Kiraŭnik «Biełhazprombanka» na adkryćci «Dziesiaci stahodździaŭ mastactva»: Žyvie Biełaruś!

U Minsku, u Nacyjanalnym mastackim muziei, adkryłasia šykoŭnaja vystava — «10 stahodździaŭ biełaruskaha mastactva».

«Vielmi ciažka ŭ farmacie adnoj vystavy pakazać ažno 10 stahodździaŭ, adnak u vyniku ŭ nas atrymałasia, usiaho tut 500 ekspanataŭ», — tłamačać supracoŭniki muzieja.

Adzin z samych maštabnych mastackich prajektaŭ apošnich hadoŭ uražvaje: ekspanaty pryvieźli ledź nie z usich muziejaŭ Biełarusi, da taho ž «Biełhazprombank» padzialiŭsia karcinami z ułasnaj kalekcyi, a heta tvory Šahała, Vańkoviča i Sucina.

Mienavita sucinaŭskaja «Jeva» i stała hałoŭnaj padziejaj vystavy: pa-pieršaje, jana vystaŭlajecca ŭpieršyniu, pa-druhoje, šmat kaho z naviednikaŭ pryvablivaje chacia b toje, što cana karciny pieravyšaje miljon dalaraŭ. Manstruoznaja załataja rama «Jevy» troški ściskaje nadzvyčaj kranalny i spakojny pa kolerach partret.

Pieraličyć usie cikavostki vystavy prosta niemahčyma:

tut možna ŭbačyć i Statut 1588 hoda, i «Vialikaje mastactva artyleryi» Siemianoviča (abiedźvie knihi vykupali «ŭsim śvietam» u kalekcyjanieraŭ), i staradaŭnija žyrandoli, i artefakty z majontka Kaściuški, i kinapłakaty, ale ŭ pieršuju čarhu, kaniešnie, karciny».

Achapić historyju atrymałasia: pačynajučy ad starych ikon, i navat pamienšanaj kopii Kryža Jefrasini Połackaj (jaki ad fatohrafaŭ staranna achoŭvaŭ dyrektar muzieja Uładzimir Prakapcoŭ, bo na vyjavie kryž moža skazicca, a heta śviatynia) da pracaŭ Ceślera i Vojčanki. Ad ananimnych partretaŭ epochi baroka da suprematyčnych karcin Nadziei Chadasievič-Leže. Ad mastakoŭ Zachodniaj Biełarusi, siarod jakich jaskrava vyłučajecca kasmałahičny Jazep Drazdovič, da sacyjalistyčnaha realizmu i karcin Savickaha.

Na vystavie možna nabyć katałoh – u elektronnym vyhladzie na fłešcy, albo ŭ vyhladzie falijanta na try kiłahramy. Vystava praciahniecca da 7-ha lipienia, i dla luboha amatara mastactva naviedać jaje prosta nieabchodna.

Darečy, staršynia praŭleńnia «Biełhazprombanka» Viktar Babaryka, vystupajučy na cyrymonii adkryćcia hetaj vystavy 26 sakavika, paviedamlaje BiełaPAN, zaznačyŭ: 

«Dzieviać miesiacaŭ tamu my pryjšli ŭ Ministerstva kultury i paprasili sabrać naradu z kiraŭnikami muziejaŭ Biełarusi, jakim bank chacieŭ prapanavać ideju. My skazali im: davajcie pachvalimsia sami pierad saboj i ŭsim śvietam, što my zrabili za hetyja dziesiać stahodździaŭ. Ja nikoli nie dumaŭ, što ŭ adnym miescy z takim ščyrym entuzijazmam i supieražyvańniem my možam sabrać voś takuju kolkaść raznapłanavych ludziej, muziejaŭ i ekspanataŭ».

«Dla nas unikalnaść hetaj vystavy mienavita ŭ tym, što ŭ nas jość toje [kultura Biełarusi], dziela čaho my, nie źviartajučy ŭvahi na adroźnieńni, addadzim usio samaje lepšaje, što ŭ nas jość.

Pakul u Biełarusi budzie ideja i dumka, jakaja moža ab`iadnać nas takich roznych, z roznym mastackim hustam, palityčnymi prychilnaściami, uzrostam i adnosinami, datul była, jość i budzie naša bieł-čyrvona-biełaja siniavokaja Biełaruś. Žyvie Biełaruś!» — zajaviŭ Babaryka.

Hetyja słovy vyklikali praciahłyja apładysmienty, dadaje BiełaPAN

• 0
• 0
• 0
• 0
• 0
• 0
• 0
• 0