МЗС Беларусі назваў ядзерную зброю «найбольш рацыянальнай мерай нацбяспекі»
На фоне абвастрэння сітуацыі ў рэгіёне беларускі МЗС тлумачыў сваю пазіцыю замежным дыпламатам.
Намеснік міністра замежных спраў Беларусі Ігар Сакрэта 28 мая правёў брыфінг для акрэдытаваных у краіне прадстаўнікоў дыпламатычнага корпуса. У мерапрыемстве таксама прыняў удзел прадстаўнік Міністэрства абароны Беларусі, паведамілі БЕЛТА ў прэс-службе беларускага знешнепалітычнага ведамства.
Сустрэча была прысвечана дзвюм тэмам: прававым і фактычным аспектам нядаўняй сумеснай трэніроўкі ядзерных сіл Беларусі і Расіі, а таксама рэакцыі, якую яна выклікала.
Намеснік кіраўніка МЗС заявіў, што сумесныя ядзерныя трэніроўкі з Расіяй поўнасцю адпавядаюць Дагавору аб нераспаўсюджанні ядзернай зброі, з'яўляюцца аналагам натаўскай практыкі сумесных ядзерных місій і маюць выключна абарончы характар.
«На фоне таго, што сукупныя вайсковыя расходы суседніх Польшчы, Літвы і Латвіі ўжо ў 25 разоў перавышаюць абаронныя асігнаванні Беларусі, а натаўскі блок нарошчвае прысутнасць непасрэдна каля беларускіх межаў, ядзернае стрымліванне застаецца вымушанай, суразмернай і найбольш рацыянальнай мерай гарантавання нацыянальнай бяспекі, якая дае магчымасць пазбегнуць разбуральнай гонкі», — заявіў ён дыпламатам.
Паводле дзяржаўнага агенцтва, Ігар Сакрэта таксама закрануў актуальныя пытанні беларуска-еўрапейскіх адносін, падрабязнасці не называюцца.
Беларусь, якая мяжуе з усходнім флангам НАТА, цяпер стала месцам базавання найноўшых расійскіх ракетных комплексаў «Арэшнік», здольных несці ядзерныя набоі. З 18 да 21 мая прайшлі сумесныя трэніроўкі ядзерных сіл Беларусі і Расіі. Дзмітрый Пяскоў назваў супольныя вучэнні сігналам Еўропе.
24 мая прэзідэнт Францыі Эмануэль Макрон пазваніў Аляксандру Лукашэнку. Гэта першы вядомы тэлефонны кантакт палітыкаў за больш чым чатыры гады, які адбыўся на фоне абвастрэння сітуацыі ў рэгіёне.
Каментары