У 500-гадовым храме-крэпасці ў Мураванцы Шчучынскага раёна з’явіліся расколіны на скляпеннях на вышыні 12 метраў. Прыход самастойна вырашыць праблему не можа з-за адсутнасці фінансаў. Ды і па законе займацца рамонтам у старадаўняй царкве нельга — храм адносіцца да нулявой катэгорыі, гэта значыць мае статус аб’екта гісторыка-культурнай каштоўнасці, уключанага ў папярэдні спіс Сусветнай спадчыны ЮНЕСКА, піша Hrodna.life.
Пра праблему расказалі на дзяржаўным рэсурсе news.by.
Настаяцель прыхода храма Раства Прасвятой Багародзіцы ў Мураванцы іерэй Алег Засім расказаў, што тынкоўка на 12-метровай вышыні растрэскалася. Невядома, гэта толькі павярхоўныя пашкоджанні ці расколіны закранаюць і самі скляпенні. Для таго, каб высветліць маштаб пашкоджанняў, неабходныя лабараторныя даследаванні.
«Трэба зразумець, у якім яна стане [апынулася] за мінулыя 200 гадоў. Калі няма адслаення, то ўсё адно трэба гэтыя расколіны старанна затынкаваць, старанна зашпакляваць. Сама столь ужо чорная. Вы бачыце, у якім яна стане. Самі бяліць яе мы не можам ніяк», — кажа святар.
Цяпер парафія, архітэктары і прадстаўнікі Гродзенскай дыяцэзіі шукаюць спонсараў, якія маглі б аплаціць і даследаванні, і працу спецыялістаў па рэстаўрацыі святыні.
Таксама, па словах настаяцеля, у храме не хапае вентыляцыі і сучаснай электраправодкі, але і на гэта пакуль грошай таксама няма.
Дарэчы, ў 2022 годзе храм атрымаў грант ад дзяржавы на рэстаўрацыйна-кансервацыйныя работы. На рамонт Мураванкі тады накіравалі 550 тысяч рублёў. Рэстаўрацыю пачалі восенню 2022 года. Яна ўключала ў сябе абнаўленне фасадаў: пераклалі, дзе гэта патрабавалася, цэглу, знялі больш познія пласты фарбы, а таксама былі зробленыя рамонт даху і замена вадасцёкавай сістэмы.
Свята-Раства-Багародзіцкая царква, вядомая як Мураванка (па назве вёскі) — помнік абарончага дойлідства. Яна была збудаваная паміж 1516 і 1542 гадамі, мае стылявыя адзнакі беларускай готыкі з элементамі рэнесансу. Моцна пацярпела ў войнах XVII-XVIII стагоддзяў, была ў занядбанні. У XIX стагоддзі перажыла капітальны рамонт, у 1920-я гады дзейнічала як касцёл. У 1989 годзе царкву вярнулі праваслаўным вернікам.
Вакол царквы-крэпасці ў Мураванцы спілавалі ўсе старыя дрэвы — сумныя ФОТЫ
Першы этап рэстаўрацыі абарончага храма ў Мураванцы амаль скончаны. Далей возьмуцца за гатычныя інтэр'еры
Згарэў шэдэўр народнай архітэктуры Палесся — царква ў Сцяпанках. Яна засталася на фотах «Нашай Нівы»
Будучы аб'ект Сусветнай спадчыны, які загубіла абыякавасць. Чым адметная Сцяпанкаўская царква, якая загінула ў пажары
Цяпер чытаюць
Даследчыкі знайшлі месца ў Беларусі, дзе базуецца «Арэшнік»4
Каментары