Беларусы ў Варшаве з размахам адзначылі Купалле. Далучылася і Ціханоўская
Ужо традыцыйнай нагодай сабрацца разам, каб паплесці вянкі і пакружыць карагоды ля вогнішча, для беларусаў Варшавы з’яўляецца купальскі опэн-эйр «Варушняк». Хаця з кожным годам да яго далучаецца ўсё больш наведнікаў з Польшчы, Украіны і іншых краін.
У гэтым годзе сярод запрошаных музыкаў свой сэт на фэсце адыграў Іван Дорн.
Сёлета «Варушняк» сабраў у адным месцы больш за 20 артыстаў — электронных, рокавых і фолькавых. У плане жанру кожны мог знайсці нешта на свой густ, тым больш фестываль шумеў з 15.00 да пяці раніцы наступнага дня.
Пяшчотны і джазавы Ілля Чумак з гурта «Саюз» змяняўся электронным сэтам ад кампазітара Іллі Семашкевіча, працягваўся гіпнатычнай калабарацыяй «Шумы» і «Муфера».
Нароўні з Іванам Дорнам запальваў танцпол тут і Макс Старцаў, якога многія згадаюць па мінскім «Хулігане».
Але, здаецца, сапраўдная магія здарылася, калі на сцэну пад поўнач выйшаў жаночы хор «Спевы» і неўзабаве з факеламі ўзначаліў натоўп, які прайшоў уздоўж вады па пясчаным беразе, каб распаліць купальскае вогнішча і спяваць ля яго традыцыйныя беларускія песні ў вялікім шматслойным карагодзе.
«Гэта нейкі сюррэалізм, бо вакол адны беларусы і так шмат беларускай мовы», — адзначыла адна з наведвальніц, якая ўпершыню за шэсць гадоў эміграцыі апынулася ў такой канцэнтраванай беларускай супольнасці.
Дадаткова на «Варушняку» працавала зона з лекцыямі і маркетам. Наведнікі, напрыклад, даведаліся пра гісторыю кахання Марка Шагала і яго Бэлы і паўдзельнічалі ў інтэрактыўнай гульні па беларускіх фразеалагізмах.
Завітала на свята і нацыянальная лідарка Святлана Ціханоўская. Яна заставалася на «Варушняку» да самай ночы, размаўляла з майстрамі, супрацоўнікамі фудкорта, артыстамі і іншымі беларусамі, якіх сустракала.
З «Нашай Нівай» нацыянальная лідарка падзялілася, як праходзіла Купалле ў яе дзяцінстве.
«Гэта заўжды адбывалася на летнія канікулы, калі мы былі дзецьмі — у вёсцы. Я памятаю, як уся вёска збіралася разам, палілася вогнішча. Нам дазвалялі доўга не спаць, што было вельмі прыемна. А потым чамусьці ў падлеткавым узросце я не памятаю, каб мы хадзілі на Купалле менавіта ў вёсцы. Толькі ў Мікашэвічах калі здаралася свята, то там ужо хадзілі на ўсё».
Са сваімі дзецьмі, якія ўжо вярнуліся з ЗША, святкаваць Купалле Святлане пакуль не выпала.
«Яны, мабыць, і не ведаюць, што такая традыцыя ёсць. Неяк не траплялі, а цяпер я на такія мерапрыемствы ўсё роўна як на працу прыходжу».
Адпачывалі на «Варушняку» і экс-палітвязні. Агулам многія адзначалі асаблівасць падзеі, якая дае магчымасць сабрацца не дома вялікай беларускай кампаніяй незнаёмых, але такіх блізкіх па духу людзей.
Асобна варта адзначыць вобразы большасці з удзельнікаў — многія дасталі з куфараў бабуліны скарбы, спецыяльна набылі ў дызайнераў апсайклінг-рэчы са старых фіранак ці абышлі крамы ў пошуках аксэсуараў, каб выглядаць тэматычна. А разнастайнасць створаных сваімі рукамі вянкоў — разынка дрэс-кода Купалля.
У гэты ж дзень Купалле на сучасны лад святкавалі і ў Мінску на Sviata fest — на ім выступілі рэпер Лайтовы, Nevika, «Барысаўскі тракт», Pavluchenko і іншыя.
Каментары