Уладзімір Арлоў адпраўляецца ў вялікі літаратурны тур: наведае 10 гарадоў у пяці краінах
Пісьменнік і папулярызатар гісторыі Уладзімір Арлоў выпраўляецца ў літаратурнае турнэ. Разам з са стваральнікам Фонда і інтэрнэт-бібліятэкі «Камунікат» Яраславам Іванюком пісьменнік наведае 5 краін і 10 гарадоў, піша «Будзьма».
Сустрэчы ў Польшчы, Чэхіі, Аўстрыі, Нямеччыне і Швейцарыі будуць прымеркаваныя да ўгодкаў абвяшчэння незалежнасці Беларускай Народнай Рэспублікі.
- Першая сустрэча пройдзе 20 сакавіка ва Уроцлаве пры падтрымцы з Kolegium Europy Wschodniej і Суполкі Беларусаў Уроцлава. Уладзімір Арлоў распавядзе пра ключавыя моманты беларускай гісторыі — ад часоў Полацкага княства да абвяшчэння Беларускай Народнай Рэспублікі, а Яраслаў Іванюк пра 25 гадоў Kamunikat.org, найбуйнейшай у свеце беларускай інтэрнэт-бібліятэкі.
Месца: Przejście Dialogu, ul. Świdnicka 19 (падземны пераход)
Час: 18:00
- 21 сакавіка ў Празе, дзе суарганізатарам стала суполка «Скарына», сустрэча пройдзе пад назвай «Няскораная грамадзянка БНР». У межах яе адбудзецца прэзентацыя кнігі ўспамінаў Ларысы Геніюш «Птушкі бяз гнёздаў». Варта згадаць, што самы вялікі раздзел успамінаў прысвечаны менавіта пражскаму перыяду жыцця паэткі. У кнізе сотні каментароў і дзясяткі фотаздымкаў, частка якіх друкуецца ўпершыню.
Месца: Клюбоўня суполкі Пагоня, 5. května 851/70, 140 00 Praha 4-Nusle
Час: 18:00
- У іншым чэшскім горадзе Брно (22.03), як ляжыць на шляху туру, Уладзімір Арлоў выступіць з лекцыяй «Беларусь — Чэхія. Дзесяць вякоў гістарычных і культурных сувязяў». Таксама і тут не абмінуць тэмы Беларускай Народнай Рэспублікі, урад якой у міжваенны перыяд знайшоў прытулак менавіта ў Чэхаславаччыне. На чэшскай зямлі знаходзяцца магілы прэзідэнтаў БНР Пётры Крэчаўскага і Васіля Захаркі. Абодва яны захоўвалі ў эміграцыі мандат першага незалежнага беларускага ўраду.
Месца: Institut Paměti Národa, Radnická 10 Brno
Час: 18:00
Далей пісьменніка чакаюць Вена 23.03 (Аўстрыя), Мюнхен 25.03 (Нямеччына), Цюрых 28.03 (Швейцарыя), Вісбадэн 29.03 і Кёльн 30.03 (Нямеччына). А пасля Познань (02.04) і Варшава (03.04). Падрабязней пра месцы сустрэчаў можна дазнацца на старонцы Kamunikat.org.
Кожная сустрэча будзе нагодай, каб распавесці пра Беларускую інтэрнэт-бібліятэку Kamunikat.org, якая сёлета адзначае 25-ці годдзе.
«Наш юбілей будзем адзначаць актыўнай дзейнасцю і працай, — кажа стваральнік бібліятэкі і дырэктар Фонду Яраслаў Іванюк. — Мы пачалі год выданнем дзесяці кніг. Ёсць што запрапанаваць беларусам ва ўсёй Еўропе. А калі гэта зрабіць найлепш, як не пры нагодзе нашага вялікага свята, свята свабодных беларусаў, якім ёсць Дзень Волі?»
Наведнікі сустрэчаў сярод іншага змогуць набыць кніжныя навінкі ад «Камуніката»: успаміны Ларысы Геніюш «Птушкі бяз гнёздаў», непадцэнзурныя аповесці Васіля Быкава «Мёртвым не баліць. Ліквідацыя», новы раман Андрэя Федарэнкі «Сцэнарыст», а яшчэ кнігі Уладзіміра Арлова «Айчына», «Імёны Свабоды», «Каханак яе вялікасці», «Ордэн Белай Мышы».
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары