На вайсковыя зборы масава забіраюць гродзенцаў. А што мінчукі? Падрыхтуйцеся, ваша чарга — 2027‑2028 гады
Адной з адметнасцей праверкі баявой гатоўнасці Узброеных Сіл Беларусі ў гэтым годзе стала разгортванне 6‑й механізаванай брыгады да штатаў ваеннага часу. Паводле слоў міністра абароны Віктара Хрэніна, раней аналагічную праверку прайшлі яшчэ дзве брыгады. Усяго ў Беларусі чатыры механізаваныя брыгады, таму адказ на пытанне, хто будзе наступным, выглядае відавочным.
Падчас размовы з Аляксандрам Лукашэнкам на 227‑м палігоне Паўночна-Заходняга аператыўнага камандавання міністр абароны Віктар Хрэнін адзначыў, што 6‑я механізаваная брыгада прыведзена ў «павышаную баявую гатоўнасць».
«Брыгада ў такім аб’ёме, як цяпер запланавана праверка, яшчэ ні разу не правяралася. Брыгада будзе цалкам мабілізавана да штатаў ваеннага часу. На сённяшні момант прызваныя ваеннаабавязаныя запасу ў полк рэзерву Заходняга аператыўнага камандавання, які прызначаны для аднаўлення страт», — даводзіў міністр Лукашэнку.
Праверкі з разгортваннем цэлай брыгады да штатаў ваеннага часу — адносна новая практыка для Беларусі. Паводле слоў міністра, раней падобныя праверкі прайшлі ў двух іншых брыгадах:
«У адпаведнасці з новай методыкай, зыходзячы з вопыту і праблемных пытанняў, якія мы выявілі ў ходзе праверак 19‑й брыгады, 11‑й брыгады, мы ўбачылі, што неабходны апераджальны прызыў афіцэраў запасу і правядзенне з імі заняткаў, каб яны былі гатовыя да выканання сваіх задач».
Хрэнін таксама паведаміў, што да пачатку поўнай праверкі баявой гатоўнасці было прызвана 400 афіцэраў запасу.
Упершыню прывядзенне цэлай механізаванай брыгады ў «поўную» баявую гатоўнасць адбылося ў 2023 годзе. Гэта была 11‑я механізаваная брыгада, якая дыслакуецца ў Слоніме.
Як у той год паведамляў камандзір брыгады палкоўнік Сяргей Шылін, задача заключалася ў праверцы здольнасці злучэння перайсці на баявую ступень гатоўнасці, ажыццявіць мабілізацыю ваеннаслужачых запасу, дакамплектавацца адпаведнымі ўзбраеннем, ваеннай і спецыяльнай тэхнікай, здзейсніць марш у раёны выканання задач з правядзеннем тактычнага вучэння.
У тым годзе дакамплектаванне асабовага складу з запасу праводзілася праз ваенныя камісарыяты Брэсцкай і Гродзенскай абласцей.
Хрэнін тады адзначаў, што праверка ў такім маштабе праводзіцца ўпершыню і што ў яе межах «няма ніякіх абмежаванняў». Пры гэтым «брыгада павялічаная да штату ваеннага часу, а гэта 6 тысяч чалавек». Аналітыкі ацэньвалі колькасць набраных прыкладна на 4 тысячы чалавек.
Міністр не назваў колькасць асабовага складу брыгады ў мірны час. У адкрытых крыніцах такой інфармацыі няма. Паводле некаторых ацэнак, яна можа складаць да паловы ад колькасці, прадугледжанай штатамі ваеннага часу.
Калі ў 2024 годзе аналагічная праверка ахапіла 19‑ю механізаваную брыгаду, якая дыслакуецца ў Заслонаве (Лепельскі раён Віцебскай вобласці), Міністэрства абароны паведамляла, што з запасу было прызвана больш за 3000 ваеннаабавязаных, і адзначала, што гэтай колькасці можа быць дастаткова для разгортвання механізаванай брыгады да штатаў ваеннага часу.
Варта адзначыць, што падчас праверак баявой гатоўнасці, акрамя механізаваных брыгад, паралельна разгортваюцца і іншыя падраздзяленні (напрыклад, батальёны). Аднак цалкам да штатаў ваеннага часу, як правіла, даводзяць толькі адну брыгаду.
У сувязі з тым, што ў Беларусі ўсяго чатыры механізаваныя брыгады, можна меркаваць, што ў 2027 ці 2028 годзе аналагічную праверку можа прайсці 120‑я механізаваная брыгада (Мінск), якая пакуль застаецца апошняй.
Арыштавалі прадстаўнікоў кампаніі Bayer у Беларусі15
Каментары