Хто тая прафсаюзная актывістка з МАЗа, якая папрасіла Лукашэнку разабрацца ў ютубе з «беглымі»?
28-гадовая выпускніца факультэта міжнародных адносін БДУ Настасся Каротчыкава піша вершы пра родную мову і рабіла студэнцкі часопіс разам з будучым «экстрэмістам».
Калі Аляксандр Лукашэнка наведваў МАЗ, адно з пытанняў — натуральна, загадзя падрыхтаванае, зацверджанае і адрэпетаванае, — было пра магчымасць спыніць «укіды і правакацыі ад беглых» на ютубе, а таксама пра айчынныя альтэрнатывы відэасэрвісу. Яго задала 28-гадовая Настасся Каротчыкава. Палітыку давялося тлумачыць, што самае каштоўнае — перамагчы ворагаў на іхнім жа полі.
Хто такая Настасся Каротчыкава, якой даручылі гэтае пытанне?
Дзяўчына нарадзілася ў 1996 годзе ў Мінску. У 1998 годзе сям'я пераехала ў аграгарадок Атоліна Мінскага раёна, дзе Настасся пайшла ў Прылуцкую сярэднюю школу.
У 2018 годзе Каротчыкава скончыла факультэт міжнародных адносін Беларускага дзяржаўнага ўніверсітэта. Навуковым кіраўніком яе дыпломнай працы «Міжнародны імідж Беларусі» была лукашэнкаўскі аналітык Вольга Лазоркіна з Беларускага інстытута стратэгічных даследаванняў (БІСД). Каротчыкава валодае англійскай і французскай мовамі.
Але з дыпламатычнай кар'ерай не склалася. Цяпер дзяўчына працуе на МАЗе, дзе прынамсі з 2022 года займае пасаду начальніцы аддзела ўпраўлення закупак агрэгатаў і трансмісій. З'яўляецца членам Рады моладзі завода, старшынёй камісіі па працы сярод моладзі праўладнага прафсаюза «Белпрафмаш».
Актыўна ўдзельнічае ў грамадскім жыцці, спявае на заводскіх конкурсах, удзельнічае ў патрыятычных акцыях, агітуе да ўдзелу ў выбарах, прадстаўляе прадпрыемства на дзяржаўных мерапрыемствах — стандартны набор праўладнай прафсаюзніцы. За сваю дзейнасць у верасні 2023 года нават атрымала падзяку ад Лукашэнкі.
Але душа прагне паэзіі. Настасся напісала свой першы верш у сямігадовым узросце. У 2017 годзе выдала сваю кнігу «До мінор». Удзельнічала ў шматлікіх літаратурных конкурсах, стаўшы лаўрэаткай конкурсу «Таленты Беларусі», прэміі «Адкрыццё года» праўладнага Саюза пісьменнікаў Беларусі. У 2018 годзе была вылучана на Нацыянальную прэмію Беларусі ў намінацыі «Найлепшы дэбют». Сёння Каротчыкава — сябра Мінскага гарадскога аддзялення СПБ.
У студэнцкія гады разам з Аляксандрам Паршанковым, будучым кіраўніком камісіі па справах студэнцтва Каардынацыйнай рады, была рэдактаркай літаратурнага альманаху «аБДУмана», пра што сведчыць старонка ва «Укантакце». Цяпер профіль самой Каротчыкавай выдалены, а іншыя сацсеткі закрытыя.
Свае вершы піша па-руску і па-беларуску. Адзін з іх прысвечаны роднай мове:
«І няма раднейшага слова
За прасцейшае гэта «мова».
Гэта слова гучыць у хаце,
Дзе мая засталася маці,
Гэта слова гучыць у рэчцы,
У зарослай травою сцежцы,
Чую я яго ў небе блакітным,
І ў простай маёй рыфме».
«Наша Нiва» — бастыён беларушчыны
ПАДТРЫМАЦЬ
«Прачытайце яе гісторыю». Лукашэнку давялося апраўдвацца перад Пуціным за георгіеўскія стужкі11
Каментары