Джо Байдэн пасля заканчэння прэзідэнцтва перажывае фінансавыя праблемы
Выданне The Wall Street Journal піша, што пасля завяршэння прэзідэнцкай кадэнцыі былы прэзідэнт ЗША Джо Байдэн сутыкаецца з праблемамі ў тым, каб «капіталізаваць» свой статус, як гэта рабілі яго папярэднікі.
82‑гадовы Байдэн разлічваў на традыцыйна прыбытковы перыяд пасля свайго сыходу з Белога дома — з дарагімі кантрактамі на кнігі, платнымі выступленнямі, прыватнымі фондамі і нават магчымай прэзідэнцкай бібліятэкай. Але рэальнасць аказалася больш сціплай.
Прычыны — сталы ўзрост палітыка, ягоная непапулярнасць унутры дэмакратычнага лагеру і асцярожнасць пры кантактах з ім бізнэс-кампаній, якія баяцца гневу Дональда Трампа. У выніку Байдэн не атрымлівае шмат прапаноў на публічныя выступленні, ганарары за якія афіцыйна складаюць ад $300 да $500 тысяч.
Пасля сыходу з пасады Байдэн прызнаў, што мае каля $800 тысяч асабістых даўгоў, у тым ліку па іпатэцы за дом коштам $2,7 мільёна.
Дадаткова сітуацыю ўскладнілі рост падаткаў на нерухомасць і вялікія рахункі за юрыдычныя паслугі, звязаныя з праблемамі сына Хантэра. Ён таксама дапамагае дачцэ Эшлі, якая нядаўна падала на развод, і стараецца фінансава падтрымліваць унукаў.
Фінансавае становішча сям’і часткова стабілізуюць дзяржаўныя пенсіі: Байдэн атрымлівае каля $416 тысяч у год (у тым ліку $250 тысяч як былы прэзідэнт і $166 тысяч за гады працы ў Кангрэсе і на пасадзе віцэ-прэзідэнта). Жонка Джыл Байдэн пакінула працу ў каледжы, дзе атрымлівала $100 тысяч у год, і цяпер займаецца грамадскай дзейнасцю без аплаты.
У ліпені Байдэн атрымаў аванс каля $10 мільёнаў за кнігу мемуараў — гэта істотная дапамога, але сума значна меншая за аналагічны кантракт Барака Абамы ($60 мільёнаў). Джыл Байдэн таксама працуе над сваёй кнігай, але пакуль не мае падпісанай дамовы з выдаўцом.
Акрамя фінансавых, сям’я перажывае асабістыя цяжкасці. У Байдэна дыягнаставаны рак прастаты, ён нядаўна прайшоў і праз аперацыю па выдаленні раку скуры. Хантэр Байдэн, акрамя даўгоў перад былой жонкай (звыш $3 мільёнаў), страціў асноўныя прыбыткі ад мастацтва і кніг. Яго інтэрв’ю ў падкастах нават прывялі да канфлікту з Меланіяй Трамп, жонкай цяперашняга амерыканскага лідара.
Крытыкі адзначаюць, што сям’я Байдэнаў мае схільнасць да занадта дарагога ладу жыцця, асабліва калі хтосьці іншы аплачвае рахункі. У той жа час блізкія да іх людзі кажуць: калі жыць больш сціпла, Байдэны здолеюць утрымаць фінансавую стабільнасць.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне13
Каментары