«Чакаем у Мінску +1 славутасць!» Блогераў прывезлі ў былую турму на Валадарскага

Улады арганізавалі для групы блогераў экскурсію ў Пішчалаўскі замак — былую турму на Валадарскага, — а цяпер тыя дзеляцца захапленнем з падпісчыкамі.

Блогерка Raidensy пазіцыянуе свой кантэнт як «добрыя навіны з Беларусі». Яна мае каля 645 тысяч падпісчыкаў у тыктоку і 130 тысяч у інстаграме.

Дзяўчына апублікавала допіс у Threads: «Пішчалаўскі замак цяпер: рэканструкцыя завершыцца ў 2027 годзе! Ён адкрыецца для кожнага, там будуць музей, кавярня і рэстараны. Мэта рэканструкцыі — максімальнае захаванне сцен і канструкцый. Чакаем у Мінску +1 славутасць».

@raidensy

что будет в Пищаловском замке?

♬ оригинальный звук - рэйдэнси

У каментарах Raidensy нагадалі што ў былой турме катавалі людзей. Але блогерка гэта праігнаравала, а ў тыкток выклала ролік, дзе робіць акцэнт менавіта на слове замак і кажа фразу, якая яшчэ нядаўна гучала б двухсэнсоўна: «Пішчалаўскі замак адкрыецца для кожнага!»

Гэтых жа тэзісаў прытрымліваецца і блогер Максім Пушкін: «Паказваю, як зараз у цэнтры Мінска выглядае Пішчалаўскі замак (Валадарка). Як зробяць, адкрыюць для ўсіх! Нават кафэ будуць».

Павялічыць

У сторыс у інстаграме (там Максім мае больш за 80 тысяч падпісчыкаў) адзначае: «Абяцаюць, што будзе вельмі прыгожа!».

Блогерка і стваральніца інста-рэаліці Маша Сас увогуле не вельмі разумела, куды трапіла. Яна распавяла падпісчыкам у сторыс, што іх прывезлі «ў нейкі замак». А потым яшчэ дадала: «Гэта проста ў Мінску такі замак стаіць. Тут рэстаўрацыя поўным ходам ідзе!»

Павялічыць

Праўда, у выніку ўсё ж Маша была расчаравана: «Рамантызуеш усе гэтыя замкі… Што тут нейкая жанчына ў прыгожай сукенцы жыла… А гэта турма. Я вось думала, мы зараз пройдземся, тут нейкая легенда, прывід…».

Недалёка ад Машы гуляў і яе муж — інста-блогер Ілля Сас.

Адзначыўся ў сумна вядомым месцы вядучы ды стваральнік медыяагенцтва Аркадзь Логвін (мае 72 тысячы падпісчыкаў у інстаграме і каля 120 тысяч у тыктоку). Ён узяў з сабой на экскурсію дзіця.

Павялічыць

Яго меседж не адрозніваецца ад іншых. Маўляў, як добра, што ў 200‑гадовым замку зробяць файнае месца для тусовак — неўзабаве яно будзе радаваць мінчан ды гасцей сталіцы. «Бары, рэстараны, музеі — такая незвычайная лакацыя з'явіцца ў цэнтры Мінска!».

Пра турму гучыць літаральна некалькі слоў. Праўда, Аркадзь памыліўся, сказаўшы, што Валадарку закрылі на рэканструкцыю ў 2016 годзе.

Гэта абурыла журналіста Ігара Лосіка: «У якім годзе на рэканструкцыю? Я ў 2020 сядзеў там. Вас па абвестках набіраюць?»

Здаецца, з наведвальнікаў экскурсіі больш-менш адэкватна яе ацэньвае Станіслаў Агінскі — сузаснавальнік праектаў «Гастрафэст» і «Пясочніца». Ён паіранізаваў у сторыс, што сюды цікава трапіць толькі ў якасці госця. Але дадаў: «Праз год прыбудзем з інспекцыяй».

Павялічыць

Засвяціўся на мерапрыемстве блогер Стас Семчанка (летась ён заклікаў беларусаў удзельнічаць у выбарах і распавядаў, што Мінск круцейшы за Дубай).

Выклала свае відэа таксама былая Улька Пулька (яна ж Ульяна Сталярова, а цяпер проста Пуля). Для яе Пішчалаўскі замак таксама проста «шалёна прыгожая лакацыя». Кажа, вельмі крута далучыцца да гэтай гісторыі.

Павялічыць

Канешне, такія пазітыўныя відэа з былой турмы, дзе зусім нядаўна катавалі, у тым ліку, палітычных зняволеных шмат каго абурылі.

• 0
• 0
• 0
• 0
• 0
• 0
• 0
• 0