічыць, што без радыкальных змен у Маскве перспектывы дэмакратызацыі Беларусі абмежаваныя.
А ці пасляпуцінская ўлада будзе больш прыхільна глядзець на дэмакратычныя перамены ў Беларусі? Прафесар лічыць, што так, але пры ўмове, што Беларусь застанецца прыязнай да Расіі.
«Я лічу, што галоўнае пытанне для Расіі — ваенная бяспека. І для Крамля ў пасляпуцінскі перыяд можа быць прымальна, калі ўлада ў Беларусі будзе больш дэмакратычная, але, скажам так, у пэўных сферах прарасійская».
Найістотнейшае, аднак, — гэта воля і адзінства саміх беларусаў. «Я лічу вельмі важным, каб беларусы захоўвалі адзінства, нават калі яны не абавязкова згодныя з усім, што робіць Офіс Ціханоўскай», — падкрэсліў прафесар.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі2
Каментары
Краіны не будзе, але вы трымайцеся там!
Вось пасля гэтых падзей можна уступаць у ЭЗ і НАТА