Пуцін абвясціў пра захоп горада, да якога расійскія войскі нават не падышлі
Уладзімір Пуцін заявіў, што расійская армія нібыта захапіла ўкраінскі Святагорск. Аднак гэта не пацвярджае ніводная з асноўных карт баявых дзеянняў: горад застаецца пад кантролем Украіны, а найбліжэйшыя расійскія пазіцыі знаходзяцца прыкладна за 9,5 кіламетра ад яго.
Пра нібыта захоп Святагорска Пуцін заявіў на прэс-канферэнцыі пасля саміту Шанхайскай арганізацыі супрацоўніцтва ў Бішкеку.
«За апошні месяц пад кантроль расійскіх войскаў перайшлі 14 населеных пунктаў, у тым ліку вызвалена Казачая Лопань, а вось учора — горад Святагорск», — сказаў ён.
Расійскія дзяржаўныя і прапагандысцкія СМІ распаўсюдзілі гэтыя словы як паведамленне пра рэальны вайсковы поспех.
Аднак актуальныя карты баявых дзеянняў паказваюць зусім іншую сітуацыю. Паводле DeepState, Святагорск знаходзіцца пад кантролем Украіны. Ад горада да найбліжэйшай тэрыторыі, занятай расійскімі войскамі, — каля 9,5 кіламетра.
Такую ж карціну паказваюць іншыя карты. Ні на адной з іх няма расійскіх войскаў ні ў самім Святагорску, ні ў непасрэднай блізкасці ад горада.
Пуцін жа заявіў пра поўны захоп горада.
Каментары