«Шанцы ёсць заўсёды». Сястра беларускі Кацярыны Саковіч, якая знікла ў Непале, расказала, як ідуць яе пошукі
26 жніўня на поўначы Непала і ў прыгранічных да яго рэгіёнах Кітая здарылася моцная паводка: пасля землятрусу і сыходу селевага патоку рака Бхотэ-Кошы выйшла з берагоў, разбурыўшы вёскі, дарогі і гідраэлектрастанцыі. Паводле актуальных даных з непальскага боку, колькасць загінулых у выніку катастрофы ўжо перавысіла 1 тысячу чалавек. Яшчэ больш за 3,9 тысячы лічацца знікламі без вестак. У іх ліку — адна грамадзянка Беларусі, 41‑гадовая Кацярына Саковіч, пра якую мы пісалі раней. Выданне «Анлайнер» звязалася з роднай сястрой дзяўчыны Дарынай, якая жыве ў Ізраілі і зараз займаецца каардынацыяй дапамогі ў яе пошуках.
Хто такая Кацярына Саковіч і як яна апынулася ў Непале?
Кацярына — ураджэнка Гродна, але апошнія 16 гадоў жыве ў Мілане. Дзяўчына захапляецца духоўнымі практыкамі і медытацыямі, атрымала дыплом спецыяліста па гэтым кірунку ў Індыі.
«Кацька вельмі светлы чалавек, яна ў нас гарэза і шмат падарожнічае, займаецца духоўным развіццём, — апісвае дзяўчыну сястра Дарына. — Уся мая сям’я, канечне, была не вельмі задаволеная яе падарожжамі ў не самыя бяспечныя месцы. Але ніхто не ведаў, што гэта [паездка ў Тыбет] будзе небяспечная. Яна не збіралася ні на Эверэст, ні на Эльбрус, ні ў якія іншыя экстрэмальныя месцы».
Жнівеньская паездка беларускі была звязаная з корай — рытуальным абыходам свяшчэннай гары Кайлас на поўдні Тыбецкага нагор'я ў Кітаі, непадалёк ад мяжы з Непалам. Паломніцкі маршрут, па якім планавала ісці Кацярына, уключае ў сябе 52 кіламетры пешага шляху і пад'ём на вышыню прыкладна 5600 метраў.
У вялікай групе, арганізаванай непальскім тураператарам Leaf Holidays, лічыцца 55 чалавек. У падгрупе з васьмі турыстаў разам з Кацярынай былі яшчэ сем грамадзян Украіны і гід з Непала, які іх суправаджаў. Ніхто з іх пакуль таксама не быў знойдзены і не выходзіў на сувязь.
Што адбылося 26 жніўня і як вядуцца пошукі?
У 6:30 паводле непальскага часу (3:45 па Мінску) Кацярына даслала ў сямейны чат відэа, дзе паведаміла, што выязджае з прыгранічнага пасёлка Цімурэ на памежны пункт Расувагадхі. Менавіта па ім, як стала вядома пазней, прыйшоўся моцны ўдар аднаго з першых патокаў вады, гразі і камянёў.
Невядома, ці знаходзілася група беларускі менавіта ў той момант на КПП, але калі так, то турысты маглі апынуцца ў самым эпіцэнтры катастрофы. Па правераных Дарынай крыніцах, сувязь з кім-небудзь з удзельнікаў групы апошні раз была ў 8:30 па Непале (гэта 5:45 у Мінску).
«Наш тата ўбачыў у навінах, што адбыўся апоўзень, і практычна адразу ж звязаўся са мной. Мы пачалі з'язджаць з глузду, чытаць усе навіны, але ў іх было шмат фэйкаў і недакладнасцяў. Потым ужо я стала маніторыць афіцыйныя крыніцы, звязвацца з МЗС усіх краін».
Apocalyptic floods and a massive landslide have devastated parts of Tibet and Nepal
The scale of destruction is hard to comprehend pic.twitter.com/2hLlg3BiPO
Гаворка ідзе не толькі пра ведамствы Беларусі, Непала і Кітая. Нядаўна Кацярына атрымала ізраільскі пашпарт, таксама ў яе ёсць дазвол на жыхарства ў Італіі. Але паколькі турыстка заехала ў Непал па беларускіх дакументах, ва ўсіх спісах зніклых без вестак яна лічыцца як грамадзянка толькі Беларусі.
З першага дня пошукаў Дарына дамагалася, каб Кацярына фігуравала ў іх і як грамадзянка Ізраіля. Ізраільскія дыпламаты ўжо пацвердзілі, што гатовыя аказваць консульскую дапамогу, італьянскія ўлады таксама адрэагавалі на запыты блізкіх. Аднак ва ўмовах НС сувязь з Непалам і Кітаем пакуль застаецца няхуткай — даныя ў спісах яшчэ не адкарэктаваныя.
«Рэч у тым, што калі раптам мая сястра знаходзіцца без прытомнасці дзе-небудзь у бальніцы, то гэтыя нестыкоўкі могуць прывесці да таго, што мы не адразу атрымаем пра гэта інфармацыю. А для мяне і ўсёй маёй сям’і вельмі важна як мага хутчэй даведацца, што яна была знойдзена. Усё гэта робіцца толькі для таго, каб як мага хутчэй атрымаць інфармацыю.
Па беларускім, па ізраільскім боку я непасрэдна размаўляю з пасламі, з консуламі, дзяжурнымі лініямі. Тэлефанавала, напрыклад, на кругласутачную лінію беларускага МЗС — усе там цалкам у курсе ўсяго. Тлумачылі, як працуюць дыпмісіі, бо я з гэтым раней не сутыкалася. Спакойна інфармуюць, падтрымліваюць, разумеючы, што я чалавек, які знаходзіцца ў стрэсе. З гэтага пункту гледжання структуры працуюць добра, беларускія у тым ліку».
На гэты момант Кацярына лічыцца зніклай толькі ў непальскіх спісах — верагодней за ўсё, таму што яе група альбо не прайшла далёка па тэрыторыі Кітая, альбо зусім не паспела перасячы мяжу. Такога меркавання прытрымліваецца кіраўнік турагенцтва Leaf Holidays Гапал Тхапа, з якім Дарына таксама трымае сувязь.
Кітайскі бок пераход мяжы ўдзельнікамі групы пакуль афіцыйна не пацвярджае.
«Буду хадзіць па бальніцах»
Дарына разам са сваім маладым чалавекам заўтра вылятае ў Катманду, каб браць удзел у пошуках сястры ўжо на месцы. Ізраільскае МЗС накіравала дзяўчыну на ДНК-тэставанне — гэта стандартная працэдура для сваякоў зніклых без вестак.
«Што будзе рабіцца ў Непале? Я збіраюся разгарнуць такую ж дзейнасць, якую разгарнула ў Ізраілі. Працягну ціснуць на мясцовыя СМІ, каб МЗС [Непала і Кітая] як мага хутчэй далі інфармацыю пра другое грамадзянства. Гэта будзе рана ці позна зроблена, проста агалошванне ў СМІ паскарае гэтыя працэсы.
Я буду хадзіць па бальніцах, усімі спосабамі даведваючыся, што, як і чаму там адбываецца. Заходзіць у бальніцы, шукаць людзей, якія не могуць сябе назваць, ці людзей на ШВЛ. Сваімі вачыма, ручкамі правяраючы. Таму што інфармацыя даходзіць розная: то няма замежнікаў, то блытаніна… Сітуацыя можа змяняцца ў любы момант. Таксама мая мэта — як мага хутчэй прыбыць у які-небудзь штаб, каб таксама праверыць усю інфармацыю, якую мне будуць даваць. Усё для таго, каб мая сям’я не з'язджала з глузду ад невядомасці».
Беларуска, вывучыўшы падобныя выпадкі, запэўнівае, што шанцы выжыць, нават знаходзячыся ў эпіцэнтры сыходу селевага патоку, ёсць, таму і надзею знайсці сястру Дарына губляць не збіраецца.
«Ёсць афіцыйныя даныя, што людзі (знясіленыя, вядома), у якіх нават не было доступу да вады, выжывалі нават праз два тыдні пад заваламі. Таму нягледзячы на тое, як усё выглядае трывожна, страшна, для кагосьці безвыходна, шанцы ёсць заўсёды».
«Кайлас, я іду». Што за беларуска знікла ў жудасным селі ў Непале
«Мы павінны былі ехаць гэтым жа маршрутам». Беларус цудам пазбег катастрофы ў Непале і страціў там сябра
У гразевым патоку ў Непале загінула ці знікла 5700 чалавек
У непальскай катастрофе цудам ацалеў бірузовы дом, на які абрынуўся селевы паток. Як яму гэта ўдалося?
У Непале пахавалі 229 неапазнаных цел. Сотні ахвяр паводкі могуць так і застацца неапазнанымі
Каментары